रुद्र उवाच । (१।१)

पुनर्ध्यानं समाचक्ष्व शङ्खचक्रगदाधर । (१।२)

विष्णोरीशस्य देवस्य शुद्धस्य परमात्मनः ॥ (१।३)

हरिरुवाच । (२।१)

शृणु रुद्र हरेर्ध्यानं संसारतरुनाशनम् । (२।२)

दृशिरूपमनन्तं च सर्वव्याप्य् अजम् अव्ययम् ॥ (२।३)

अक्षरं सर्वगं नित्यं महद्ब्रह्मास्ति केवलम् । (३।१)

सर्वस्य जगतो मूलं सर्वगं परमेश्वरम् ॥ (३।२)

सर्वभूतहृदिस्थं वै सर्वभूतमहेश्वरम् । (४।१)

सर्वाधारं निराधारं सर्वकारणकारणम् ॥ (४।२)

अलेपकं तथा मुक्तं मुक्तयोगिविचिन्तितम् । (५।१)

स्थूलदेहविहीनं च चक्षुषा परिवर्जितम् ॥ (५।२)

वागिन्द्रियविहीनं च प्राणिधर्मविवर्जितम् । (६।१)

पादेन्द्रियविहीनं च वाग्धर्मपरिवर्जितम् । (६।२)

पायूपस्थविहीनं च सर्वैन्द्रियविवर्जितम् ॥ (६।३)

मनोविरहितं तद्वन्मनोधर्मविवर्जितम् । (७।१)

बुद्ध्या विहीनं देवेशं चेतसा परिवर्जितम् ॥ (७।२)

अहङ्कारविहीनं वै बुद्धिधर्मविवर्जितम् । (८।१)

प्राणेन रहितं चैव ह्यपानेन विवर्जितम् ॥ (८।२)

व्यानाख्यवायुहीनं वै प्राणधर्मविवर्जितम् । (९।१)

हरिरुवाच । (९।२)

पुनः सूर्यर्चनं वक्ष्ये यदुक्तं भृगवे पुरा ॥ (९।३)

ॐ खखोल्काय नमः । (१०।१)

सूर्यस्य मूलमन्त्रो ऽयं भुक्तिमुक्तिप्रदायकः ॥ (१०।२)

ॐ खखोल्काय त्रिदशाय नमः । (११।१)

ॐ विचि ठठ शिरसे नमः । (११।२)

ॐ ज्ञानिने ठठ शिखायै नमः । (११।३)

ॐ सहस्ररश्मये ठठ कवचाय नमः ॥ (११।४)

ॐ सर्वतेजोऽधिपतये ठठ अस्त्राय नमः । (१२।१)

ॐ ज्वल ज्वल प्रज्वल प्रज्वल ठठ नमः ॥ (१२।२)

अग्निप्राकारमन्त्रो ऽयं सूर्यस्याघविनाशनः । (१३।१)

ॐ आदित्याय विद्महे विश्वभावाय धीमहि तन्नः सूर्य प्रचोदयात् ॥ (१३।२)

सकलीकरणं कुर्याद् गायत्र्या भास्करस्य च । (१४।१)

धर्मात्मने च पूर्वस्मिन्यमायेति च दक्षिणे ॥ (१४।२)

दण्डनायकाय ततो दैवतायेति चोत्तरे । (१५।१)

श्यामपिङ्गलमैशान्यामाग्नेय्यां दीक्षितं यजेत् ॥ (१५।२)

वज्रपाणिं च नैरृत्यां भूर् भुवः स्वश्च वायवे । (१६।१)

ॐ चन्द्राय नक्षत्राधिपतये नमः । (१६।२)

ॐ अङ्गारकाय क्षितिसुताय नमः । (१६।३)

ॐ बुधाय सोमसुताय नमः । (१६।४)

ॐ वागीश्वराय सर्वविद्याधिपतये नमः । (१६।५)

ॐ शुक्राय महर्षये भृगुसुताय नमः । (१६।६)

ॐ शनैश्चराय सूर्यात्मजाय नमः । (१६।७)

ॐ राहवे नमः । (१६।८)

ॐ केतवे नमः ॥ (१६।९)

पूर्वादीशानपर्यन्ता एते पूज्या वृषध्वज । (१७।१)

ॐ अनूकाय नमः । (१७।२)

ॐ प्रथमनाथाय नमः । (१७।३)

ॐ बुद्धाय नमः ॥ (१७।४)

ॐ भगवन्नपरिमितमयूखमालिन् सकलजगत्पते सप्ताश्ववाहन चतुर्भुज परमसिद्धिप्रद विस्फुलिङ्गपिङ्गल तत एह्येहि इदमर्घ्यं मम शिरसि गतं गृह्ण गृह्ण तेजोग्ररूपम् अनग्न ज्वल ज्वल ठठ नमः ॥ (१८।१)

अनेनावाह्य मन्त्रेण ततः सूर्यं विसर्जयेत् । (१९।१)

ॐ नमो भगवते आदित्याय सहस्रकिरणाय गच्छ सुखं पुनरागमनायेति ॥ (१९।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे हरिध्यानसूर्यार्चनयोर्निरूपणं नाम षोडशो ऽध्यायः ॥ (२०।१)