स चात्मा नाव्यापकः नापि क्षणिकः देशकालाभ्याम् अनवच्छिन्नत्वात् ॥ (१।०)

तदाहुः । (२।१)

अनवच्छिन्नसद्भावं वस्तु यद् देशकालतः । (२।२)

तन् नित्यं विभु चेच्छन्तीत्यात्मनो विभुनित्यते ॥ (२।३)

इति ॥ (३।०)

न चासाव् एकः । (४।१)

एको वशी सर्वभूतान्तरात्मा । (४।२)

इति प्रतिपन्नानां ब्रह्मविदाम् इव जन्ममरणकरणादिप्रतिनियमदर्शनस्य पुरुषबहुत्वज्ञापकस्यापह्नोतुम् अशक्यत्वात् ॥ (४।३)

न च नैयायिकवैशेषिकाणामिव जडः ॥ (५।०)

नापि सांख्यानामिवाकर्ता ॥ (६।०)

न च केषांचिदिवागन्तुना चिता युक्तः ॥ (७।०)

कुतः इत्याह पाशान्ते शिवताश्रुतेः पाशानामविद्यादीनाम् अन्ते तत्प्रतिबन्धकत्वव्यपगमे यतो ऽस्यात्मनः शिवत्वव्यक्तिः श्रूयते ॥ (८।०)

तथा चोक्तम् । (९।१)

अथात्ममलमायाख्यकर्मबन्धविमुक्तये । (९।२)

व्यक्तये च शिवत्वस्य शिवाज् ज्ञानं प्रवर्तते ॥ (९।३)

इति ॥ (१०।०)

न च तच्छिवत्वम् अव्यापकत्वादिधर्मयुक्तं ज्ञत्वकर्तृत्वरहितं वा ॥ (११।०)

नित्यं कालानवच्छेदाद् वैतत्यान् न प्रदेशगम् ॥ (१२।०)

इत्यादिना प्रत्युत तद्विलक्षणत्वस्योपपादितत्वात् ॥ (१३।०)

न च व्यापकत्वनित्यत्वादेर् मुक्ताव् एवोदयात् संसार्यवस्थायाम् अभाव इति मन्तव्यम् असदुत्पत्त्यसम्भवस्योपपादयिष्यमाणत्वाद् इति ॥ (१४।०)