याज्ञवल्क्य उवाच । (१।१)

वानप्रस्थाश्रमं वक्ष्ये तच्छृण्वन्तु महर्षयः । (१।२)

पुत्रेषु भार्यां निःक्षिप्य वनं गच्छेत्सहैव वा ॥ (१।३)

वानप्रस्थो ब्रह्मचारी साग्निः सोपासनः क्षमी । (२।१)

अफालकृष्टेनाग्नींश्च पितृदेवातिथींस्तथा ॥ (२।२)

भृत्यांस्तु तर्पयेच्छ्मश्रुजटालोमभृदात्मवान् । (३।१)

दान्तस्त्रिषवणस्नायी निवृत्तश्च प्रतिग्रहात् ॥ (३।२)

स्वाध्यायवान्ध्यानशीलः सर्वभूतहितरतः । (४।१)

अह्नो मासस्य मध्ये वा कुर्याद्वार्थपरिग्रहम् ॥ (४।२)

कृतं त्यजेदाश्वयुजे युञ्जेत् कालं व्रतादिना । (५।१)

पक्षे मासे ऽथवाश्नीयाद् दन्तोलूखलिको भवेत् ॥ (५।२)

चान्द्रायणी स्वपेद्भूमौ कर्म कुर्यात्फलादिना । (६।१)

ग्रीष्मे पञ्चाग्निमध्यस्थो वर्षासु स्थण्डिलेशयः ॥ (६।२)

आर्द्रवासास्तु हेमन्ते योगाभ्यासाद्दिनं नयेत् । (७।१)

यः कण्टकैर्वितुदति चन्दनैर्यश्च लिम्पति । (७।२)

अक्रुद्धः परितुष्टश्च समस्तस्य च तस्य च ॥ (७।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तवानप्रस्थधर्मनिरूपणं नाम द्व्युत्तरशततमो ऽध्यायः ॥ (८।१)