ब्रह्मोवाच । (१।१)

एवं भाद्रपदे मासि कार्तिकेयं प्रपूजयेत् । (१।२)

स्नानदानादिकं सर्वमस्यामक्षय्यमुच्यते ॥ (१।३)

सप्तम्यां प्राशयेच्चापि भोज्यं विप्रान्रविं यजेत् । (२।१)

ॐ खखोल्कायामृतत्वं प्रियसङ्गमो भव सदा स्वाहा ॥ (२।२)

अष्टम्यां पारणं कुर्यान्मरीचं प्राश्य स्वर्गभाक् । (३।१)

सप्तम्यां नियतः स्नात्वा पूजयित्वा दिवाकरम् ॥ (३।२)

दद्यात्फलानि विप्रेभ्यो मार्तण्डः प्रीयतामिति । (४।१)

खर्जूरं नारिकेलं वा प्राशयेन्मातुलुङ्गकम् ॥ (४।२)

सर्वे भवन्तु सफला मम कामाः समन्ततः । (५।१)

सम्पूज्य देवं सप्तम्यां पायसेनाथ भोजयेत् ॥ (५।२)

विप्रांश्च दक्षिणां दत्त्वा स्वयं चाथ पयः पिबेत् । (६।१)

भक्ष्यं चोष्यं तथा लेह्यं ओदनं चेति कीर्तितम् ॥ (६।२)

धनपुत्रादिकामस्तु त्यजेद् एतद् अनोदनः । (७।१)

वाय्वाशी विजयेत्क्षुच्च कुर्याद्विजयसप्तमीम् । (७।२)

अद्यादर्कं च कामेच्छुरुपवासे तरेन्मदम् ॥ (७।३)

गोधूममाषयवषष्टिककांस्यपात्रं पाषाणपिष्टमधुमैषुनमद्यमांसम् । (८।१)

अभ्यञ्जनाञ्जनतिलांश्च विवर्जयेद्यः तस्येषितं भवति सप्तसु सप्तमीषु ॥ (८।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे सप्तमीव्रतनिरूपणं नाम त्रिंशोत्तरशततमो ऽध्यायः ॥ (९।१)