याज्ञवल्क्य उवाच । (१।१)

श्रीकामः शान्तिकामो वा ग्रहदृष्ट्यभिचारवान् । (१।२)

ग्रहयज्ञं समं कुर्याद् ग्रहाश्चैते बुधैः स्मृताः ॥ (१।३)

सूर्यः सोमो मङ्गलश्च बुधश्चैव बृहस्पतिः । (२।१)

शुक्रः शनैश्चरो राहुः केतुर्ग्रहगणाः स्मृताः ॥ (२।२)

ताम्रकात्स्फाटिकाद्रक्तचन्दनात्स्वर्णकादुभौ । (३।१)

रजतादयसः सीसात्कांस्याद्वर्णान्निबोधत ॥ (३।२)

रक्तः शुक्लस्तथा रक्तः पीतः पीतः सितोऽसितः । (४।१)

कृष्णः कृष्णः क्रमाद्वर्णा द्रव्याणि मुनयस्ततः ॥ (४।२)

स्थापयेद् ग्रहवर्णानि होमार्थं प्रलिखेत्पटे । (५।१)

स्नापयेद्धोमयेच्चैव ग्रहद्रव्यैर्विधानतः । (५।२)

सुवर्णानि प्रदेयानि वासांसि सुसुमानि च ॥ (५।३)

गन्धाश्च बलयश्चैव धूपो देयश्चगुग्गुलुः । (६।१)

कर्तव्यास्तत्र मन्त्रैश्च चरवः प्रतिदैवतम् ॥ (६।२)

आकृष्णेन इमन्देवा अग्निर्मूर्धा दिवः ककुत् । (७।१)

उद्बुध्यस्वेति जुहुयादेभिरेव यथाक्रमम् ॥ (७।२)

बृहस्पतेर् परिदीयेति सर्वे अन्नात् परिसुतम् । (८।१)

शं नो देवी कयानश्च केतुं क्रण्वन्निति क्रमात् ॥ (८।२)

अर्कः पलाशः खदिरस्त्वपामार्गो ऽथ पिप्पलः । (९।१)

औदुम्बरः शमी दूर्वा कुशाश्च समिधः क्रमात् ॥ (९।२)

होतव्या मधुसर्पिर्भ्यां दध्ना चैव समन्वितः । (१०।१)

गुडौदनं पायसं च हविष्यं क्षीरषाष्टिकम् ॥ (१०।२)

दध्योदनं हविः पूपान्मांसं चित्रान्नमेव च । (११।१)

दद्याद् ग्रहक्रमाद् एतान् ग्रहेभ्यो भाजनं ततः ॥ (११।२)

धेनुः शङ्खस्तथानड्वान् हेमवासो हयस्तथा । (१२।१)

कृष्णा गौरायसं छाग एता वै दक्षिणाः क्रमात् । (१२।२)

ग्रहाः पूज्याः सदा यस्माद् राज्यादि प्राप्यते फलम् ॥ (१२।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तग्रहशान्तिनिरूपणं नामैकोत्तरशततमो ऽध्यायः ॥ (१३।१)