हरिरुवाच । (१।१)

निर्लक्षणा शुभा स्याच्च चक्राङ्कितशिलार्चनात् । (१।२)

आदौ सुदर्शनो मूर्तिर्लक्ष्मीनारायणः परः ॥ (१।३)

त्रिचक्रो ऽसावच्युतः स्याच्चतुश्चक्रश् चतुर्भुजः । (२।१)

वासुदेवश्च प्रद्युम्नस्ततः सङ्कर्षणः स्मृतः ॥ (२।२)

पुरुषोत्तमश्चाष्टमः स्यान्न व्यूहो दशात्मकः । (३।१)

एकादशो ऽनिरुद्धः स्याद्द्वादशो द्वादशात्मकः ॥ (३।२)

अत ऊर्ध्वमनन्तः स्याच्छक्रे रेकादिकैः क्रमात् । (४।१)

सुदर्शना लक्षिताश्च पूजिताः सर्वकामदाः ॥ (४।२)

शालग्रामशिला यत्र देवो द्वारवतीभवः । (५।१)

उभयोः संगमो यत्र तत्र मुक्तिर्न संशयः ॥ (५।२)

शालग्रामो द्वारका च नैमिषं पुष्करं गया । (६।१)

वाराणसी प्रयागश्च कुरुक्षेत्रं च सूकरम् ॥ (६।२)

गङ्गा च नर्मदा चैव चन्द्रभागा सरस्वती । (७।१)

पुरुषोत्तमो महाकालस्तीर्थान्येतानि शङ्कर ॥ (७।२)

सर्वपापहराण्येव भुक्तमुक्तिप्रदानि वै । (८।१)

प्रभवो विभवः शुक्लः प्रमोदो ऽथ प्रजापतिः ॥ (८।२)

अङ्गिराः श्रीमुखो भावः युवा धाता तथैव च । (९।१)

ईश्वरो बहुधान्यश्च प्रमाथी विक्रमो विषुः ॥ (९।२)

चित्रभानुः स्वर्भानुश्च तारणः पार्थिवो व्ययः । (१०।१)

सर्वजित्सर्वधारी च विरोधी विकृतिः खरः ॥ (१०।२)

नन्दनो विजयश्चैव जयो मन्मथदुर्मुखौ । (११।१)

हेमलम्बो विलम्बश्च विकारः शर्वरी प्लवः ॥ (११।२)

शुभकृच्छोभनः क्रोधी विश्वावसुपराभवौ । (१२।१)

प्लवङ्गः कीलकः सौम्यः साधारणविरोधकृत् ॥ (१२।२)

परिधावी प्रमादी च आनन्दो राक्षसो नलः । (१३।१)

पिङ्गलः कालसिद्धार्थौ रौद्रिर्वै दुर्मतिस्तथा ॥ (१३।२)

दुन्दुभी रुधिरोद्गारी रक्ताक्षः क्रोधनो ऽक्षयः । (१४।१)

अशोभनाः शोभनाश्च नाम्नैवैते हि वत्सराः ॥ (१४।२)

कालं वक्ष्यामि संसिद्ध्यै रुद्र पञ्चस्वरोदयात् । (१५।१)

राजा साजा उदासा च पीडा मृत्युस्तथैव च ॥ (१५।२)

आ ई ऊ ऐ औ स्वरांश्च लिखेत्पञ्चाग्निकोष्ठके । (१६।१)

ऊर्ध्वतिर्यग्गतै रेखैः षड्वह्निक्रममागतैः ॥ (१६।२)

तिथी एकाग्निकोष्ठेषु त्रयो राजाथ साजयाः । (१७।१)

उदासामृत्युपीडाश्च कुजः सोमसुतः क्रमात् ॥ (१७।२)

गुरुशुक्रौ च मन्दश्च रविचन्द्रौ यथोदितम् । (१८।१)

रेवत्यादिमृगान्ताश्च ऋक्षाणि प्रथमा कला ॥ (१८।२)

पञ्चपञ्चान्यत्र भानि चैत्राद्य उदयस्तथा । (१९।१)

द्वादशाहैर् द्वयोर् मासनाम्नोर् आद्यक्षरं तथा ॥ (१९।२)

कलालिङ्गा च या तिष्ठेत्पञ्चमस्तस्य वै मृतिः । (२०।१)

कला तिथिस्तथा वारो नक्षत्रं मासमेव च ॥ (२०।२)

नामोदयस्य पूर्वं च तथा भवति नान्यथा । (२१।१)

ॐ क्षैं शिवाय नमः ॥ (२१।२)

क्षामाद्यङ्गशिवामीक्षा विषग्रहमतिर्हर । (२२।१)

त्रैलोक्यमोहनं बीजं नृसिंहस्य तु पद्मगम् ॥ (२२।२)

मृत्युञ्जयो गणो लक्ष्मी रोचनाद्यैस्तु लेखितः । (२३।१)

भूर्जे तु धारिताः कण्ठे बाहौ चेति जयादिदाः ॥ (२३।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे ज्योतिःशास्त्रे शालग्रामषष्ट्यूब्दस्वरोदयानां निरूपणं नाम षट्षष्टितमो ऽध्यायः ॥ (२४।१)