ब्रह्मोवाच । (१।१)

स्नात्वा प्रेतशिलादौ तु वरुणास्थामृतेन च । (१।२)

पिण्डं दद्यादिमैर्मन्त्रैरावाह्य च पितॄन्परान् ॥ (१।३)

अस्मत्कुले मृता ये च गतिर्येषां न विद्यते । (२।१)

आवाहयिष्ये तान्सर्वान् दर्भपृष्ठे तिलोदकैः ॥ (२।२)

पितृवंशे मृता ये च मातृवंशे च ये मृताः । (३।१)

तेषाम् उद्धरणार्थाय इमं पिण्डं ददाम्यहम् ॥ (३।२)

मातामहकुले ये च गतिर्येषां न विद्यते । (४।१)

तेषाम् उद्धरणार्थाय इमं पिण्डं ददाम्यहम् ॥ (४।२)

अजातदन्ता ये केचिद्ये च गर्भे प्रपीडिताः । (५।१)

तेषाम् उद्धरणार्थाय इमं पिण्डं ददाम्यहम् ॥ (५।२)

बन्धुवर्गाश्च ये केचिन्नामगोत्रविवर्जिताः । (६।१)

स्वगोत्रे परगोत्रे वा गतिर्येषां न विद्यते । (६।२)

तेषाम् उद्धरणार्थाय इमं पिण्डं ददाम्यहम् ॥ (६।३)

उद्बन्धनमृता ये च विषशस्त्रहताश्च ये । (७।१)

आत्मोपघातिनो ये च तेभ्यः पिण्डं ददाम्यहम् ॥ (७।२)

अग्निदाहे मृता ये च सिंहव्याघ्रहताश्चये । (८।१)

दंष्ट्रिभिः शृङ्गिभिर्वापि तेषां पिण्डं ददाम्यहम् ॥ (८।२)

अग्निदग्धाश्च ये केचिन्नाग्निदग्धास्तथापरे । (९।१)

विद्युच्चौरहता ये च तेभ्यः पिण्डं ददाम्यहम् ॥ (९।२)

रौरवे चान्धतामिस्रे कालसूत्रे च ये गताः । (१०।१)

तेषाम् उद्धरणार्थाय इमं पिण्डं ददाम्यहम् ॥ (१०।२)

असिपत्रवने घोरे कुम्भीपाके च ये गताः । (११।१)

तेषाम् उद्धरणार्थाय इमं पिण्डं ददाम्यहम् ॥ (११।२)

अन्येषां यातनास्थानां प्रेतलोकनिवासिनाम् । (१२।१)

तेषाम् उद्धरणार्थाय इमं पिण्डं ददाम्यहम् ॥ (१२।२)

पशुयोनिं गता ये च पक्षिकीटसरीसृपाः । (१३।१)

अथवा वृक्षयोनिस्थास् तेभ्यः पिण्डं ददाम्यहम् ॥ (१३।२)

असंख्ययातनासंस्था ये नीता यमशासनैः । (१४।१)

तेषाम् उद्धरणार्थाय इमं पिण्डं ददाम्यहम् ॥ (१४।२)

जात्यन्तरसहस्रेषु भ्रमन्ति स्वेन कर्मणा । (१५।१)

मानुष्यं दुर्लभं येषां तेभ्यः पिण्डं ददाम्यहम् ॥ (१५।२)

ये बान्धवाबान्धवा वा ये ऽन्यजन्मनि बान्धवाः । (१६।१)

ते सर्वे तृप्तिमायान्तु पिण्डदानेन सर्वदा ॥ (१६।२)

ये केचित्प्रेतरूपेण वर्तन्ते पितरो मम । (१७।१)

ते सर्वे तृप्तिमायान्तु पिण्डदानेन सर्वदा ॥ (१७।२)

ये मे पितृकुले जाताः कुले मातुस्तथैव च । (१८।१)

गुरुश्वशुरबन्धूनां ये चान्ये बान्धवा मृताः ॥ (१८।२)

ये मे कुले लुप्तपिण्डाः पुत्त्रदारविवर्जिताः । (१९।१)

क्रियालोपहता ये च जात्यन्धाः पङ्गवस्तथा ॥ (१९।२)

विरूपा आमगर्भाश्च ज्ञाताज्ञाताः कुले मम । (२०।१)

तेषां पिण्डं मया दत्तमक्षय्यमुपतिष्ठताम् ॥ (२०।२)

साक्षिणः सन्तु मे देवा ब्रह्मेशानादयस्तथा । (२१।१)

मया गयां समासाद्य पितॄणां निष्कृतिः कृता ॥ (२१।२)

आगतो ऽहं गयां देव पितृकार्ये गदाधर । (२२।१)

तन्मे साक्षी भवत्वद्य अनृणो ऽहमृणत्रयात् ॥ (२२।२)

महानदी ब्रह्मसरो ऽक्षयो वटः प्रभासम् उद्यन्तमहो गयाशिरः । (२३।१)

सरस्वतीधर्मकधेनुपृष्ठा एते कुरुक्षेत्रगता गयायाम् ॥ (२३।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे गयामाहात्म्यं नाम पञ्चाशीतितमो ऽध्यायः ॥ (२४।१)