सूत उवाच । (१।१)

गरुडोक्तं कश्यपाय वक्ष्ये मृत्युञ्जयार्चनम् । (१।२)

उद्धारपूर्वकं पुण्यं सर्वदेवमयं मतम् ॥ (१।३)

ओङ्कारं पूर्वमुद्धृत्य जुंकारं तदनन्तरम् । (२।१)

सविसर्गं तृतीयं स्यान् मृत्युदारिद्र्यमर्दनम् ॥ (२।२)

ईशविष्ण्वर्कदेव्यादिकवचं सर्वसाधकम् । (३।१)

अमृतेशं महामन्त्रन्त्र्यक्षरं पूजनं समम् । (३।२)

जपनान्मृत्युहीनाः स्युः सर्वपापविवर्जिताः ॥ (३।३)

शतजप्याद् वेदफलं यज्ञतीर्थफलं लभेत् । (४।१)

अष्टोत्तरशताज्जाप्यात् त्रिसन्ध्यं मृत्युशत्रुजित ॥ (४।२)

ध्यायेच्च सितपद्मस्थं वरदं चाभयंकरे । (५।१)

द्वाभ्यां चामृतकुम्भं तु चिन्तयेदमृतेश्वरम् ॥ (५।२)

तस्यैवाङ्गगतां देवीममृतामृतभाषिणीम् । (६।१)

कलशं दक्षिणे हस्ते वामहस्ते सरोरुहम् ॥ (६।२)

जपेदष्टसहस्रं वै त्रिसन्ध्यं मासमेकतः । (७।१)

आह्वानं स्थापनं रोधं सन्निधानं निवेशनम् । (८।१)

पाद्यम् आचमनं स्नानमर्घ्यं स्रगनुलेपनम् ॥ (८।२)

दीपांबरं भूषणं च नैवेद्यं पानवीजनम् । (९।१)

मात्रामुद्राजपध्यानं दक्षिणा चाहुतिः स्तुतिः ॥ (९।२)

वाद्यं गतिं च नृत्यं च न्यासयोगं प्रदक्षिणम् । (१०।१)

प्रणतिर्मन्त्रशय्या च वन्दनं च विसर्जनम् ॥ (१०।२)

षडङ्गादिप्रकारेण पूजनं तु क्रमोदितम् । (११।१)

परमेशमुखोदीरितं यो जानाति स पूजकः ॥ (११।२)

अर्घ्यपात्रार्चनं चादावस्त्रेणैव तु ताडनम् । (१२।१)

शोधनं कवचेनैव अमृतीकरणं ततः ॥ (१२।२)

पूजा चाधारशक्त्यादेः प्राणायामं तथासने । (१३।१)

पीठशुद्धिं ततः कुर्याच्छोषणाद्यैस्ततः स्मरेत् ॥ (१३।२)

आत्मानं देवरूपं च कराङ्गन्यासकं चरेत् । (१४।१)

आत्मानं पूजयेत् पश्चाज् ज्योतीरूपं हृदब्जतः ॥ (१४।२)

मूर्तौ वा स्थण्डिले वापि क्षिपेत्पुष्पं तु भास्वरम् । (१५।१)

आह्वानद्वारपूजार्थं पूजा चाधारशक्तितः ॥ (१५।२)

सान्निध्यकरणं देवे परिवारस्य पूजनम् । (१६।१)

अङ्गषट्कस्य पूजा वै कर्तव्या च विपश्चितैः ॥ (१६।२)

धर्मादयश्च शक्राद्याः सायुधाः परिवारकाः । (१७।१)

युगवेदमुहूर्ताश्च पूजेयं भुक्तिमुक्तिकृत् ॥ (१७।२)

मातृकाश्च गणांश्चादौ नन्दिगङ्गे च पूजयेत् । (१८।१)

महाकालं च यमनां देहल्यां पूजयेत्पुरा ॥ (१८।२)

ॐ अमृतेश्वर ॐ भैरवाय नमः । (१९।१)

एवं ॐ जुं हंसः सूर्याय नमः ॥ (१९।२)

एवं शिवाय कृष्णाय ब्रह्मणे च गणाय च । (२०।१)

चण्डिकायै सरस्वत्यै महालक्ष्मादि पूजयेत् ॥ (२०।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे ऽमृतेशमृत्युञ्जयपूजनं नामाष्टादशो ऽध्यायः ॥ (२१।१)