हरिरुवाच । (१।१)

समुद्रोक्तं प्रवक्ष्यामि नरस्त्रीलक्षणं शुभम् । (१।२)

येन विज्ञातमात्रेण अतीतानागताप्रमा ॥ (१।३)

अस्वेदिनौ मृदुतलौ कमलोदरसन्निभौ । (२।१)

श्लिष्टाङ्गुली ताम्रनखौ पादाविष्णौ शिरोज्झितौ ॥ (२।२)

कूर्मोन्नतौ गूढगुल्फौ सुपार्ष्णो नृपतेः स्मृतौ । (३।१)

शूर्पाकारौ विरूक्षौ च वक्रौ पादौ शिरालकौ ॥ (३।२)

संशुष्कौ पाण्डुरनखौ निःस्वस्य विरलाङ्गुली । (४।१)

मार्गायोत्कण्टकौ पादौ कषायसदृशौ तथा ॥ (४।२)

विच्छित्तिदौ च वंशस्य ब्रह्मघ्नौ शङ्कुसन्निभौ । (५।१)

अगम्यागमने प्रीतौ जङ्घा विरलरोमिका ॥ (५।२)

मृदुरोमा समा जङ्घा तथा करिकरप्रभा । (६।१)

ऊरवो जानवस्तुल्या नृपस्योपचिताः स्मृताः ॥ (६।२)

निःस्वस्य सृगालजङ्घा रौमैकैकं चकूपके । (७।१)

नृपाणां श्रोत्रियाणां च द्वे द्वे श्रिये च धीमताम् ॥ (७।२)

त्र्याद्यैर्निःस्वा मानवाः स्युर् दुःस्वभावश्च निन्दिताः । (८।१)

केशाश्च वै कुञ्चिताश्च प्रवासे म्रियते नरः ॥ (८।२)

निर्मांसजानुः सौभाग्यमल्पैर्निम्नै रतिः स्त्रियाः । (९।१)

विकटैश्च दरिद्राः स्युः समांसै राज्यमेव च ॥ (९।२)

महद्भिरायुराख्यातं ह्यल्पलिङ्गो धनी नरः । (१०।१)

अपत्यरहितश्चैव स्थूललिङ्गो घनोज्झितः ॥ (१०।२)

मेढ्रे वामनते चैव सुतार्थरहितो भवेत् । (११।१)

वक्रे ऽन्यथा पुत्रवान् स्याद्दारिद्र्यं विनते त्वधः ॥ (११।२)

अल्पे त्वतनयो लिङ्गे शिराले ऽथ सुखी नरः । (१२।१)

स्थूलग्रन्थियुते लिङ्गे भवेत्पुत्रादिसंयुतः ॥ (१२।२)

कोशगूढे दीर्घैर्भुग्नैश्च धनवर्जितः । (१३।१)

बलवान्युद्धशीलश्च लघुशेक्तः स एव च ॥ (१३।२)

दुर्बलस्त्वेकवृषणो विषमाभ्यां चलः स्त्रियाम् । (१४।१)

समाभ्यां क्षितिपः प्रोक्तः प्रलम्बेन शताब्दवान् ॥ (१४।२)

उद्वृंताभ्यां च बह्वायू रूक्षैर्मणिभिरीश्वरः । (१५।१)

पाण्डरैर्मणिभिर् निःस्वा मलिनैः सुखभागिनः ॥ (१५।२)

सशब्दनिःशब्दमूत्राः स्युर् दरिद्राश्च मानवाः । (१६।१)

एकद्वित्रिचतुःपञ्चषड्भिर् धाराभिरेव च ॥ (१६।२)

दक्षिणावर्तचलितमूत्राभिश्च नृपाः स्मृताः । (१७।१)

विकीर्णमूत्रा निःस्वाश्च प्रधानसुखदायिकाः ॥ (१७।२)

एकधाराश्च वनिताः स्निग्धैर्मणिभिरुन्नतैः । (१८।१)

समैः स्त्रीरत्नधनिनो मध्ये निम्नैश्च कन्यकाः ॥ (१८।२)

शुष्कैर् निःस्वा विशुष्कैश्च दुर्भगाः परिकीर्तिताः । (१९।१)

पुष्पगन्धे नृपाः शुक्रे मधुगन्धे धनं बहुः ॥ (१९।२)

पुत्राः शुक्रे मत्स्यगन्धे तनुशुक्रे च कन्यकाः । (२०।१)

महाभोगी मांसगन्धे यज्वा स्यान्मदगन्धिनि ॥ (२०।२)

दरिद्रः क्षारगन्धे च दीर्घायुः शीघ्रमैथुनी । (२१।१)

अशीघ्रमैथुन्यल्पायुः स्थूलस्फिक् स्याद्धनोज्झितः ॥ (२१।२)

मांसलस्फिक् सुखी स्याच्च सिंहस्फिक् भूपतिः स्मृतः । (२२।१)

भवेत्सिंहकटी राजा निःस्वः कपिकटिर्नरः ॥ (२२।२)

सर्पोदरा दरिद्राः स्युः पिठरैश्च घटैः समैः । (२३।१)

धनिनो विपुलैः पार्श्वैर्निःस्वा रक्तैश्च निम्नगैः ॥ (२३।२)

समकक्षाश्च भोगाढ्या निम्नकक्षा धनोज्झिताः । (२४।१)

नृपाश् चोन्नतकक्षाः स्युर् जिह्ना विषमकक्षकाः ॥ (२४।२)

मत्स्योदरा बहुधना नाभिभिः सुखिनः स्मृताः । (२५।१)

विस्तीर्णाभिर्बहुलाभिर्निम्नाभिः क्लेशभागिनः ॥ (२५।२)

बलिमध्यगता नाभिः शूलबाधां करोति हि । (२६।१)

वामावर्तश्च साध्यं वै मेधां दक्षिणतस्तथा ॥ (२६।२)

पार्श्वायता चिरायुर्दा तूपविष्टा धनेश्वरम् । (२७।१)

अधो गवाढ्यं कुर्याच्च नृपत्वं पद्मकर्णिका ॥ (२७।२)

एकबलिः शतायुः स्याच्छ्रीभोगी द्विवलिः स्मृतः । (२८।१)

त्रिवलिः क्ष्माप आचार्य ऋजुभिर्वालिभिः सुखी ॥ (२८।२)

अगम्यागामी जिह्मबलिर्भूपाः पार्श्वैश्च मांसलैः । (२९।१)

मृदुभिः सुसमैश्चैव दक्षिणावर्तरोमभिः ॥ (२९।२)

विपरीतैः परप्रेष्या निर्द्रव्याः सुखवर्जिताः । (३०।१)

अनुद्धतैश्चूचुकैश्च भवन्ति सुभगा नराः ॥ (३०।२)

निर्धना विषमैर् दीर्घैः पीतोपचितकैर् नृपाः । (३१।१)

समोन्नतं च हृदयमकम्पं मांसलं पृथु ॥ (३१।२)

नृपाणामधमानां च खररोमशिरालकम् । (३२।१)

अर्थवान्समवक्षाः स्यात् पीनैर् वक्षोभिरूर्जितः ॥ (३२।२)

वक्षोभिर्विषमैर् निःस्वः शस्त्रेण निधनास्तथा । (३३।१)

विषमैर्जत्रुभिर् निःस्वा अस्थिनद्धैश्च मानवाः ॥ (३३।२)

उन्नतैर्भोगिनो निम्नैर्निःस्वाः पीनैर्धनान्विताः । (३४।१)

निःस्वश्चिपिटकण्ठः स्याच्छिराशुष्कगलः सुखी ॥ (३४।२)

शूरः स्यान्महिषग्रीवः शास्त्रात्तो मृगकण्ठकः । (३५।१)

कम्बुग्रीवश्च नृपतिर्लम्बकण्ठो ऽतिभक्षकः ॥ (३५।२)

अरोमशा भुग्नपृष्ठं शुभं चाशुभमन्यथा । (३६।१)

कक्षाश्वत्थदला श्रेष्ठा सुगन्धिर् मृगरोमिका ॥ (३६।२)

अन्यथा त्वर्थहीनानां दारिद्र्यस्य च कारणम् । (३७।१)

संमासौ चैव भुग्नाल्पौ श्लिष्टौ च विपुलौ शुभौ ॥ (३७।२)

आ जानुलम्बितौ बाहू वृत्तौ पीनौ नृपेश्वरे । (३८।१)

निःस्वानां रोमशौ ह्रस्वौ श्रेष्ठौ करिकरप्रभौ ॥ (३८।२)

हस्ताङ्गुलय एव स्युर् वायुद्वारयुताः शुभाः । (३९।१)

मेधाविनां च सूक्ष्माः स्युर्भृत्यानां चिपिटाः स्मृताः ॥ (३९।२)

स्थूलाङ्गुलीभिर्निःस्वाः स्युर्नताः स्युः सुकृशैस्तदा । (४०।१)

कपितुल्यकराः निःस्वा व्याघ्रतुल्यकरैर्बलम् ॥ (४०।२)

पितृवित्तविनाशश्च निम्नात् करतलान्नराः । (४१।१)

मणिबन्धैर्निगूढैश्च सुश्लिष्टैः शुभगन्धिभिः ॥ (४१।२)

नृपा हीनाः करच्छदैः सशब्दैर्धनवर्जिताः । (४२।१)

संवृतैश्चैव निम्नैश्च धनिनः परिकीर्तिताः ॥ (४२।२)

प्रोत्तानकरदातारो विषमैर्विषमा नराः । (४३।१)

करैः करतलैश्चैव लाक्षाभिर् ईश्वरास्तलैः ॥ (४३।२)

परदाररताः पीतै रूक्षैर् निःस्वा नरा मताः । (४४।१)

तुषतुल्यनखाः क्लीबाः कुटिलैः स्फुटितैर्नराः ॥ (४४।२)

निःस्वाश्च कुनखैस्तद्वद्विवर्णैः परतर्ककाः । (४५।१)

ताम्रैर्भूपा धनाढ्याश्च अङ्गुष्ठैः सयवैस्तथा ॥ (४५।२)

अङ्गुष्ठमूलजैः पुत्री स्याद्दीर्घाङ्गुलिपर्वकः । (४६।१)

दीर्घायुः सुभगश्चैव निर्धनो विरलाङ्गुलिः ॥ (४६।२)

घनाङ्गुलिश्च सधनस्तिस्रो रेखाश्च यस्य वै । (४७।१)

नृपतेः करतलगा मणिबन्धात्समुत्थिताः ॥ (४७।२)

युगमीनाङ्कितनरो भवेत्सत्रप्रदो नरः । (४८।१)

वज्राकाराश्च धनिनां मत्स्यपुच्छनिभा बुधे ॥ (४८।२)

शङ्खातपत्रशिबिकागजपद्मोपमा नृपे । (४९।१)

कुम्भाङ्कुशपताकाभा मृणालाभा निधीश्वरे ॥ (४९।२)

दामाभाश्च गवाढ्यानां स्वस्तिकाभा नृपेश्वरे । (५०।१)

चक्रासितोमरधनुःकुन्ताभा नृपतेः करे ॥ (५०।२)

अलूखलाभा यज्ञाढ्या वेदीभा चाग्निहोत्रिणि । (५१।१)

वापीदेवकुल्याभास् त्रिकोणाभाश् च धार्मिके ॥ (५१।२)

अङ्गुष्ठमूलगा रेखाः पुत्राः सूक्ष्माश्च दारिकाः । (५२।१)

प्रदेशिनीगता रेखा कनिष्ठामूलगामिनी ॥ (५२।२)

शतायुषं च कुरुते छिन्नया तरुतो भयम् । (५३।१)

निःस्वाश्च बहुरेखाः स्युर् निर्द्रव्याश्चिबुकैः कृशैः ॥ (५३।२)

मांसलैश्च धनोपेता आरक्तैरधरैर्नृपाः । (५४।१)

बिम्बोपमैश्च स्फुटितैर् ओष्ठै रूक्षैश् चकण्डितैः ॥ (५४।२)

विषमैर्धनहीनाश्च दन्ताः स्निग्धा घनाः शुभाः । (५५।१)

तीक्ष्णा दन्ताः समाः श्रेष्ठा जिह्वा रक्ता समा शुभा ॥ (५५।२)

श्लक्ष्णा दीर्घा च विज्ञेया तालू श्वेते धनक्षये । (५६।१)

कृष्णे च परुषो वक्रं समं सौम्यं च संवृतम् ॥ (५६।२)

भूपानाममलं श्लक्ष्णं विपरीतं च दुःखिनाम् । (५७।१)

महादुःखं दुर्भगाणां स्त्रीमुखं पुत्रमाप्नुयात् ॥ (५७।२)

आढ्यानां वर्तुलं वक्रं निर्द्रव्याणां च दीर्घकम् । (५८।१)

भीरुवक्रः पापकर्मा धूर्तानां चतुरश्रकम् ॥ (५८।२)

निम्नं वक्रमपुत्राणां कृपणानां च ह्रस्वकम् । (५९।१)

सम्पूर्णं भोगिनां कान्तं श्मश्रु स्निग्धं शुभं मृदु ॥ (५९।२)

संहतं चास्फुटिताग्रं रक्तश्मश्रुश्च चौरकः । (६०।१)

रक्ताल्पपरुषश्मश्रुकर्णाः स्युः पापमृत्यवः ॥ (६०।२)

निर्मांसैश् चिपिटैर् भोगाः कृपणा ह्रस्वकर्णकाः । (६१।१)

शङ्कुकर्णाश्च राजानो रोमकर्णा गतायुषः ॥ (६१।२)

बृहत्कर्णाश्च धनिनो राजानः परिकीर्तिताः । (६२।१)

कर्णैः स्निग्धावनद्धैश्च व्यालम्बैर् मांसलैर् नृपाः ॥ (६२।२)

भोगी वै निम्नगण्डः स्यान्मन्त्री सम्पूर्णगण्डकः । (६३।१)

शुकनासः सुखी स्याच्च शुष्कनासो ऽतिजीवनः ॥ (६३।२)

छिन्नाग्रकूपनासः स्याद् अगम्यागमने रतः । (६४।१)

दीर्घनासे च सौभाग्यं चौरश्चाकुञ्चितेन्द्रियः ॥ (६४।२)

मृत्युश्चिपिटनासे स्याद्धीनो भाग्यवतां भवेत् । (६५।१)

स्वल्पच्छिद्रौ सुपुटौ च अवक्रौ च नृपेश्वरे ॥ (६५।२)

क्रूरे दक्षिणवक्रा स्याद् बलिनां च क्षुतं सकृत् । (६६।१)

स्याद् विनिष्पिण्डितं ह्रादि सानुनादं च जीवकृत् ॥ (६६।२)

वक्रान्तैः पद्मपत्राभैर्लोचनैः सुखभागिनः । (६७।१)

मार्जारलोचनैः पाप्मा दुरात्मा मधुपिङ्गलैः ॥ (६७।२)

क्रूराः केकरनेत्राश्च हरिताक्षाः सकल्मषाः । (६८।१)

जिह्मैश्च लोचनैः शूराः सेनान्यो गजलोचनाः ॥ (६८।२)

गम्भीराक्षा ईश्वराः स्युर्मन्त्रिणः स्थूलचक्षुषः । (६९।१)

नीलोत्पलाक्षा विद्वांसः सौभाग्यं श्यामचक्षुषाम् ॥ (६९।२)

स्यात् कृष्णतारकाक्षाणाम् अक्ष्णाम् उत्पाटनं किल । (७०।१)

मण्डलाक्षाश्च पापाः स्युर्निःस्वाः स्युर् देनलोचनाः ॥ (७०।२)

दृक् स्निग्धा विपुला भोगे अल्पायुरधिकोन्नता । (७१।१)

विशालोन्नता सुखिनी दरिद्रा विषमभ्रुवः ॥ (७१।२)

घनदीर्घासु सक्तभ्रूर् बालेन्दून्नतसुभ्रुवः । (७२।१)

आढ्यो निःस्वश्च खण्डभ्रूर् मध्ये च विनतभ्रुवः ॥ (७२।२)

स्त्रीषु गम्यासु सक्ताः स्युः सुतार्थे परिवर्जिताः । (७३।१)

उन्नतैर् विपुलैः शङ्खैर्ललाटैर्विषमैस्तथा ॥ (७३।२)

निर्धना धनवन्तश्च अर्धेन्दुसदृशैर्नराः । (७४।१)

आचार्याः शुक्तिविशालैः शिरालैः पापकारिणः ॥ (७४।२)

अन्नताभैः शिराभिश्च स्वस्तिकाभिर् धनेश्वराः । (७५।१)

निम्नैर्ललाटैर् बन्धार्हाः क्रूरकर्मरतास्तथा ॥ (७५।२)

संवृतैश्च ललाटैश्च कृपणा उन्नतैर्नृपाः । (७६।१)

अनश्रु स्निग्धरुदितमदीनं शुभदं नृणाम् ॥ (७६।२)

प्रचुराश्रुदीनं रूक्षं च रुदितं च सुखावहम् । (७७।१)

अकम्पं हसितं श्रेष्ठं मीलिताक्षमघावहम् ॥ (७७।२)

असकृद्धसितं दुष्टं सोन्मादस्य ह्यनेकधा । (७८।१)

ललाटोपसृतास्तिस्रो रेखाः स्युः शतवर्षिणाम् ॥ (७८।२)

नृपत्वं स्याच्चतसृभिरायुः पञ्चनवत्यथ । (७९।१)

अरेखेणायुर् नवतिर् विच्छिन्नाभिश्च पुंश्ललाः ॥ (७९।२)

केशान्तोपगताभिश्च अशीत्यायुर्नरो भवेत् । (८०।१)

पञ्चभिः सप्तभिः षड्भिः पञ्चाशद्बहुभिस्तथा ॥ (८०।२)

चत्वारिंशच्च वक्राभिस्त्रिंशद्भ्रूलग्नगामिभिः । (८१।१)

विंशतिर्वामवक्राभिर् आयुः क्षुद्राभिरल्पकम् ॥ (८१।२)

छत्राकारैः शिरोभिस्तु नृपा निम्नशिरा धनी । (८२।१)

चिपिटैश्च पितुर्मृत्युर् गवाद्याः परिमण्डलैः ॥ (८२।२)

घटमूर्धा पापरुचिर्धनाद्यैः परिवर्जितः । (८३।१)

कृष्णैराकुञ्चितैः केशैः स्निग्धैरेकैकसम्भवैः ॥ (८३।२)

अभिन्नाग्रैश्च मृदुभिर्न चातिबहुभिर्नृपाः । (८४।१)

बहुमूलैश्च विषमैः स्थूलाग्रैः कपिलैस्तथा ॥ (८४।२)

निःस्वाश् चैवातिकुचिलैर् घनैरसितमूर्धजैः । (८५।१)

यद्यद्गात्रं महारूक्षं शिरालं मांसवर्जितम् ॥ (८५।२)

तत्तत्स्याद् अशुभं सर्वं ततो ऽन्यथा । (८६।१)

विपुलस्त्रिषु गम्भीरो दीर्घः सूक्ष्मश्च पञ्चसु ॥ (८६।२)

षडुन्नतश् चतुर्ह्रस्वो रक्तः सप्तस्वसौ नृपः । (८७।१)

नाभिः स्वरश्च ससत्त्वं च त्रयं गम्भीरमीरितम् ॥ (८७।२)

पुंसः स्यादतिविस्तीर्णं ललाटं वदनं ह्युरः । (८८।१)

चक्षुः कक्षा नासिका च षट् स्युर् नृपकृकाटिकाः ॥ (८८।२)

उन्नतानि च ह्रस्वानि जङ्घा ग्रीवा च लिङ्गकम् । (८९।१)

पृष्ठं चत्वारि रक्तानि करताल्वधरा नखाः ॥ (८९।२)

नेत्रान्तपादजिह्वौष्ठाः पञ्च सूक्ष्माणि सन्ति वै । (९०।१)

दशनाङ्गुलिपर्वाणि नखकेशत्वचः शुभाः ॥ (९०।२)

दीर्घाः स्तनान्तरं बाहुदन्तलोचननासिकाः । (९१।१)

नराणां लक्षणं प्रोक्तं वदामि स्त्रीषु लक्षणम् ॥ (९१।२)

राज्ञ्याः स्निग्धौ समौ पादौ तलौ ताम्रौ नखौ तथा । (९२।१)

श्लिष्टाङ्गुली चोन्नताग्रौ तां प्राप्य नृपतिर्भवेत् ॥ (९२।२)

निगूढगुल्फोपचितौ पद्मकान्तितलौ शुभौ । (९३।१)

अस्वेदिनौ मृदुतलौ मत्स्याङ्कुशघ्वजाञ्चितौ ॥ (९३।२)

वज्राब्जहलचिह्नौ च दास्याः पादौ ततो ऽन्यथा । (९४।१)

जङ्घे च रोमरहिते सुवृत्ते विसिरे शुभे ॥ (९४।२)

अनुल्बणं सन्धिदेशं समं जानुद्वयं शुभम् । (९५।१)

ऊरू करिकराकाराव् अरोमौ च समौ शुभौ ॥ (९५।२)

अश्वत्थपत्रसदृशं विपुलं गुह्यमुत्तमम् । (९६।१)

श्रोणीललाटकं स्त्रीणामूरु कूर्मोन्नतं शुभम् ॥ (९६।२)

गूढो मणिश्च शुभदो नितम्बश्च गुरुः शुभः । (९७।१)

विस्तीर्णमांसोपचिता गम्भीरा विपुला शुभा ॥ (९७।२)

नाभिः प्रदक्षिणावर्ता मध्यं त्रिवलिशोभितम् । (९८।१)

अरोमशौ स्तनौ पीनौ घनावविषमौ शुभौ ॥ (९८।२)

कठिनौ रोमशा शस्ता मृदुग्रीवा च कम्बुभा । (९९।१)

आरक्तावधरौ श्रेष्ठौ मांसलं वर्तुलं मुखम् ॥ (९९।२)

कुन्दपुष्पसमा दन्ता भाषितं कोकिलासमम् । (१००।१)

दाक्षिण्ययुक्तमशठं हंसशब्दसुखावहम् ॥ (१००।२)

नासा समा समपुटा स्त्रीणां तु रुचिरा शुभा । (१०१।१)

नीलोत्पलनिभं चक्षुर्नासालग्नं न लम्बकम् ॥ (१०१।२)

न पृथू बालेन्दुनिभे भ्रुवौ चाथ ललाटकम् । (१०२।१)

शुभम् अर्धेन्दुसंस्थानम् अतुङ्गं स्यादलोमशम् ॥ (१०२।२)

सुमांसलं कर्णयुग्मं समं मृदु समाहितम् । (१०३।१)

स्निग्धा नीलाश्च मृदवो मूर्धजाः कुञ्चिताः कचाः ॥ (१०३।२)

स्त्रीणां समं शिरः श्रेष्ठं पादे पाणितले ऽथवा । (१०४।१)

वाजिकुञ्जरश्रीवृक्षयूपेषुयवतोमरैः ॥ (१०४।२)

ध्वजचामरमालाभिः शैलकुण्डलवेदिभिः । (१०५।१)

शङ्खातपत्रपद्मैश्च मत्स्यस्वस्तिकसद्रथैः ॥ (१०५।२)

लक्षणैरङ्कुशाद्यैश्च स्त्रियः स्यू राजवल्लभाः । (१०६।१)

निगूढमणिबन्धौ च पद्मगर्भोपमौ करौ ॥ (१०६।२)

न निम्नं नोन्नतं स्त्रीणां भवेत्करतलं शुभम् । (१०७।१)

रेखान्वितं त्वविधवां कुर्यात् संभोगिनीं स्त्रियम् । (१०७।२)

रेखा या मणिबन्धोत्था गता मध्याङ्गुलिं करे ॥ (१०७।३)

गता पाणितले या च योर्ध्वपादतले स्थिता । (१०८।१)

स्त्रीणां पुंसां तथा सा स्याद्राज्याय च सुखाय च ॥ (१०८।२)

कनिष्ठिकामूलभवा रेखा कुर्याच्छतायुषम् । (१०९।१)

प्रदेशिनीमध्यमाभ्याम् अन्तरालगता सती ॥ (१०९।२)

ऊना ऊनायुषं कुर्याद्रेखाश्चाङ्गुष्ठमूलगाः । (११०।१)

बृहत्यः पुत्रास्तन्व्यस्तु प्रमदाः परिकीर्तिताः ॥ (११०।२)

स्वल्पायुषो बहुच्छिन्ना दीर्घाच्छिन्ना महायुषम् । (१११।१)

शुभं तु लक्षणं स्त्रीणां प्रोक्तं त्वशुभमन्यथा ॥ (१११।२)

कनिष्ठिकानामिका वा यस्या न स्पृशते महीम् । (११२।१)

अङ्गुष्ठं वा गतातीत्य तर्जनी कुलटा च सा ॥ (११२।२)

ऊर्ध्वं द्वाभ्यां पिण्डिकाभ्यां जङ्घे चातिशिरालके । (११३।१)

रोमशे चातिमांसे च कुम्भाकारं तथोदरम् ॥ (११३।२)

वामावर्तं निम्नमल्पं दुःखितानां च गुह्यकम् । (११४।१)

ग्रीवया ह्रस्वया निःस्वा दीर्घया च कुलक्षयः ॥ (११४।२)

पृथुलया प्रचण्डाश्च स्त्रियः स्युर्नात्र संशयः । (११५।१)

केकरे पिङ्गले नेत्रे श्यामे लोलेक्षणा सती ॥ (११५।२)

स्मिते कूपे गण्डयोश्च सा ध्रुवं व्यभिचारिणी । (११६।१)

प्रलम्बिनी ललाटे तु देवरं हन्ति चाङ्गना ॥ (११६।२)

उदरे श्वशुरं हन्ति पतिं हन्ति स्फिचोर्द्वयोः । (११७।१)

या तु रोमोत्तरौष्ठी स्यान्न शुभा भर्तुरेव हि ॥ (११७।२)

स्तनौ सरोमाव् अशुभौ कर्णौ च विषमौ तथा । (११८।१)

कराला विषमा दन्ताः क्लेशाय च भवन्ति ते ॥ (११८।२)

चौर्याय कृष्णमांसाश्च दीर्घा भर्तुश्च मृत्यवे । (११९।१)

क्रव्यादरूपैर्हस्तैश्च वृककाकादिसन्निभैः ॥ (११९।२)

शिरालैर्विषमैः शुष्कैर्वित्तहीना भवन्ति हि । (१२०।१)

समुन्नतोत्तरौष्ठी या कलहे रूक्षभाषिणी ॥ (१२०।२)

स्त्रीषु दोषा विरूपासु पत्राकारो गुणास्ततः । (१२१।१)

नरस्त्रीलक्षणं प्रोक्तं वक्ष्ये तज्ज्ञानदायकम् ॥ (१२१।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे ज्योतिःशास्त्रे सामुद्रिके स्त्रीनरलक्षणं नाम पञ्चषष्टितमो ऽध्यायः ॥ (१२२।१)