ब्रह्मोवाच । (१।१)

माघमासे शुक्लपक्षे सूर्यर्क्षेण युता पुरा । (१।२)

एकादशी तथा चैका भीमेन समुपोषिता ॥ (१।३)

आश्चर्यं तु व्रतं कृत्वा पितॄणामनृणो ऽभवत् । (२।१)

भीमद्वादशी विख्याता प्राणिनां पुण्यवर्धिनी ॥ (२।२)

नक्षत्रेण विनाप्येषा ब्रह्महत्यादि नाशयेत् । (३।१)

विनिहन्ति महापापं कुनृपो विषयं यथा ॥ (३।२)

कुपुत्त्रस्तु कुलं यद्वत्कुभार्या च पतिं यथा । (४।१)

अधर्मं च यथा धर्मः कुमन्त्री च यथा नृपम् ॥ (४।२)

अज्ञानेन यथा ज्ञानं शौचम् आशौचकं यथा । (५।१)

अश्रद्धया यथा श्रद्धा सत्यं चैवानृतैर् यथा ॥ (५।२)

हिमं यथोष्णमाहन्यादनर्थं चार्थसंचयः । (६।१)

यथा प्रकर्तिनाद्दानं तपो वै विस्मयाद्यथा ॥ (६।२)

अशिक्षया यथा पुत्रो गावो दूरगतैर्यथा । (७।१)

क्रोधेन च यथा शान्तिर्यथा वित्तमवद्धनात् ॥ (७।२)

ज्ञानेनैयथा विद्या निष्कामेन यथा फलम् । (८।१)

तथैव पापनाशाय प्रोक्तेयं द्वादशी शुभा ॥ (८।२)

ब्रह्महत्या सुरापानं स्तेयं गुर्वङ्गनागमः । (९।१)

युगपत्तु प्रजाता निहन्ति त्रिपुष्करम् ॥ (९।२)

न चापि नैमिषं क्षेत्रं कुरुक्षेत्रं प्रभासकम् । (१०।१)

कालिन्दी यमुना गङ्गा न चैव न सरस्वती ॥ (१०।२)

चैव सर्वतीर्थानि एकादश्याः समानि हि । (११।१)

न दानं न जपो होमो न चान्यत्सुकृतं क्वचित् ॥ (११।२)

एकतः पृथिवीदानमेकतो हरिवासरः । (१२।१)

ततो ऽप्येका महापुण्या इयमेकादशी वरा ॥ (१२।२)

अस्मिन्वराहपुरुषं कृत्वा देवं तु हाटकम् । (१३।१)

घटोपरि नवे पात्रे कृत्वा वै ताम्रभाजने ॥ (१३।२)

सर्वबीजभृते विप्राः सितवस्त्रावगुण्ठिते । (१४।१)

सहिरण्यप्रदीपाद्यैः कृत्वा पूजां प्रयत्नतः ॥ (१४।२)

वराहाय नमः पादौ क्रोडाकृतये नमः कटिम् । (१५।१)

नाभिं गंभीरघोषया उरः श्रीवत्सधारिणे ॥ (१५।२)

बाहुं सहस्रशिरसे ग्रीवां सर्वेश्वराय च । (१६।१)

मुखं सर्वात्मने पूज्यं ललाटं प्रभवाय च ॥ (१६।२)

केशाः शतमयूखाय पूज्या देवस्य चक्रिणः । (१७।१)

विधिना पूजयित्वा तु कृत्वा जागरणं निशि ॥ (१७।२)

श्रुत्वा पुराणं देवस्य माहात्म्यप्रतिपादकम् । (१८।१)

प्रातर्विप्राय दत्त्वा च याचकाय शुभाय तत् ॥ (१८।२)

कनकक्रोडसहितं संनिवेद्य परिच्छदम् । (१९।१)

पश्चात्तु पारणं कुर्यान्नातितृप्तः सकृद्व्रतः ॥ (१९।२)

एवं कृत्वा नरो विद्यान्न भूयस्तनपो भवेत् । (२०।१)

उपोष्यैकादशीं पुण्यां मुच्यते वै ऋणत्रयात् । (२०।२)

मनोऽभिलषितावाप्तिः कृत्वा सर्वव्रतादिकम् ॥ (२०।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे एकादशीमाहात्म्यं नाम सप्तविंशत्युत्तरशततमो ऽध्यायः ॥ (२१।१)