हरिरुवाच । (१।१)

राज्ञां वंशान्प्रवक्ष्यामि वंशानुचरितानि च । (१।२)

विष्णुनाभ्यब्जतो ब्रह्मा दक्षो ऽङ्गुष्ठाच्च तस्य वै ॥ (१।३)

ततो ऽपितर् विवस्वांश्च ततः सूनुर्विवस्वतः । (२।१)

मनुरिक्ष्वाकुशर्याती नृगो धृष्टः प्रषध्रकः ॥ (२।२)

नरिष्यन्तश्च नाभागो दिष्टः शशक एव च । (३।१)

मनोरासीदिला कन्या सुद्युम्नो ऽस्य सुतो ऽभवत् ॥ (३।२)

इलायां तु बुधाज्जातो राजा रुद्र पुरूरवाः । (४।१)

सुतास्त्रयश्च सुद्युम्नादुत्कलो विनतो गयः ॥ (४।२)

अभृच्छ्रद्रो गोवधात्तु पृषध्रस्तु मनोः सुतः । (५।१)

करूषात्क्षत्त्रिया जाताः कारूषा इति विश्रुताः ॥ (५।२)

दिष्टपुत्रस्तु नाभागो वैश्यातामगमत्स च । (६।१)

तस्माद्भलन्दनः पुत्रो वत्सप्रीतिर् भलन्दनात् ॥ (६।२)

ततः पांशुः खनित्रो ऽभूद्भूपस्तस्मात्ततः क्षुपः । (७।१)

क्षुपाद् विंशो ऽभवत्पुत्रो विंशाज्जातो विविंशकः ॥ (७।२)

विविंशाच्च खनीनेत्रो विभूतिस्तत्सुतः स्मृतः । (८।१)

करन्धमो विभूतेस्तु ततो जातो ऽप्यविक्षितः ॥ (८।२)

मरुत्तो ऽविक्षितस्यापि नरिष्यन्तस्ततः स्मृतः । (९।१)

नरिष्यन्तात्तमो जातस्ततो ऽभूद् राजवर्धनः ॥ (९।२)

राजवर्धात् सुधृतिश्च नरो ऽभूत्सुधृतेः सुतः । (१०।१)

नराच्च केवलः पुत्रः केवलाद्धुन्धुमानपि ॥ (१०।२)

धुन्धुमतो वेगवांश्च बुधो वेगवतः सुतः । (११।१)

तृणबिन्दुर्बुधाज्जातः कान्या चैलविला तथा ॥ (११।२)

विशालं जनयामास तृणबिन्दोस्त्वलम्बुसा । (१२।१)

विशालाद्धेमचन्द्रो ऽभूद्धेमचन्द्राच्च चन्द्रकः ॥ (१२।२)

धूम्राश्वश्चैव चन्द्रात्तु धूम्राश्वात्सृञ्जयस्तथा । (१३।१)

सञ्जयात् सहदेवो ऽभूत्कृशाश्वस्तत्सुतो ऽभवत् ॥ (१३।२)

कृशाश्वात्सोमदत्तस्तुततो ऽभूज्जनमेजयः । (१४।१)

तत्पुत्रश्च सुमन्तिश्च एते वैशालका नृपाः ॥ (१४।२)

शर्यातेस्तु सुकन्याभूत् सा भार्या च्यवनस्य तु । (१५।१)

अनन्तो नाम शर्यातेर् अनन्ताद् रेवतो ऽभवत् ॥ (१५।२)

रैवतो रेवतस्यापि रैवताद्रेवती सुता । (१६।१)

धृष्टस्य धार्ष्टर्कं क्षेत्रं वैष्णवं तद् बभूव ह ॥ (१६।२)

नाभागपुत्रो नेष्ठो ह्यम्बरीषो ऽपि तत्सुतः । (१७।१)

अम्बरीषाद्विरूपो ऽभूत्पृषदश्वो विरूपतः ॥ (१७।२)

रथीनरश्च तत्पुत्रो वासुदेवपरायणः । (१८।१)

इक्ष्वाकोस्तु त्रयः पुत्राः विकुक्षिनिमिदण्डकाः ॥ (१८।२)

इक्ष्वाकुजो विकुक्षिस्तु शशादः शशभक्षणात् । (१९।१)

पुरञ्जयः शशादाच्च ककुत्स्थाख्यो ऽभवत्सुतः ॥ (१९।२)

अनेनास् तु ककुत्स्थाच्च पृथुः पुत्रस् त्व् अनेनसः । (२०।१)

विश्वरातः पृथोः पुत्र आर्द्रे ऽभूद् विश्वराततः ॥ (२०।२)

युवनाश्वो ऽभवच्चार्द्राच्छावस्तो युवनाश्वतः । (२१।१)

बृहदश्वस् तु शावस्तात् तत्पुत्रः कुवलाश्वकः ॥ (२१।२)

धुन्धुमारो हि विख्यातो दृढाश्वश् च ततो ऽभवत् । (२२।१)

चन्द्राश्वः कपिलाश्वश्च हर्यश्वश्च दृढाश्वतः ॥ (२२।२)

हर्यश्वाच्च निकुम्भो ऽभूद्धिताश्वश्च निकुम्भतः । (२३।१)

पूजाश्वश्च हिताश्वाच्च तत्सुतो युवनाश्वकः ॥ (२३।२)

युवनाश्वाच्च मान्धाता बिन्दुमत्यास्ततो ऽभवत् । (२४।१)

मुचुकुन्दो ऽम्बरीषश्च पुरुकुत्सस्त्रयः सुताः ॥ (२४।२)

पञ्चाशत्कन्यकाश्चैव भार्यास्ताः सौभरेर्मुनेः । (२५।१)

युवनाश्वो ऽम्बरीषाच्च हरितो युवनाश्वतः ॥ (२५।२)

पुरुकुत्सान्नर्मदायां त्रसदस्युर् अभूत् सुतः । (२६।१)

अनरण्यस्ततो जातो हर्यश्वो ऽप्यनरण्यतः ॥ (२६।२)

तत्पुत्रो ऽभूद्वसुमनास्त्रिधन्वा तस्य चात्मजः । (२७।१)

त्रय्यारुणस्तस्य पुत्रस् तस्त सत्यरतः सुतः ॥ (२७।२)

यस्त्रिशङ्कुः समाख्यातो हरिश्चन्द्रो ऽभवत्ततः । (२८।१)

हरिश्चन्द्राद्रोहिताश्वो हरितो रोहिताश्वतः ॥ (२८।२)

हरितस्य सुतश्चञ्चुश्चञ्चोश्च विजयः सुतः । (२९।१)

विजयाद्रुरुको जज्ञे रुरुकात्तु वृकः सुतः ॥ (२९।२)

वृकाद्बाहुर्नृपो ऽभूच्च बाहोस्तु सगरः स्मृतः । (३०।१)

षष्टिः पुत्रसहस्राणि सुमत्यां सगराद्धर ॥ (३०।२)

केशिन्यामेक एवासावसमञ्जससंज्ञकः ॥ (३१।१)

तस्यांशुमान्सुतो विद्वान्दिलीपस्तत्सुतो ऽभवत् । (३२।१)

भगीरथो दिलीपाच्च यो गङ्गामानयद्भुवम् ॥ (३२।२)

श्रुतो भगीरथसुतो नाभागश्च श्रुतात्किल । (३३।१)

नाभागादम्बरीषो ऽभूत् सिन्धुद्वीपो ऽम्बरीषतः ॥ (३३।२)

सिन्धुद्वीपस्यायुतायुर् ऋतुपर्णस् तदात्मजः । (३४।१)

ऋतुपर्णात् सर्वकामः सुदासो ऽभूत्तदात्मजः ॥ (३४।२)

सुदासस्य च सौदासो नाम्ना मित्रसहः स्मृतः । (३५।१)

कल्माषपादसंज्ञश्च दमयन्त्यां तदात्मजः ॥ (३५।२)

अश्वकाख्यो ऽभवत्पुत्रो ह्यश्वकान्मूलको ऽभवत् । (३६।१)

ततो दशरथो राजा तस्य चैलविलः सुतः ॥ (३६।२)

तस्य विश्वसहः पुत्रः खट्वाङ्गश्च तदात्मजः । (३७।१)

खट्वाङ्गाद् दीर्घबाहुश्च दीर्घबाहोर्ह्यजः सुतः ॥ (३७।२)

तस्य पुत्त्रो दशरथश्चत्वारस्तत्सुताः स्मृताः । (३८।१)

रामलक्ष्मणशत्रुघ्नभरताश्च महाबलाः ॥ (३८।२)

रामात्कुशलवौ जातौ भरतात्तार्क्षपुष्करौ । (३९।१)

चित्राङ्गदश्चन्द्रकेतुर्लक्ष्मणात्संबभूवतुः ॥ (३९।२)

सुबाहुशूरसेनौ च शत्रुघ्नात्संबभूवतुः । (४०।१)

कुशस्य चातिथिः पुत्रो निषधो ह्यतिथेः सुतः ॥ (४०।२)

निषधस्य नलः पुत्रो नलस्य च नभाः स्मृतः । (४१।१)

नभसः पुण्डरीकस्तु क्षेमधन्वा तदात्मजः ॥ (४१।२)

देवानीकस्तस्य पुत्रो देवानीकाद् अहीनकः । (४२।१)

अहीनकाद् रुरुर्यज्ञे पारियात्रो रुरोः सुतः ॥ (४२।२)

पारियात्राद्दलो यज्ञे दलपुत्रश्छलः स्मृतः । (४३।१)

छलादुक्थस्ततो ह्युक्थाद्वज्रनाभस्ततो गणः ॥ (४३।२)

उषिताश्वो गणाज्जज्ञे ततो विश्वसहो ऽभवत् । (४४।१)

हिरण्यनाभस्तत्पुत्रस्तत्पुत्रः पुष्पकः स्मृतः ॥ (४४।२)

ध्रुवसंधिर् अभूत् पुष्पाद्ध्रुवसन्धेः सुदर्शनः । (४५।१)

सुदर्शनादग्निवर्णः पद्मवर्णो ऽग्निवर्णतः ॥ (४५।२)

शीघ्रस्तु पद्मवर्णात्तु शीघ्रात्पुत्रो मरुस्त्वभूत् । (४६।१)

मरोः प्रसुश्रुतः पुत्रस्तस्य चोदावसुः सुतः ॥ (४६।२)

उदावसोर्नन्दिवर्धनः सुकेतुर्नन्दिवर्धनात् । (४७।१)

सुकेतोर्देवरातो ऽभूद् बृहदुक्थस्ततः सुतः ॥ (४७।२)

बृहदुक्थान्महावीर्यः सुधृतिस्तस्य चात्मजः । (४८।१)

सुधृतेर्धृष्टकेतुश्च हर्यश्वो धृष्टकेतुतः ॥ (४८।२)

हर्यश्वात्तु मरुर्जातो मरोः प्रतीन्धको ऽभवत् । (४९।१)

प्रतीन्धकात्कृतिरथो देवमीढस्तदात्मजः ॥ (४९।२)

विबुधो देवमीढात्तु विबुधात्तु महाधृतिः । (५०।१)

महाधृतेः कीर्तिरातो महारोमा तदात्मजः ॥ (५०।२)

महारोम्णः स्वर्णरोमा ह्रस्वरोमा तदात्मजः । (५१।१)

सीरध्वजो ह्रस्वरोम्णः तस्य सीताभवत्सुता ॥ (५१।२)

भ्राता कुशध्वजस्तस्य सीरध्वजात्तु भानुमान् । (५२।१)

शतद्युम्नो भानुमतः शतद्युम्नाच्छुचिः स्मृतः ॥ (५२।२)

ऊर्जनामा शुचेः पुत्रः सनद्वाजस्तदात्मजः । (५३।१)

सनद्वाजात्कुलिर्जातो ऽनञ्जनस्तु कुलेः सुतः ॥ (५३।२)

अनञ्जनाच्च कुलजित् तस्यापि चाधिनेमिकः । (५४।१)

श्रुतायुस्तस्य पुत्रो ऽभूत्सुपार्श्वश्च तदात्मजः ॥ (५४।२)

सुपार्श्वात् सृंजयो जातः क्षेमारिः सृञ्जयात्स्मृतः । (५५।१)

क्षेमारितस् त्वनेनाश्च तस्य रामरथः स्मृतः ॥ (५५।२)

सत्यरथो रामरथात् तस्माद् उपगुरुः स्मृतः । (५६।१)

उपगुरोरुपगुप्तः स्वागतश्चोपगुप्ततः ॥ (५६।२)

स्वनरः स्वागताज्जज्ञे सुवर्चास्तस्य चात्मजः । (५७।१)

सुवर्चसः सुपार्श्वस्तु सुश्रुतश्च सुपार्श्वतः ॥ (५७।२)

जयस्तु सुश्रुताज्जज्ञे जयात्तु विजयो ऽभवत् । (५८।१)

विजयस्य ऋतः पुत्रः ऋतस्य सुनयः सुतः ॥ (५८।२)

सुनयाद्वीतहव्यस्तु वीतहव्याद्धृतिः स्मृतः । (५९।१)

बहुलाश्वो धृतेः पुत्रो बहुलाश्वात्कृतिः स्मृतः ॥ (५९।२)

जनकस्य द्वये वंशे उक्तो योगसमाश्रयः ॥ (६०।१)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे सूर्यवंशवर्णनं नामाष्टत्रिंशदुत्तरशततमो ऽध्यायः ॥ (६१।१)