ब्रह्मोवाच । (१।१)

नवम्यामाश्विने शुक्ले एकभक्तेन पूजयेत् । (१।२)

देवीं विप्रंल्लक्षम् एकं जपेद्वीरं व्रती नरः ॥ (१।३)

ब्रह्मोवाच । (२।१)

चैत्रे शुक्लनवम्यां च देवीं दमनकैर्यजेत् । (२।२)

आयुरारोग्यसौभाग्यं शत्रुभिश्चापराजितः ॥ (२।३)

ब्रह्मोवाच । (३।१)

दशम्यामेकभक्ताशी समान्ते दशधेनुदः । (३।२)

दिशश्च काञ्चनीर्दत्त्वा ब्रह्माण्डाधिपतिर्भवेत् ॥ (३।३)

ब्रह्मोवाच । (४।१)

एकादश्यामृषिपूजा कार्या सर्वोपकारिका । (४।२)

धनवान्पुत्रवांश्चान्ते ऋषिलोके महीयते ॥ (४।३)

मरीचिर् अत्र्यङ्गिरसौ पुलस्त्यः पुलहः क्रतुः । (५।१)

प्रचेताश्च वसिष्ठश्च भृगुर्नारद एव च ॥ (५।२)

चैत्रादौ कारयेत्पूजां माल्यैश्च दमनोद्भवैः । (६।१)

अशोकाख्याष्टमी प्रोक्ता वीराख्या नवमी तथा ॥ (६।२)

दमनाख्या दिग्दशमी नवम्येकादशी तथा ॥ (७।१)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे ऋष्येकादशीव्रतं नाम पञ्चत्रिंशदुत्तरशततमो ऽध्यायः ॥ (८।१)