हरिरुवाच । (१।१)

नरस्त्रीलक्षणं वक्ष्ये संक्षेपाच्छृणु शङ्कर । (१।२)

अस्वेदिनौ मृदुतलौ कमलोदरसन्निभौ ॥ (१।३)

श्लिष्टाङ्गुली ताम्रनखौ सुगुल्फौ सिरयोज्झितौ । (२।१)

कूर्मोन्नतौ च चरणौ स्यातां नृपवरस्य हि ॥ (२।२)

विरूक्षपाण्डुरनखौ वक्रौ चैव शिरानतौ । (३।१)

सूर्पाकारौ च चरणौ संखुष्कौ विरलाङ्गुली ॥ (३।२)

दुःखदारिद्र्यदौ स्यातां नात्र कार्यां विचारणा । (४।१)

अल्परोमयुता श्रेष्ठा जङ्घा हस्तिकरोपमा ॥ (४।२)

रोमैकैकं कूपके स्याद्भूपानां तु महात्मनाम् । (५।१)

द्वे द्वे रोम्णी पण्डितानां श्रोत्रियाणां तथैव च ॥ (५।२)

रोमत्रयं दरिद्राणां रोगी निर्मांसजानुकः । (६।१)

अल्पलिङ्गी च धनवान्स्याच्च पुत्रादिवर्जितः ॥ (६।२)

स्थूललिङ्गो दरिद्रः स्याद् दुःख्येकवृष्णी भवेत् । (७।१)

विषमे स्त्रीचञ्चलो वै नृपः स्याद्वृषणे समे ॥ (७।२)

प्रलम्बवृषणो ऽल्पायुर्निर्द्रव्यः कुमणिर् भवेत् । (८।१)

पाण्डुरैर्मलिनैश्चैव मणिभिश्च सुखी नरः ॥ (८।२)

निःस्वाः सशब्दमूत्राः स्युर्नृपा निःशब्दधारया । (९।१)

भोगाढ्याः समजठरा निःस्वाः स्युर्घटसन्निभाः ॥ (९।२)

सर्पोदरा दरिद्राः स्यू रेखाभिश्चायुरुच्यते । (१०।१)

ललाटे यस्य दृश्यन्ते तिस्रो रेखाः समाहिताः ॥ (१०।२)

सुखी पुत्रसमायुक्तः स षष्टिं जीवते नरः । (११।१)

चत्वारिंशच्च वर्षाणि द्विरेखादर्शनान् नरः ॥ (११।२)

विंशत्यब्दं त्वेकरेखा आकर्णान्ताः शतायुषः ॥ (१२।१)

सप्तत्यायुर्द्विरेखा तु षष्ट्यायुस्तिसृभिर्भवेत् । (१३।१)

व्यक्ताव्यक्ताभी रेखाभिर्विंशत्यायुर्भवेन्नरः ॥ (१३।२)

चत्वारिंशच्च वर्षाणि हीनरेखस्तु जीवति । (१४।१)

भिन्नाभिश्चैव रेखाभिरपमृत्युर्नरस्य हि ॥ (१४।२)

त्रिशूलं पट्टिशं वापि ललाटे यस्य दृश्यते । (१५।१)

धनपुत्रसमायुक्तः स जीवेच्छरदः शतम् ॥ (१५।२)

तर्जन्या मध्यमाङ्गुल्या आयूरेखा तु मध्यतः । (१६।१)

सम्प्राप्ता या भवेद्रुद्र स जीवेच्छरदः शतम् ॥ (१६।२)

प्रथमा ज्ञानरेखा तु ह्यङ्गुष्ठादनुवर्तते । (१७।१)

मध्यमामूलगा रेखा आयूरेखा अतः परम् ॥ (१७।२)

कनिष्ठिकां समाश्रित्य आयूरेखा समाविशेत् । (१८।१)

अच्छिन्ना वा विभक्ता वा स जीवेच्छरदः शतम् ॥ (१८।२)

यस्य पाणितले रेखा आयुस्तस्य प्रकाशयेत् । (१९।१)

शतवर्षाणि जीवेच्च भोगी रुद्र न संशयः ॥ (१९।२)

कनिष्ठिकां समाश्रित्य मध्यमायामुपागता । (२०।१)

षष्टिवर्षायुषं कुर्याद् आयूरेखा तु मानवम् ॥ (२०।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे ज्योतिःशास्त्रे सामुद्रिके पुंल्लक्षणनिरूपणं नाम त्रिषष्टितमो ऽध्यायः ॥ (२१।१)