हरिरुवाच । (१।१)

न्यासादिकं प्रवक्ष्यामि गायत्र्याः शृणु शङ्कर । (१।२)

विश्वामित्रर्षिश्चैव सविता चाथ देवता ॥ (१।३)

ब्रह्मशीर्षा रुद्रशिखा विष्णोर्हृदयसंश्रिता । (२।१)

विनियोगैकनयना कात्यायनसगोत्रजा ॥ (२।२)

त्रैलोक्यचरणा ज्ञेया पृथिवीकुक्षिसंस्थिता । (३।१)

एवं ज्ञात्वा तु गायत्त्रीं जपेद्द्वादशलक्षकम् ॥ (३।२)

त्रिपदाष्टाक्षरा ज्ञेया चतुष्पादा षडक्षरा । (४।१)

जपे च त्रिपदा प्रोक्ता अर्चने च चतुष्पदा ॥ (४।२)

न्यासे जपे तथा ध्याने अग्निकार्ये तथार्चने । (५।१)

गायत्त्रीं विन्यसेन्नित्यं सर्वपापप्रणाशिनीम् ॥ (५।२)

पादांगुष्ठे गुल्फमध्ये जङ्घयोर्विद्धि जानुनोः । (६।१)

ऊर्वोर्गुह्ये च वृषणे नाड्यां नाभौ तनूदरे ॥ (६।२)

स्तनयोर्हृदि कण्ठौष्ठमुखे तालुनि चांसयोः । (७।१)

नेत्रे भुवार् ललाटे च पूर्वस्यां दक्षिणोत्तरे ॥ (७।२)

पश्चिमे मूर्ध्नि चाकारं न्यसेद्वर्णान्वदाम्यहम् । (८।१)

इन्द्रनीलं च वह्निं च पीतं श्यामं च कापिलम् ॥ (८।२)

श्वेतं विद्युत्प्रभं तारं कृष्णं रक्तं क्रमेण तत् । (९।१)

श्यामं शुक्लं तथा पीतं श्वेतं वै पद्मरागवत् ॥ (९।२)

शङ्खवर्णं पाण्डुरं च रक्तं चासवसन्निभम् । (१०।१)

अर्कवर्णसमं सौम्यं शङ्खाभं श्वेतमेव च ॥ (१०।२)

यद्यत्स्पृशति हस्तेन यच्च पश्यति चक्षुषा । (११।१)

पूतं भवति तत्सर्वं गायत्त्र्या न परं विदुः ॥ (११।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे गायत्रीन्यासनिरूपणं नाम पञ्चत्रिंशो ऽध्यायः ॥ (१२।१)