सूत उवाच । (१।१)

गोपालपूजां वक्ष्यामि भुक्तिमुक्तिप्रदायिनीम् । (१।२)

द्वारे धाता विधाता च गङ्गायमुनया सह ॥ (१।३)

शङ्खपद्मनिधी चैव सारङ्गः शरभः श्रिया । (२।१)

पूर्वे भद्रः सुभद्रो द्वौ दक्षे चण्डप्रचण्डकौ ॥ (२।२)

पश्चिमे बलप्रबलौ जयश्च विजयो यजेत् । (३।१)

उत्तरे श्रीश्चतुर्द्वारे गणो दुर्गा सरस्वती ॥ (३।२)

क्षेत्रस्याग्न्यादिकोणेषु दिक्षु नारदपूर्वकम् । (४।१)

सिद्धो गुरुर्नलकूबरं कोणे भगवतं यजेत् ॥ (४।२)

पूर्वे विष्णुं विष्णुतपो विष्णुशक्तिं समर्चयेत् । (५।१)

ततो विष्णुपरीवारं मध्ये शक्तिं च कूर्मकम् ॥ (५।२)

अनन्तं पृथिवीं धर्मं ज्ञानं वैराग्यमग्नितः । (६।१)

ऐश्वर्यं वायुपूर्वं च प्रकाशात्मानमुत्तरे ॥ (६।२)

सत्त्वाय प्रकृतात्मने रजसे मोहरूपिणे । (७।१)

तमसे कन्दपद्माय यजेत् कं काकतत्त्वकम् ॥ (७।२)

विद्यातत्त्वं परं तत्त्वं सूर्येन्दुवह्निमण्डलम् । (८।१)

विमलाद्या आसनं च प्राच्यां श्रीं ह्रीं प्रपूजयेत् ॥ (८।२)

गोपीजनवल्लभाय स्वाहान्तो मनुरुच्यते । (९।१)

अङ्गानि यथा चक्रं च सुचक्रं च विचक्रं च तथैच ॥ (९।२)

त्रैलोक्यरक्षकं चक्रम् असुरारिसुदर्शनम् । (१०।१)

हृदादिपूर्वकोणेषु अस्त्रं शक्तिं च पूर्वतः ॥ (१०।२)

रुक्मिणी सत्यभामा च सुनन्दा नाग्नजित्यपि । (११।१)

लक्ष्मणा मित्रविन्दा च जाम्बवत्या सुशीलया ॥ (११।२)

शङ्खचक्रगदापद्मं मुसलं शार्ङ्गमर्चयेत् । (१२।१)

खड्गं पाशाङ्कुशं प्राच्यां श्रीवत्सं कौस्तुभं यजेत् ॥ (१२।२)

मुकुटं वलमालां च ऐन्द्राद्यान्ध्वजमुख्यकान् । (१३।१)

कुमुदाद्यान्विष्वक्सेनं श्रिया कृष्णं सहार्चयेत् । (१३।२)

जप्याद्ध्यानात्पूजनाच्च सर्वान्कामान् अवाप्नुयात् । (१३।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे श्रीगोपालपूजानिरूपणं नामाष्टाविंशो ऽध्यायः ॥ (१३।४)