सूत उवाच । (१।१)

शिवार्चनं प्रवक्ष्यामि भुक्तिमुक्तिकरं परम् । (१।२)

शान्तं सर्वगतं शून्यं मात्राद्वादशके स्थितम् ॥ (१।३)

पञ्च वक्त्राणि ह्रस्वानि दीर्घाण्यङ्गानि बिन्दुना । (२।१)

सविसर्गं वदेदस्त्रं शिव ऊर्ध्वं तथा पुनः ॥ (२।२)

षष्ठेनाधो महामन्त्रो हौमित्येवाखिलार्थदः । (३।१)

हस्ताभ्यां संस्पृशेत् पादाव् ऊर्ध्वं पादान्मस्तकम् ॥ (३।२)

महामुद्रा हि सर्वेषां कराङ्गन्यासमाचरेत् । (४।१)

तालहस्तेन पृष्ठं च अस्त्रमन्त्रेण शोधयेत् ॥ (४।२)

कनिष्ठामादितः कृत्वा तर्जन्यङ्गानि विन्यसेत् । (५।१)

पूजनं सम्प्रवक्ष्यामि कर्णिकायां हृदम्बुजे ॥ (५।२)

धर्मं ज्ञानं च वैराग्यमैश्वर्यादि हृदार्चयेत् । (६।१)

आवाहनं स्थापनं च पाद्यमर्घ्यं हृदार्पयेत् ॥ (६।२)

आचामं स्नपनं पूजाम् एकाधारणतुल्यकम् । (७।१)

अग्निकार्यविधिं वक्ष्ये अस्त्रेणोल्लेखनं चरेत् ॥ (७।२)

वर्मणाभ्युक्षणं कार्यं शक्तिन्यासं हृदा चरेत् । (८।१)

हृदि वा शक्तिगर्ते च प्रक्षिपेज्जातवेदसम् ॥ (८।२)

गर्भाधानादिकं कृत्वा निष्कृतिं चारस्य पश्चिमाम् । (९।१)

हृदा कृत्वा सर्वकर्म शिवं साङ्गं तु होमयेत् ॥ (९।२)

पूजयेन्मण्डले शम्भुं पद्मगर्भे गराङ्कितम् । (१०।१)

चतुःषष्ट्यन्तम् अष्टादि खाक्षि खाद्य् आदिमण्डलम् ॥ (१०।२)

खाक्षीन्द्रसूर्यगं सर्वखादिवेदेन्दु वर्तनम् । (११।१)

आग्नेय्यां कारयेत् कुण्डम् अर्धचन्द्रनिभं शुभम् ॥ (११।२)

अग्निशास्त्रपरायुस्थो हृदयादिगणोच्यते । (१२।१)

अस्त्रं दिशा सुपद्मस्य कर्णिकायां सदाशिवः ॥ (१२।२)

दीक्षां वक्ष्ये पञ्चतत्त्वे स्थितां भूम्यादिकां परे । (१३।१)

निवृत्तिर्भूप्रतिष्ठाद्यैर्विद्याग्निः शान्तिवन्निजः ॥ (१३।२)

शान्त्यतीतं भवेद् व्योम तत्परं शान्तमव्ययम् । (१४।१)

एकैकस्य शतं होमा हत्येवं पञ्च होमयेत् ॥ (१४।२)

पश्चात्पूर्णाहुतिं दत्त्वा प्रासोदन शिवं स्मरेत् । (१५।१)

प्रायश्चित्तविशुद्ध्यर्थम् एकैकाष्टाहुतिं क्रमात् ॥ (१५।२)

होमयेदस्त्रबीजेन एवं दीक्षां समापयेत् । (१६।१)

यजनव्यतिरेकेण गोप्यं संस्कारमुत्तमम् ॥ (१६।२)

एवं संस्कारशुद्धस्य शिवत्वं जायते ध्रुवम् ॥ (१७।१)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे शिवार्चनप्रकारो नाम द्वाविंशो ऽध्यायः ॥ (१८।१)