हरिरुवाच । (१।१)

यस्यास्तु कुञ्चिताः केशा मुखं च परिमण्डलम् । (१।२)

नाभिश्च दक्षिणावर्ता सा कन्या कुलवर्धिनी ॥ (१।३)

या च काञ्चनवर्णाभा रक्तहस्तसरोरुहा । (२।१)

सहस्राणां तु नारीणां भवेत्सापि पतिव्रता ॥ (२।२)

वक्रकेशा च या कन्या मण्डलाक्षी च या भवेत् । (३।१)

भर्ता च म्रियते तस्या नियतं दुःखभागिनी ॥ (३।२)

पूर्णचन्द्रमुखी कन्या बालसूर्यसमप्रभा । (४।१)

विशालनेत्रा बिम्बोष्ठी सा कन्या लभते सुखम् ॥ (४।२)

रेखाभिर्बहुभिः क्लेशं स्वल्पाभिर् धनहीनता । (५।१)

रक्ताभिः सुखमाप्नोति कृष्णाभिः प्रेष्यतां व्रजेत् ॥ (५।२)

कार्ये च मन्त्री सत्स्त्री स्यात्सती स्यात्करणेषु च । (६।१)

स्त्रेहेषु भार्या माता स्याद्वेश्या च शयने शुभा ॥ (६।२)

अङ्कुशं कुण्डलं चक्रं यस्याः पाणितले भवेत् । (७।१)

पुत्रं प्रसूयते नारी नरेन्द्रं लभते पतिम् ॥ (७।२)

यस्यास्तु रोमशौ पार्श्वौ रोमशौ च पयोधरौ । (८।१)

उन्नतौ चाधरोष्ठौ च क्षिप्रं मारयते पतिम् ॥ (८।२)

यस्याः पाणितले रेखा प्राकारस्तोरणं भवेत् । (९।१)

अपि दासकुले जाता राज्ञीत्वमुपगच्छति ॥ (९।२)

उद्वृत्ता कपिला यस्य रोमराजी निरन्तरम् । (१०।१)

अपि राजकुले जाता दासीत्वमुपगच्छति ॥ (१०।२)

यस्या अनामिकाङ्गुष्ठौ पृथिव्यां नैव तिष्ठतः । (११।१)

पतिं मारयते क्षिप्रं स्वेच्छाचारेण वर्तते ॥ (११।२)

यस्या गमनमात्रेण भूमिकम्पः प्रजायते । (१२।१)

पतिं मारयते क्षिप्रं स्वेच्छाचारेण वर्तते ॥ (१२।२)

चक्षुःस्नेहेन सौभाग्यं दन्तस्नेहेन भोजनम् । (१३।१)

त्वचः स्नेहेन शय्यां च पादस्नेहेन वाहनम् ॥ (१३।२)

स्निग्धोन्नतौ ताम्रनखौ नार्याश्च चरणौ शुभौ । (१४।१)

मत्स्याङ्कुशाब्जचिह्नौ च चक्रलाङ्गललक्षितौ ॥ (१४।२)

अस्वेदिनौ मृदुतलौ प्रशस्तौ चरणौ स्त्रियाः । (१५।१)

शुभे जङ्घे विरोमे च ऊरू हस्तिकरोपमौ ॥ (१५।२)

अश्वत्थपत्रसदृशं विपुलं गुह्यमुत्तमम् । (१६।१)

नाभिः प्रशस्ता गम्भीरा दक्षिणावर्तिका शुभा । (१६।२)

अरोमा त्रिवली नार्या हृत्स्तनौ रोमवर्जितौ ॥ (१६।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे ज्योतिःशास्त्रे सामुद्रिके स्त्रीलक्षणनिरूपणं नाम चतुःषष्टितमो ऽध्यायः ॥ (१७।१)