श्रीगणाधिपतये नमः । (१।१)

सरस्वत्यै नमः । (१।२)

अथ श्रीगरुडमहापुराणं प्रारभ्यते । (१।३)

तत्रादौ कर्मकाण्डाख्यः पूर्वखण्डः प्रारभ्यते । (१।४)

ॐ नारायणं नमस्कृत्य नरं चैव नरोत्तमम् । (१।५)

देवीं सरस्वतीं चैव ततो जयमुदीरयेत् । (१।६)

ॐ अजमजरमनन्तं ज्ञानरूपं महान्तं शिवममलमनादिं भूतदेहादिहीनम् । (१।७)

सकलकरणहीनं सर्वभूतस्थितं तं हरिम् अमलम् अमायं सर्वगं वन्द एकम् ॥ (१।८)

नमस्यामि हरिं रुद्रं ब्रह्माणं च गणाधिपम् । (२।१)

देवीं सरस्वतीं चैव मनोवाक्कर्मभिः सदा ॥ (२।२)

सूतं पौराणिकं शान्तं सर्वशास्त्रविशारदम् । (३।१)

विष्णुभक्तं महात्मानं नैमिषारण्यम् आगतम् ॥ (३।२)

तीर्थयात्राप्रसङ्गेन उपविष्टं शुभासने । (४।१)

ध्यायन्तं विष्णुमनघं तमभ्यर्च्यास्तुवन्कविम् ॥ (४।२)

शौनकाद्या महाभागा नैमिषीयास्तपोधनाः । (५।१)

मुनयो रविसङ्काशाः शान्ता यज्ञपरायणाः ॥ (५।२)

ऋषय ऊचुः । (६।१)

सूत जानासि सर्वं त्वं पृच्छामस्त्वामतो वयम् । (६।२)

देवतानां हि को देव ईश्वरः पूज्य एव कः ॥ (६।३)

को ध्येयः को जगत्स्रष्टा जगत् पाति च हन्ति कः । (७।१)

कस्मात्प्रवर्तते धर्मो दुष्टहन्ता च कः स्मृतः ॥ (७।२)

तस्य देवस्य किं रूपं जगत्सर्गः कथं मतः । (८।१)

कैर्व्रतैः स तु तुष्टः स्यात्केन योगेन वाप्यते ॥ (८।२)

अवताराश्च के तस्य कथं वंशादिसम्भवः । (९।१)

वर्णाश्रमादिधर्माणां कः पाता कः प्रवर्तकः ॥ (९।२)

एतत्सर्वं तथान्यच्च ब्रूहि सूत महामते । (१०।१)

नारायणकथाः सर्वाः कथयास्माकमुत्तमाः ॥ (१०।२)

सूत उवाच । (११।१)

पुराणं गारुडं वक्ष्ये सारं विष्णुकथाश्रयम् । (११।२)

गरुडोक्तं कश्यपाय पुरा व्यासाच्छ्रुतं मया ॥ (११।३)

एको नारायणो देवो देवानामीश्वरेश्वरः । (१२।१)

परमात्मा परं ब्रह्म जन्माद्यस्य यतो भवेत् ॥ (१२।२)

जगतो रक्षणार्थाय वासुदेवो ऽजरो ऽमरः । (१३।१)

स कुमारादिरूपेण अवतारान्करोत्यजः ॥ (१३।२)

हरिः स प्रथमं देवः कौमारं सर्गमास्थितः । (१४।१)

चचार दुश्चरं ब्रह्मन् ब्रह्मचर्यमखण्डितम् ॥ (१४।२)

द्वितीयं तु भवायास्य रसातलगतां महीम् । (१५।१)

उद्धरिष्यन्नुपादत्ते यज्ञेशः सौकरं वपुः ॥ (१५।२)

तृतीयमृषिसर्गं तु देवर्षित्वमुपेत्य सः । (१६।१)

तन्त्रं सात्वतमाचष्टे नैष्कर्म्यं कर्मणां यतः ॥ (१६।२)

नरनारायणो भूत्वा तुर्ये तेपे तपो हरिः । (१७।१)

धर्मसंरक्षणार्थाय पूजितः स सुरासुरैः ॥ (१७।२)

पञ्चमः कपिलो नाम सिद्धेशः कालविप्लुतम् । (१८।१)

प्रोवाच सूरये सांख्यं तत्त्वग्रामविनिर्णयम् ॥ (१८।२)

षष्ठमत्रेरपत्यत्वं दत्तः प्राप्तो ऽनसूयया । (१९।१)

आन्वीक्षिकीमलर्काय प्रह्लादादिभ्य ऊचिवान् ॥ (१९।२)

ततः सप्त आकूत्यां रुचेर्यज्ञो ऽभ्यजायत । (२०।१)

सुत्रामाद्यैः सुरगणैर् यष्ट्वा स्वायम्भुवान्तरे ॥ (२०।२)

अष्टमे मेरुदेव्यां तु नाभेर्जात उरुक्रमः । (२१।१)

दर्शयन्वर्त्म नारीणां सर्वाश्रमनमस्कृतम् ॥ (२१।२)

ऋषिभिर्याचितो भेजे नवमं पार्थिवं वपुः । (२२।१)

दुग्धैर्महौषधैर्विप्रास्तेन संजीविताः प्रजाः ॥ (२२।२)

रूपं स जगृहे मात्स्यं चाक्षुषान्तरसंप्लवे । (२३।१)

नाव्यारोप्य महीमय्यामपाद् वैवस्वतं मनुम् ॥ (२३।२)

सुरासुराणामुदधिं मथ्नतां मन्दराचलम् । (२४।१)

दध्रे कमठरूपेण पृष्ठ एकादशे विभुः ॥ (२४।२)

धान्वन्तरं द्वादशमं त्रयोदशममेव च । (२५।१)

आप्यायत् सुरान् अन्यान् मोहिन्या मोहयन् स्त्रिया ॥ (२५।२)

चतुर्दशं नारसिंहं चैत्य दैत्येन्द्रमूर्जितम् । (२६।१)

ददार करजैरुग्रैरेरकां कटकुद्यथा ॥ (२६।२)

पञ्चदशं वामनको भूत्वागादध्वरं बलेः । (२७।१)

पादत्रयं याचमानः प्रत्यादित्सुस्त्रिविष्टपम् ॥ (२७।२)

अवतारे षोडशमे पश्यन्ब्रह्मद्रुहो नृपान् । (२८।१)

त्रिः सप्तकृत्वः कुपितो निःक्षत्त्राम् अकरोन्महीम् ॥ (२८।२)

ततः सप्तदशे जातः सत्यवत्यां पराशरात् । (२९।१)

चक्रे वेदतरोः शाखां दृष्ट्वा पुंसो ऽल्पमेधसः ॥ (२९।२)

नरदेवत्वमापन्नः सुरकार्यचिकीर्षया । (३०।१)

समुद्रनिग्रहादीनि चक्रे कार्याण्यतः परम् ॥ (३०।२)

एकोनविंशे विंशतिमे वृष्णिषु प्राप्य जन्मनी । (३१।१)

रामकृष्णाविति भुवो भगवानहरद्भरम् ॥ (३१।२)

ततः कलेस्तु सन्ध्यान्ते संमोहाय सुरद्विषाम् । (३२।१)

बुद्धो नाम्ना जिनसुतः कीकटेषु भविष्यति ॥ (३२।२)

अथ सो ऽष्टमसन्ध्यायां नष्टप्रायेषु राञ्जसु । (३३।१)

भविता विष्णुयशसो नाम्ना कल्की जगत्पतिः ॥ (३३।२)

अवतारा ह्यसंख्येया हरेः सत्त्वनिधेर्द्विजाः । (३४।१)

मनुवेदविदो ह्याद्याः सर्वे विष्णुकलाः स्मृताः ॥ (३४।२)

तस्मात्सर्गादयो जाताः संपूज्याश्च व्रतादिना । (३५।१)

पुराणं गारुडं व्यासः पुरासौ मे ऽब्रवीदिदम् ॥ (३५।२)

इति श्रीगारुडे महापुराणे पूर्वखण्डे प्रथमांशाख्ये कर्मकाण्डे एतत्पुराणप्रवृत्तिहेतुनिरूपणं नाम प्रथमो ऽध्यायः ॥ (३६।१)