अथोपलभ्य देहादि वस्तु कार्यत्वधर्मकम् । (१।१)

कर्तारमस्य जानीमः ॥ (१।२)

इत्यादिना तावदीश्वरस्य सत्ता साधिता ॥ (२।०)

नित्यं कालानवच्छेदाद्वैतत्यान् न प्रदेशगम् । (३।१)

क्रमाक्रमसमुत्पत्तेः क्रमाद्युत्पत्तिशक्तिमत् ॥ (३।२)

इति तत्स्वरूपमुक्तम् ॥ (४।०)

करणं च न शक्त्यन्यच्छक्तिर् नाचेतना चितः ॥ (५।०)

इत्यनेन करणं कथितम् ॥ (६।०)

विनियोगफलं मुक्तिर्भुक्तिर् अप्यनुषङ्गतः ॥ (७।०)

इत्यमुनार्थः प्रयोजनमुपवर्णितम् ॥ (८।०)

जगज्जन्मस्थितिध्वंसतिरोभावविमुक्तयः । (९।१)

कृत्यम् ॥ (९।२)

इत्यनेन पञ्चविधं विधेयमुक्तम् ॥ (१०।०)

दृक्च अस्य ज्ञानम् । (११।१)

नाध्यक्षं नापि तल्लैङ्गम् । (११।२)

इत्यादिना निर्णीतमिति ॥ (११।३)

एताभिः सत्तास्वरूपकरणार्थविधेयदृग्भिः संक्षेपोक्ताभिर् ईशतत्त्वं ये विदुः जानन्ति ते पुरुषाः संसारकर्दमनिमग्नान् संसारिणो मोचयन्ति न तु विस्तरेण पशुरूपं पाशरूपं वा ईश्वरं ये विदुः यथा ॥ (१२।०)

आत्मैवेदं सर्वम् । (१३।१)

पुरुष एवेदं सर्वम् ॥ (१३।२)

इत्येवंविधपुरुषरूपेश्वरवादिनः कर्मकालाव्यक्तादिपाशरूपेश्वरवादिनो वा पशूनां स्वयम् एवानाद्यज्ञाननिमग्नत्वेनाकिंचित्करत्वात् पाशानां च तत्पाशन एव चरितार्थत्वात् तत्तत्संयोगे वियोगादौ वा निगलादिवत् परापेक्षत्वे सत्यनीश्वरत्वात् ॥ (१४।०)

तथाविधेश्वरावबोधात् परमोचनं सकललोकोपहासावहं यतः ॥ (१५।०)

पशुशब्दश्चात्र समनन्तरप्रकरणोपक्रम्यमाणात्मतत्त्वोपक्षेपायोपहृतः ॥ (१६।०)