ब्रह्मोवाच । (१।१)

वक्ष्ये प्रतिपदादीनि व्रतानि व्यास शृण्वथ । (१।२)

वैश्वानरपदं याति शिखिव्रतमिदं स्मृतम् ॥ (१।३)

प्रतिपद्येकभक्ताशी समाप्ते कपिलाप्रदः । (२।१)

चैत्रादौ कारयेच्चैव ब्रह्मपूजां यथाविधि । (२।२)

गन्धपुष्पार्चनैर् दानैर् माल्याद्यैश्च मनोरमैः ॥ (२।३)

सहोमैः पूजयेद्देवं सर्वान्कामानवाप्नुयात् । (३।१)

कार्तिके त सिते ऽष्टम्यां पुष्पहारी च वत्सरम् ॥ (३।२)

पुष्पादिदाता रूपेण रूपभागी भवेन्नरः । (४।१)

कृष्णपक्षे तृतीयायां श्रावणे श्रीधरं श्रिया ॥ (४।२)

यजेदशून्यशय्यायां फलं दद्याद्द्विजातये । (५।१)

शय्यां दत्त्वा प्रार्थयेच्च श्रीधराय नमः श्रियै ॥ (५।२)

उमां शिवं हुताशं च तृतीयायां च पूजयेत् । (६।१)

हविष्यम् अन्नं नैवेद्यं देयं दमनकं तथा ॥ (६।२)

चैत्रादौ फलमाप्नोति उमया मे प्रभाषितम् । (७।१)

फाल्गुनादितृतीयायां लवणं यस्तु वर्जयेत् ॥ (७।२)

समाप्ते शयनं दद्याद्गृहं चोपस्करान्वितम् । (८।१)

सम्पूज्य विप्रमिथनं भवानी प्रीयतामिति ॥ (८।२)

गौरीलोके वसेन्नित्यं सौभाग्यकरमुत्तमम् । (९।१)

गौरी काली उमा भद्रा दुर्गा कान्तिः सरस्वती ॥ (९।२)

मङ्गला वैष्णवी लक्ष्मीः शिवा नारायणी क्रमात् । (१०।१)

मार्गे तृतीयामारभ्य अवियोगादिम् आप्नुयात् ॥ (१०।२)

चतुर्थ्यां सितमाघादौ निराहारो व्रतान्वितः । (११।१)

दत्त्वा तिलांस्तु विप्राय स्वयं भुङ्क्ते तिलोदकम् ॥ (११।२)

वर्षद्वये समाप्तिश्च निर्विघ्नादिं समाप्नुयात् । (१२।१)

गः स्वाहा मूलमन्त्रो ऽयं प्रणवेन समन्वितः ॥ (१२।२)

ग्लैं ग्लां हृदये गां गीं हूं ह्रीं ह्रीं शिरः शिखा । (१३।१)

गूं वर्म ग्ॐ च गैं नेत्रं ग्ॐ च आवाहनादिषु ॥ (१३।२)

आगच्छोल्काय गनन्धोल्कः पुष्पोल्को धूपकोल्ककः । (१४।१)

दीपोल्काय महोल्काय बलिश्चाथ विसजनम् ॥ (१४।२)

सिदेधोल्काय च गायत्त्री न्यासोङ्गुष्ठादिर् ईरितः । (१५।१)

ॐ महाकर्णाय विद्महे वक्रतुण्डाय धीमहि तन्नो दन्तिः प्रचोदयात् ॥ (१५।२)

पूजयेत् तिलहोमैश्च एते पूज्या गणास्तथा । (१६।१)

गणाय गणपतये स्वाहा कूष्माण्डकाय च ॥ (१६।२)

अमोघोल्कायैकदन्ताय त्रिपुरान्तकरूपिणे । (१७।१)

ॐ श्यामदन्तविकरालास्याहवेपाय वै नमः ॥ (१७।२)

पद्मदंष्ट्राय स्वाहान्ते मुद्रा वै नर्तनं गणे । (१८।१)

हस्ततालश्च हसनं सौभाग्यादिफलं भवेत् ॥ (१८।२)

मार्गशीर्षे तथा शुक्लचतुर्थ्यां पूजयेद् गणम् । (१९।१)

अब्दं प्राप्नोति विद्याश्रीकीर्त्यायुःपुत्रसन्ततिम् ॥ (१९।२)

सोमवारे चतुर्थ्यां च समुपोष्यार्चयेद्गणम् । (२०।१)

जपञ्जुह्वत्स्मरन्विद्या स्वर्गं निर्वाणतां व्रजेत् ॥ (२०।२)

यजेच्छुक्लचतुर्थ्यां यः खण्डलड्डुकमोदकैः । (२१।१)

विघ्नाचनेन सर्वान्स कामान्सौभाग्यमाप्नुयात् ॥ (२१।२)

पुत्रादिकं दमनकैर्दमनाख्या चतुर्थ्यपि । (२२।१)

आं गणपतये नमः चतुर्थ्यन्तं यजेद्गणम् ॥ (२२।२)

मासे तु यस्मिन्कस्मिंश्चिज्जुहुयाद्वा जपेत्स्मरेत् । (२३।१)

सर्वान्कामानवाप्नोति सर्वविघ्नविनाशनम् ॥ (२३।२)

विनायकं मूर्तिकाद्यं यजेदेभिश्च नामभिः । (२४।१)

सो ऽपि सद्गतिमाप्नोति स्वर्गमोक्षसुखानि च ॥ (२४।२)

गणपूज्यो वक्रतुण्ड एकदंष्ट्री त्रियम्बकः । (२५।१)

नीलग्रीवो लम्बोदरो विकटो विघ्नराजकः ॥ (२५।२)

धूम्रवर्णो भालचन्द्रो दशमस्त विनायकः । (२६।१)

गणपतिर्हस्तिमुखो द्वादशारे यजेद्गणम् ॥ (२६।२)

पृथक् समस्तं मधावी सर्वान्कामानवाप्नुयात् । (२७।१)

श्रावणे चाश्विने भाद्रे पञ्चम्यां कात्तिक शुभे ॥ (२७।२)

वासुकिस्तक्षकश्चैव कालीयो मणिभद्रकः । (२८।१)

ऐरावतो धृतराष्ट्रः कर्कोटकधनञ्जयौ ॥ (२८।२)

घृताद्यैः स्नापिता ह्येते आयुरारोग्यसम्पदः । (२९।१)

अनन्तं वासुकिं शङ्खं पद्मं कम्बलमेव च ॥ (२९।२)

तथा कर्कोटकं नागं धृतराष्ट्रं च शङ्खकम् । (३०।१)

कालीयं तक्षकं चैव पिङ्गलं मासि मासि च ॥ (३०।२)

यजेद्भाद्रसिते नागानष्टौ मुक्तिं दिवं व्रजेत् । (३१।१)

द्वारस्योभयतो लेख्याः श्रावणे तु सिते यजेत् ॥ (३१।२)

पञ्चम्यां पूजयेन्नागान् अनन्ताद्यान् महोरगान् । (३२।१)

क्षीरं सर्पिश्च नैवेद्यं देयं सर्वविषापहम् । (३२।२)

नागा अभयहस्ताश्च दष्टोद्धारा तु पञ्चमी ॥ (३२।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे दष्टोद्धारपञ्चमव्रितं नामैकोनत्रिंशोत्तरशततमो ऽध्यायः ॥ (३३।१)