सूत उवाच । (१।१)

सर्वतीर्थानि वक्ष्यामि गङ्गा तीर्थोत्तमोत्तमा । (१।२)

सर्वत्र सुलभा गङ्गा त्रिषु स्थानेषु दुर्लभा ॥ (१।३)

गङ्गाद्वारे प्रयागे च गङ्गासागरसङ्गमे । (२।१)

प्रयागं परमं तीर्थं मृतानां भुक्तिमुक्तिदम् ॥ (२।२)

सेवनात्कृतपिण्डानां पापजित् कामदं नृणाम् । (३।१)

वाराणसी परं तीर्थं विश्वेशो यत्र केशवः ॥ (३।२)

कुरुक्षेत्रं परं तीर्थं दानाद्यैर्भुक्तिमुक्तिदम् । (४।१)

प्रभासं परं तीर्थं सोमनाथो हि तत्र च ॥ (४।२)

द्वारका च पुरी रम्या भुक्तिमुक्तिप्रदायिका । (५।१)

प्राची सरस्वती पुण्या सप्तसारस्वतं परम् ॥ (५।२)

केदारं सर्वपापघ्नं सम्भलग्राम उत्तमः । (६।१)

नरनारायणं तीर्थं मुक्त्यै बदरिकाश्रमः ॥ (६।२)

श्वेतद्वीपं पुरी माया नैमिषं पुष्करं परम् । (७।१)

अयोध्या चार्घ्यतीर्थं तु चित्रकूटं च गोमती ॥ (७।२)

वैनायकं महीतीर्थं रामगिर्याश्रमं परम् । (८।१)

काञ्चीपुरी तुङ्गभद्रा श्रीशैलं सेतुबन्धनम् ॥ (८।२)

रामेश्वरं परं तीर्थं कार्त्तिकेयं तथोत्तमम् । (९।१)

भृगुतुङ्गं कामतीर्थं तीर्थं चामरकण्टकम् ॥ (९।२)

उज्जयिन्यां महाकालः कुब्जके श्रीधरो हरिः । (१०।१)

कुब्जाम्रकं महातीर्थं कालसर्पिश्च कामदम् ॥ (१०।२)

महाकेशी च कावेरी चन्द्रभागा विपाशया । (११।१)

एकाम्रं च तथा तीर्थं ब्रह्मेशं देवकोटकम् ॥ (११।२)

मथुरा च पुरी रम्या शोणश्चैव महानदः । (१२।१)

जम्बूसरो महातीर्थं तानि तीर्थानि विद्धि च ॥ (१२।२)

सूर्यः शिवो गणो देवी हरिर्यत्र च तिष्ठति । (१३।१)

एतेषु च यथान्येषु स्नानं दानं जपस्तपः ॥ (१३।२)

पूजा श्राद्धं पिण्डदानं सर्वं भवति चाक्षयम् । (१४।१)

शालग्रामं सर्वदं स्यात्तीर्थं पशुपतेः परम् ॥ (१४।२)

कोकामुखं च वाराहं भाण्डीरं स्वामिसंज्ञकम् । (१५।१)

लोहदण्डे महाविष्णुर्मन्दारे मधुसूदनः ॥ (१५।२)

कामरूपं महातीर्थं कामाख्या यत्र तिष्ठति । (१६।१)

पुण्ड्रवर्धनकं तीर्थं कार्तिकेयश्च यत्र च ॥ (१६।२)

विरजस्तु महातीर्थं तीर्थं श्रीपुरुषोत्तमम् । (१७।१)

महेन्द्रपर्वतस्तीर्थं कावेरी च नदी परा ॥ (१७।२)

गोदावरी महातीर्थं पयोष्णी वरदा नदी । (१८।१)

विन्ध्यः पापहरं तीर्थं नर्मदाभेद उत्तमः ॥ (१८।२)

गोकर्णं परमं तीर्थं तीर्थं माहिष्मती पुरी । (१९।१)

कालञ्जरं महीतीर्थं शुक्लतीर्थमनुत्तमम् ॥ (१९।२)

कृते शौचे मुक्तिदं च शार्ङ्गधारी तदन्तिके । (२०।१)

विरजं सर्वदं तीर्थं स्वर्णाक्षं तीर्थमुत्तमम् ॥ (२०।२)

नन्दितीर्थं मुक्तिदं च कोटितीर्थफलप्रदम् । (२१।१)

नासिक्यं च महातीर्थं गोवर्धनमतः परम् ॥ (२१।२)

कृष्णवेणी भीमरथी गण्डकी या त्विरावती । (२२।१)

तीर्थं बिन्दुसरः पुण्यं विष्णुपादोदकं परम् ॥ (२२।२)

ब्रह्मध्यानं परं तीर्थं तीर्थम् इन्द्रियनिग्रहः । (२३।१)

दमस्तीर्थं तु परमं भवशुद्धिः परं तथा ॥ (२३।२)

ज्ञानह्रदे ध्यानजले रागद्वेषमलापहे । (२४।१)

यः स्नाति मानसे तीर्थे स याति परमां गतिम् ॥ (२४।२)

इदं तीर्थमिदं नेति ये नरा भेददर्शिनः । (२५।१)

तेषां विधीयते तीर्थगमनं तत्फलं च यत् ॥ (२५।२)

सर्वं ब्रह्मेतियो ऽवैति नातीर्थं तस्य किंचन । (२६।१)

एतेषु स्नानदानानि श्राद्धं पिण्डमथाक्षयम् ॥ (२६।२)

सर्वा नद्यः सर्वशैलाः तीर्थं देवादिसेवितम् । (२७।१)

श्रीरङ्गं च हरेस्तीर्थं तापी श्रेष्ठा महानदी ॥ (२७।२)

सप्तगोदावरं तीर्थं तीर्थं कोणगिरिः परम् । (२८।१)

महालक्ष्मीर्यत्र देवी प्रणीता परमा नदी ॥ (२८।२)

सह्याद्रौ देवदेवेश एकवीरः सुरेश्वरी । (२९।१)

गङ्गाद्वारे कुशावर्ते विन्ध्यके नीलपर्वते ॥ (२९।२)

स्नात्वा कनखले तीर्थे स भवेन्न पुनर्भवे । (३०।१)

सूत उवाच । (३०।२)

एतान्यन्यानि तीर्थानि स्नानाद्यैः सर्वदानि हि ॥ (३०।३)

श्रुत्वाब्रवीद्धरेर्ब्रह्मा व्यासं दक्षादिसंयुतम् । (३१।१)

एतान्युक्त्वा च तीर्थानि पुनस् तीर्थोत्तमोत्तमम् । (३१।२)

गयाख्यं प्राह सर्वेषामक्षयं ब्रह्मलोकदम् ॥ (३१।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे सर्वतीर्थमाहात्म्यं नामैकाशीतितमो ऽध्यायः ॥ (३२।१)