हरिरुवाच । (१।१)

वास्तुं संक्षेपतो वक्ष्ये गृहादौ विघ्ननाशनम् । (१।२)

ईशानकोणादारभ्य ह्येकाशीतिपदे यजेत् ॥ (१।३)

ईशाने च शिरः पादौ नैरृते ऽग्न्यनिले करौ । (२।१)

आवासवासवेश्मादौ पुरे ग्रामे वणिक्पथे ॥ (२।२)

प्रासादारामदुर्गेषु देवालयमठेषु च । (३।१)

द्वाविंशतिसुरान् बाह्ये तदन्तश्च त्रयोदश ॥ (३।२)

ईशश्चैवाथ पर्जन्यो जयन्तः कुलिशायुधः । (४।१)

सूर्यः सत्यो भृगुश्चैव आकाशो वायुरेव च ॥ (४।२)

पूषा च वितथश्चैव ग्रहक्षेत्रयमावुभौ । (५।१)

गन्धर्वो भृगुराजस्तु मृगः पितृगणस्तथा ॥ (५।२)

दौवारिको ऽथ सुग्रीवः पुष्पदन्तो गणाधिपः । (६।१)

असुरः शेषपापौ च रोगो डहिमुख एव च ॥ (६।२)

भल्लाटः सोमसर्पौ च अदितिश्चदितिस्तथा । (७।१)

बहिर्द्वात्रिंशदेते तु तदन्तश्चतुरः शृणु ॥ (७।२)

ईशानादिचतुष्कोणसंस्थितान् पूजयेद् बुधः । (८।१)

आपश्चैवाथ सावित्री जयो रुद्रस्तथैव च ॥ (८।२)

मध्ये नवपदे ब्रह्मा तस्याष्ठौ च समीपगान् । (९।१)

देवानेकोत्तरान् एतान् पूर्वादौ नामतः शृणु ॥ (९।२)

अर्यमा सविता चैव विवस्वान्विबुधाधिपः । (१०।१)

मित्रो ऽथ राजयक्ष्मा च तथा पृथ्वीधरः क्रमात् ॥ (१०।२)

अष्टमश् चापवत्सश् च परितो ब्रह्मणः स्मृताः । (११।१)

ईशानकोणादारभ्य दुर्गे चर् वंश उच्यते ॥ (११।२)

आग्नेयकोणादारभ्य वंशो भवति दुर्धरः । (१२।१)

अदितिं हिमवन्तं च जयन्तं च इदं त्रयम् ॥ (१२।२)

नायिका कालिका नाम शक्राद्रन्धर्वगाः पुनः । (१३।१)

वास्तुदेवान्पूजयित्वा गृहप्रासादकृद्भवेत् ॥ (१३।२)

सुरेज्यः पुरतः कार्यो यस्याग्नेय्यां महानसम् । (१४।१)

कपिनिर्गमने येन पूर्वतः सत्रमण्डपम् ॥ (१४।२)

गन्धपुष्पगृहं कार्यमैशान्यां पट्टसंयुतम् । (१५।१)

भाण्डागारं च कौबेर्यां गोष्ठागारं च वायवे ॥ (१५।२)

उदगाश्रयं च वारुण्यां वातायनसमन्वितम् । (१६।१)

समित्कुशेन्धनस्थानम् आयुधानां च नैरृते ॥ (१६।२)

अभ्यागतालयं रम्यसशय्यासनापदुकम् । (१७।१)

तोयाग्निदीपसद्भृत्यैर् युक्तं दक्षिणतो भवेत् ॥ (१७।२)

गृहान्तराणि सर्वाणि सजलैः कदलीगृहैः । (१८।१)

पञ्चवर्णैश्च कुसुमैः शोभितानि प्रकल्पयेत् ॥ (१८।२)

प्राकारं तद्बहिर् दद्यात् पञ्चहस्तप्रमाणतः । (१९।१)

एवं विष्ण्वाश्रमं कुर्याद्वनैश्चोपवनैर्युतम् ॥ (१९।२)

चतुःषष्टिपदो वास्तुः प्रासादादौ प्रपूजितः । (२०।१)

मध्ये चतुष्पदो ब्रह्मा द्विपदास् त्वर्यमादयः ॥ (२०।२)

कर्णे चैवाथ शिख्याद्यास्तथा देवाः प्रकीर्तिताः । (२१।१)

तेभ्यो ह्युभयतः सार्धादन्ये ऽपि द्विपदाः सुराः ॥ (२१।२)

चतुःषष्टिपदा देवा इत्येवं परिकीर्तिताः । (२२।१)

चरकी च विदारी च पूतना पापराक्षसी ॥ (२२।२)

ईशानाद्यास्ततो बाह्ये देवाद्या हेतुकादयः । (२३।१)

हैतुकस्त्रिपुरान्तश्च अग्निवेतालकौ यमः ॥ (२३।२)

अग्निजिह्वः कालकश्च करालो ह्यकपादकः । (२४।१)

ऐशान्यां भीमरूपस्तु पाताले प्रेतनायकः ॥ (२४।२)

आकाशे गन्धमाली स्यात्क्षेत्रपालांस्ततो यजेत् । (२५।१)

विस्ताराभिहतं दैर्घ्यं राशिं वास्तोस्तु कारयेत् ॥ (२५।२)

कृत्वा च वसुभिर् भागं शेषं बद्धायम् आदिशेत् । (२६।१)

पुनर्गुणितमष्टाभिर् भागं तु भाजयेत् ॥ (२६।२)

यच्छेषं तद्भवेदृक्षं भागैर्हृत्वाव्ययं भवेत् । (२७।१)

ऋक्षं चतुर्गुणं कृत्वा नवभिर्भागहारितम् ॥ (२७।२)

शेषमंशं विजानीयाद्देवलस्य मतं यथा । (२८।१)

अष्टाभिर्गुणितं पिण्डं षष्टिभिर् भागाहरितम् ॥ (२८।२)

यच्छेषं तद्भवेज्जीवं मरणं भतहारितम् । (२९।१)

वास्तुक्रोडे गृहं कुर्यान्न पृष्ठे मानवः सदा ॥ (२९।२)

वामपार्श्वेन स्वापिति नात्र कार्या विचारणा । (३०।१)

सिंहकन्यातुलायां च द्वारं शुध्येदथोत्तरम् ॥ (३०।२)

एवं च वृश्चिकादौ स्यात्पूर्वदक्षिणपश्चिमम् । (३१।१)

द्वारं दीर्घार्धविस्तारं द्वाराण्यष्टौ स्मृतानि च ॥ (३१।२)

सन्तानप्रेष्यनीचत्वं स्वयानं स्वर्णभूषणम् । (३२।१)

सुतहीनं तु रौद्रेण वीर्यघ्नं दक्षिणे तथा ॥ (३२।२)

वह्नौ वधश्चायुर्वृद्धिं पुत्रलाभसुतृप्तिदः । (३३।१)

धनदे नृपपीडादमर्थघ्नं रोगदं जले ॥ (३३।२)

नृपभीतिर् मृतापत्यं ह्यनपत्यं न वैरदम् । (३४।१)

अर्थदं चार्थहान्यै च दोषदं पुत्रमृत्युदम् ॥ (३४।२)

द्वाराण्युत्तरसंज्ञानि पूर्वद्वाराणि वच्म्यहम् । (३५।१)

अग्निभीतिर् बहुकन्याधनसंमानकोपदम् ॥ (३५।२)

राजघ्नं कोपदं पूर्वे फलतो द्वारमीरितम् । (३६।१)

ईशानादौ भवेत्पूर्वम् अग्नेय्यादौ तु दक्षिणम् ॥ (३६।२)

नैरृत्यादौ पश्चिमं स्याद्वायव्यादौ तु चोत्तरम् । (३७।१)

अष्टभागे कृते भागे द्वाराणां च फलाफलम् ॥ (३७।२)

अश्वत्थप्लक्षन्यग्रोधाः पूर्वादौ स्यादुदुम्बरः । (३८।१)

गृहस्य शोभनः प्रोक्त ईशाने चैव शाल्मलिः । (३८।२)

पूजितो विघ्नहारी स्यात्प्रासादस्य गृहस्य च ॥ (३८।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे वास्तुमानलक्षणं नाम षट्चत्वारिंशो ऽध्यायः ॥ (३९।१)