ब्रह्मोवाच । (१।१)

ब्रह्मन् भाद्रपदे मासि शुक्लाष्टम्यामुपोषितः । (१।२)

दूर्वां सौरीं गणेशं च फलपुष्पैः शिवं यजेत् ॥ (१।३)

फलव्रीह्यादिभिः सर्वैः शम्भवे नमः शिवाय च । (२।१)

त्वं दूर्वे ऽमृजन्मासि ह्यष्टमी सर्वकामभाक् ॥ (२।२)

अनग्निपक्वम् अश्नीयान् मुच्यते ब्रह्महत्यया । (३।१)

कृष्णाष्टम्यां च रोहिण्याम् अर्धरात्रे ऽर्चनं हरेः ॥ (३।२)

कार्या विद्धापि सप्तम्या हन्ति पापं त्रिजन्मनः । (४।१)

उपोषितो ऽर्चयेन्मन्त्रैस् तिथिभान्ते च पारणम् ॥ (४।२)

योगाय योगपतये योगेश्वराय योगसम्भवाय गोविन्दाय नमोनमः । (५।१)

यज्ञाय यज्ञेश्वराय यज्ञपतये गोविन्दाय नमोनमः ॥ (५।२)

विश्वाय विश्वेश्वराय विश्वपतये गोविन्दाय नमोनमः । (६।१)

सर्वाय सर्वेश्वराय सर्वेताय सर्वसम्भवाय गोविन्दाय नमोनमः ॥ (६।२)

स्थण्डिले पूजयेद्देवं सचन्द्रां रोहिणीं तथा । (७।१)

शङ्खे तोयं समादाय सपुष्पफलचन्दनम् ॥ (७।२)

जानुभ्यामवनीं गत्वा चन्द्रायार्घ्यं निवेदयेत् । (८।१)

क्षीरोदार्णवसम्भूत अत्रिनेत्रसमुद्भव ॥ (८।२)

गृहाणार्घ्यं शशाङ्केश रोहिण्या सहितो मम । (९।१)

श्रियै च वसुदेवाय नन्दाय च बलाय च ॥ (९।२)

यशोदायै ततो दद्यादर्घ्यं फलसमन्वितम् । (१०।१)

अनन्तं वामनं शौरिं वैकुण्ठं पुरुषोत्तमम् ॥ (१०।२)

वासुदेवं हृषीकेशं माधवं मधुसूदनम् । (११।१)

वराहं पुण्डरीकाक्षं नृसिंहं दैत्यसूदनम् ॥ (११।२)

दामोदरं पद्मनाभं केशवं गारुडध्वजम् । (१२।१)

गोविन्दमच्युतं देवम् अनन्तमपराजितम् ॥ (१२।२)

अधोक्षजं जगद्बीजं सर्गस्थित्यन्तकारणम् । (१३।१)

अनादिनिधनं विष्णुं त्रिलोकेशं त्रिविक्रमम् ॥ (१३।२)

नारायणं चतुर्बाहुं शङ्खचक्रगदाधरम् । (१४।१)

पीताम्बरधरं दिव्यं वनमालाविभूषितम् ॥ (१४।२)

श्रीवत्साङ्कं जगद्धाम श्रीपतिं श्रीधरं हरिम् । (१५।१)

यं देवं देवकी देवी वसुदेवादजीजनत् ॥ (१५।२)

भौमस्य ब्रह्मणो गुप्त्यै तस्मै ब्रह्मात्मने नमः । (१६।१)

नामान्येतानि संकीर्त्य गत्यर्थं प्रार्थयेत्पुनः ॥ (१६।२)

त्राहि मां देवदेवेश हरे संसारसागरात् । (१७।१)

त्राहि मां सर्वपापघ्न दुःखशोकार्णवात्प्रभो ॥ (१७।२)

देवकीनन्दन श्रीश हरे संसारसागरात् । (१८।१)

दुर्वृत्तांस्त्रायसे विष्णो ये स्मरन्ति सकृत्सकृत् ॥ (१८।२)

सो ऽहं देवातिदुर्वृत्तस्त्राहि मां शोकसागरात् । (१९।१)

पुष्कराक्ष निमग्नो ऽहं महत्यज्ञानसागरे ॥ (१९।२)

त्राहि मां देवदेवेश त्वामृते ऽन्यो न रक्षिता । (२०।१)

स्वजन्म वासुदेवाय गोब्राह्मणहिताय च ॥ (२०।२)

जगद्धिताय कृष्णाय गोविन्दाय नमोनमः । (२१।१)

शान्तिरस्तु शिवं चास्तु धनविख्यातिराज्यभाक् ॥ (२१।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे कृष्णाष्टमीव्रतनिरूपणं नामैकत्रिंशदुत्तरशततमो ऽध्यायः ॥ (२२।१)