हरिरुवाच । (१।१)

नवव्यूहार्चनं वक्ष्ये यदुक्तं कश्यपाय हि । (१।२)

जीवमुत्क्षिप्य मूर्धन्यं नाभ्यां व्योम्नि निवेशयेत् ॥ (१।३)

ततोरम् इति बीजेन दहेद्भूतात्मकं वपुः । (२।१)

यमित्यनेन बीजेन तच्च सर्वं विनाशयेत् ॥ (२।२)

लमित्यनेन बीजेन प्लावयेत्सचराचरम् । (३।१)

वमित्यनेन बीजेन चिन्तयेदमृतं ततः ॥ (३।२)

ततो बुद्बुदमध्ये तु पीतवासाश्चतुर्भुजः । (४।१)

अहं मतस्तथात्मानं ध्यानेन परिचिन्तयेत् ॥ (४।२)

मन्त्रन्यासं ततः कुर्यात्त्रिविधं करदेहयोः । (५।१)

द्वादशाक्षरबीजेन उक्तबीजैरनन्तरम् ॥ (५।२)

षडङ्गेन ततः कुर्यात्साक्षाद्येन हरिर्भवेत् । (६।१)

दक्षिणाङ्गुष्ठमारभ्य मध्याङ्गुष्ठं दले न्यसेत् ॥ (६।२)

मध्ये बीजद्वयं न्यस्य न्यसेदङ्गे ततः पुनः । (७।१)

हृच्छिरसि शिखावर्मवक्क्राक्ष्युदहपृष्ठतः ॥ (७।२)

बाह्वोश्च करयोर्जान्वोः पादयोश्चापि विन्यसेत् । (८।१)

पद्माकारौ करौ कृत्वा मध्ये ऽङ्गुष्ठं निवेशयेत् ॥ (८।२)

चिन्तयेत्तत्र सर्वेशं परं तत्त्वमनामयम् । (९।१)

क्रमाच्चैतानि बीजानि तर्जन्यादिषु विन्यसेत् ॥ (९।२)

ततो मूर्धाक्षिवक्त्रेषु कण्ठे च हृदये तथा । (१०।१)

नाभौ गुह्ये तथा जान्वोः पादयोर्विन्यसेत्क्रमात् ॥ (१०।२)

पाण्योः षडङ्गबीजानि न्यस्य काये ततो न्यसेत् । (११।१)

अङ्गुष्ठादिकनिष्ठान्तं विन्यसेद् बीजपञ्चकम् ॥ (११।२)

करमध्ये नेत्रबीजम् अङ्गन्यासो ऽप्ययं क्रमः । (१२।१)

हृदये हृदयं न्यस्य शिरः शिरसि विन्यसेत् ॥ (१२।२)

शिखायां तु शिखां न्यस्य कवचं सर्वतस्तनौ । (१३।१)

नेत्रं नेत्रे विधातव्यम् अस्त्रं च करयोर्द्वयोः ॥ (१३।२)

तेनैव च दिशो बद्धा पूजाविधिमथाचरेत् । (१४।१)

हृदये चिन्तयेत्पूर्वं योगपीठं समाहितः ॥ (१४।२)

धर्मज्ञानं च वैराग्यमैश्वर्यं च यथाक्रमम् । (१५।१)

आग्नेयादौ च पूर्वादावधर्मादींश्च विन्यसेत् ॥ (१५।२)

एभिः परिच्छन्नतनुं पीठभूतं तदात्मकम् । (१६।१)

अनन्तं विन्यसेत् पश्चात् पूर्वकायोन्नतं स्थितम् ॥ (१६।२)

ततो विद्यात्सरोजातं दलाष्टसमदिग्दलम् । (१७।१)

सिताब्जं शतपत्राढ्यं विप्रकीर्णोर्धकर्णिकम् ॥ (१७।२)

ध्यात्वा वेदादिना पश्चात् सूर्यसोमानलात्मनाम् । (१८।१)

मण्डलानि क्रमादेवमुपर्युपरि चिन्तयेत् ॥ (१८।२)

ततः पूर्वादिदिक्संस्थाः शक्तीः केशवगोचराः । (१९।१)

विमलाद्या न्यसेदष्टौ नवमीं कर्णिकागताम् ॥ (१९।२)

एवं ध्यात्वा समभ्यर्च्य योगपीठमनन्तरम् । (२०।१)

मनसावाह्य तत्रेशं हरिं शार्ङ्गं न्यसेत्पुनः ॥ (२०।२)

हृदयादीनि पूर्वादिचतुर्दिग्दलयोगतः । (२१।१)

मध्ये नेत्रं तु कोणेषु अस्त्रमन्त्रं न्यसेत्ततः ॥ (२१।२)

सङ्कर्षणादिबीजानि पूर्वादिक्रमयोगतः । (२२।१)

द्वारि पूर्वे परे चैव वैनतेयं तु विन्यसेत् ॥ (२२।२)

सुदर्शनं सहस्रारं दक्षिणे द्वारि विन्यसेत् । (२३।१)

श्रियं दक्षिणतो न्यस्य लक्ष्मीमुत्तरतस्तथा ॥ (२३।२)

द्वार्युत्तरे गदां न्यस्य शङ्खं कोणेषु विन्यसेत् । (२४।१)

देवदक्षिणतः शार्ङ्गं वामे चैव सुधीर्न्यसेत् ॥ (२४।२)

तद्वत् खड्गं तथा चक्रं न्यसेत्पार्श्वद्वयोर्द्वयम् । (२५।१)

ततो ऽन्तर्लोकपालांश्च स्वदिग्भेदेन विन्यसेत् ॥ (२५।२)

वज्रादीन्यायुधान्येव तथैव विनिवेशयेत् । (२६।१)

ऊर्ध्वं ब्रह्म तथानन्तमधश्च परिचिन्तयेत् ॥ (२६।२)

सर्वं ध्यात्वेति सम्पूज्य मुद्राः संदर्शयेत्ततः । (२७।१)

अञ्जलिः प्रथमा मुद्रा क्षिप्रं देवप्रसाधनी ॥ (२७।२)

वन्दनी हृदयासक्तात्सार्धं दक्षिणतोन्नता । (२८।१)

ऊर्धाङ्गुण्ठो वाममुष्टिर्दक्षिणाङ्गुष्ठबन्धनः ॥ (२८।२)

सव्यस्य तस्य चाङ्गुष्ठो यः स उद्धः प्रकीर्तितः । (२९।१)

तिस्रः साधारणा ह्येता मूर्तिभेदेन कल्पिताः ॥ (२९।२)

कनिष्ठादिप्रमोकेण अष्टौ मुद्रा यथाक्रमम् । (३०।१)

अष्टानां पूर्वबीजानां क्रमशस्त्ववधारयेत् ॥ (३०।२)

अङ्गुष्ठेन कनिष्ठान्तं नामयित्वाङ्गुलित्रयम् । (३१।१)

मुद्रेयं नरसिंहस्य न्युब्जं कृत्वा करद्वयम् ॥ (३१।२)

सव्यहस्तं तथोत्तानं कृत्वोर्ध्वं भ्रामयेच्छनैः । (३२।१)

नवमीयं स्मृता मुद्रा वराहाभिमता सदा ॥ (३२।२)

मुष्टिद्वयमथोत्तानम् ऋज्वैकैकेन मोचयेत् । (३३।१)

उत्कुञ्चयेत् सर्वमुक्ता अङ्गमुद्रेयमुच्यते ॥ (३३।२)

मुष्टिद्वयमथो बद्धा एवमेवानुपूर्वशः । (३४।१)

दशानां लोकपालानां मुद्राश्च क्रमयोगतः ॥ (३४।२)

सुरमाद्यं द्वितीयं च उपान्त्यं चान्त्यमेव च । (३५।१)

वासुदेवो बलः कामो ह्यनिरुद्धो यथाक्रमम् ॥ (३५।२)

प्रणवस्तत्सदित्येतद् हुं क्षैं भूरिति मन्त्रकाः । (३६।१)

नारायणस्तथा ब्रह्मा विष्णुः सिंहो वराहराट् ॥ (३६।२)

सितारुणहरिद्राभा नीलश्यामलोहिताः । (३७।१)

मेघाग्निमदुपिङ्गाभा वर्णतो नवनामकाः ॥ (३७।२)

कं टं पं शं गरुत्मान्स्याज्जं खं वं च सुदर्शनम् । (३८।१)

षं चं फं षं गदादेवी वं लं मं क्षं च शङ्खकम् ॥ (३८।२)

घं ढं भं हं भवेच्छ्रीश्च गं जं वं शं च पुष्टिका । (३९।१)

घं वं च वनमाला स्याच्छ्री वत्सं दं सं भवेत् ॥ (३९।२)

छं डं पं यं कौस्तुभः प्रोक्तश्चानन्तो ह्यहमेव च । (४०।१)

इत्यङ्गानियथायोगं देवदेवस्य वै दशा ॥ (४०।२)

गरुडो ऽम्बुजसंकाशो गदा चैवासिताकृतिः । (४१।१)

पुष्टिः शिरीषपुष्पाभा लक्ष्मीः काञ्चनसन्निभा ॥ (४१।२)

पूर्णचन्द्रनिभः शङ्खः कौस्तुभस्त्वरुणद्युतिः । (४२।१)

चक्रं सूर्यसहस्राभं श्रीवत्सः कुन्दसन्निभः ॥ (४२।२)

पञ्चवर्णनिभा माला ह्यनन्तो मेघसन्निभः । (४३।१)

विद्युद्रूपाणि चास्त्राणि यानि नोक्तानि वर्णतः ॥ (४३।२)

अर्घ्यपाद्यादि वै दद्यात्पुण्डरीकाक्षविद्यया ॥ (४४।१)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे नवव्यूहार्चनं नामैकादशो ऽध्यायः ॥ (४५।१)