याज्ञवल्क्य उवाच । (१।१)

अथ श्राद्धविधिं वक्ष्ये सर्वपापप्रणाशनम् । (१।२)

अमावस्याष्टकावृद्धिकृष्णपक्षायनद्वयम् ॥ (१।३)

द्रव्यं ब्राह्मणसम्पत्तिर्विषुवत्सूर्यसंक्रमः । (२।१)

व्यतीपातो गजच्छाया ग्रहणं चन्द्रसूर्ययोः ॥ (२।२)

श्राद्धं प्रतिरुचिश्चैव श्राद्धकालाः प्रकीर्तिताः । (३।१)

अग्नियः सर्वदेवेषु श्रोत्रियो वेदविद्युवा ॥ (३।२)

वेदार्थविज् ज्येष्ठसामा त्रिमधुस्त्रिसुपर्णिकः । (४।१)

स्वस्रीय ऋत्विग् अजामातायज्यश्वशुरमातुलाः ॥ (४।२)

त्रिणाचिकेतदौहित्रशिष्यसम्बन्धिबान्धवाः । (५।१)

कर्मनिष्ठास्तपोनिष्ठाः पञ्चाग्निब्रह्मचारिणः ॥ (५।२)

पितृमातृपराश्चैव ब्राह्मणाः श्राद्धदेवताः । (६।१)

रोगी हीनातिरिक्ताङ्गः काणः पौनर्भवस्तथा ॥ (६।२)

अवकीर्ण्याद यो ये च ये चाचारविवर्जिताः । (७।१)

अवैष्णवाश्च ते सर्वे न श्राद्धार्हाः कदाचन ॥ (७।२)

निमन्त्रयेच्च पूर्वेद्युर्द्विजैर्भाव्यं च संयतैः । (८।१)

आजान्तांश्चैव पूर्वाह्ने ह्यासनेषूपवेशयेत् ॥ (८।२)

युग्मान्देवे तथा पित्र्ये स्वप्रदेशेषु शक्तितः । (९।१)

द्वौ दैव प्रागुदक् पित्र्ये त्रीण्येकं चोभयोः पृथक् ॥ (९।२)

मातामहानामप्येवं तन्त्रं वा वैश्वदेविकम् । (१०।१)

हस्तप्रक्षालनं दत्त्वा विष्टरार्थे कुशानपि ॥ (१०।२)

आवाह्य तदनुज्ञातो विश्वदेवास इत्यृचा । (११।१)

यवैरन्नं विकीर्याथ भाजने सपवित्रके ॥ (११।२)

शं नो देव्या पयः क्षिप्त्वा यवो ऽसीति यवांस्तथा । (१२।१)

या दिव्या इति मन्त्रेण हस्तेष्वेव विनिष्क्षिपेत् ॥ (१२।२)

गन्धोदके तथा दीपमाल्यदामप्रदीपकम् । (१३।१)

अपसव्यं ततः कृत्वा पितॄणामप्रदक्षिणम् ॥ (१३।२)

द्विगुणांस्तु कुशान्दत्त्वा उशन्तस्त्वेत्यृचा पितॄन् । (१४।१)

आवाह्य तदनुज्ञातो जपेद् आयन् तु नस् ततः ॥ (१४।२)

यवार्थस्तु तिलैः कार्यः कुर्यादर्घ्यादि पूर्ववत् । (१५।१)

दत्त्वार्घ्यं संस्रवांस्तेषां पात्रे कृत्वा विधानतः ॥ (१५।२)

पितृभ्यः स्थानमसीति न्युब्जं पात्रं करोत्यधः । (१६।१)

अग्नौ करिष्य आदाय पृच्छत्यन्नं घृप्लुतम् ॥ (१६।२)

कुरुष्वेति तथोक्तो ऽसौ हुत्वाग्नौ पितृयज्ञवत् । (१७।१)

हुतशेषं प्रदद्याच्च भाजनेषु समाहितः ॥ (१७।२)

यथालाभोपपन्नेषु रौप्येषु च विशेषतः । (१८।१)

दत्त्वान्नं पृथिवीपात्रमिति पात्राभिमन्त्रणम् ॥ (१८।२)

कृत्वेदं विष्णुर् इत्येवं द्विजाङ्गुष्ठं निवेशयेत् । (१९।१)

सव्याहृतिं च गायत्त्रीं मधुवातेत्य् ऋचस्तथा ॥ (१९।२)

जप्त्वा यथासुखं वाच्यं भुञ्जीरंस्ते ऽपि वाग्यताः । (२०।१)

अन्नमिष्टं हविष्यं च दद्याद् अक्रोधनोत्वरः ॥ (२०।२)

आ तृप्तेस्तु पवित्राणि जप्त्वा पूर्वजपं तथा । (२१।१)

अन्नमादाय तृप्ताः स्थः शेषं चैवानुमन्त्र्य च ॥ (२१।२)

तदन्नं विकिरेद्भूमौ दद्याच्चापः सकृत्सकृत् । (२२।१)

सर्वमन्नमुपादाय सतिलं दक्षिणामुखः ॥ (२२।२)

उच्छिष्टसन्निधौ पिण्डान्प्रदद्यात् पितृयज्ञवत् । (२३।१)

मातामहानाम् अप्येवं दद्यादाचमनं ततः ॥ (२३।२)

स्वस्ति वाच्यं ततो दद्यादक्षय्योदकमेव च । (२४।१)

दत्त्वा च दक्षिणां शक्त्या स्वधाकारमुदाहरेत् ॥ (२४।२)

वाच्यतामिन्यनुज्ञातः पितृभ्यश्च स्वधोच्यताम् । (२५।१)

विप्रैरस्तु स्वधेत्युक्तो भूमौ सिञ्चेत्ततो जलम् ॥ (२५।२)

प्रीयन्तामिति चाहैवं विश्वेदेव्यं जलं ददत् । (२६।१)

दातारो नो ऽभिवर्धन्तां वेदाः सन्ततिरेव च ॥ (२६।२)

श्रद्धा च नो मा व्यगमद् बहु देयं च नो ऽस्त्विति । (२७।१)

इत्य् उत्क्रोत्क्रा प्रिया वाचः प्रणिपत्य विसर्जयेत् ॥ (२७।२)

वाजे वाजे इति प्रीत्या पितृपूर्वं विसर्जनम् । (२८।१)

यस्मिंस्ते संस्रवाः पूर्वमर्घ्यपात्रे निपातिताः ॥ (२८।२)

पितृपात्रं तदुत्तानं कृत्वा विप्रान्विसर्जयेत् । (२९।१)

प्रदक्षिणमनुव्रज्य भुञ्जीत पितृसेवितम् ॥ (२९।२)

ब्रह्मचारी भवेत्तां तु रजनीं भार्यया सह । (३०।१)

एवं प्रदक्षिणं कृत्वा वृद्धौ नान्दीमुखानपि ॥ (३०।२)

यजेत् तदधि कर्कन्धूमिश्राः पिण्डा यैवः श्रिताः । (३१।१)

एकोद्दिष्टं दैवहीनं एकान्नैकपवित्रकम् ॥ (३१।२)

आवाहनाग्नौकरणरहितं त्वपसव्यवत् । (३२।१)

उपतिष्ठतामित्यक्षय्यस्थाने विप्रान्विसर्जयेत् ॥ (३२।२)

अभिरण्यतां प्रबूयाद् ब्रुयुस्तेभिरताः स्म ह । (३३।१)

गन्धो दकतिलैर् मिश्रं कुर्यात्पात्रचतुष्टयम् ॥ (३३।२)

अर्घ्यार्थं पितृपात्रेषु प्रेतपात्रं प्रसेचयेत् । (३४।१)

येसमाना इति द्वाभ्यां शेषं पूर्ववदाचरेत् ॥ (३४।२)

एतत्सपिण्डीकरणमेकोद्दिष्टं स्त्रिया अपि । (३५।१)

अर्वाक् सपिण्डीकरणं यस्य संवत्सराद्भवेत् ॥ (३५।२)

तस्याप्यन्नं सोदकुम्भं दद्यात्संवत्सरं द्विजः । (३६।१)

पिण्डांश्च गोज विप्रेभ्यो दद्यादग्नौ जले ऽपि वा ॥ (३६।२)

हविष्यान्नेन वै मासं पायसेन तु वत्सरम् । (३७।१)

मात्स्यहारिणकौरभ्रशाकुनच्छागपार्षतैः ॥ (३७।२)

ऐणरौरववाराहशाशमांसैर् यथाक्रमम् । (३८।१)

मासवृद्ध्यापि तुष्यन्ति दत्तैरिह पितामहाः ॥ (३८।२)

दद्याद्वर्षात्रयोदश्यां मघासु च न संशयः । (३९।१)

प्रतिपत्प्रभृतिष्वेवं कन्यादीञ्छ्राद्धदो लभेत् ॥ (३९।२)

शस्त्रेण निहतानां तु चतुर्दश्यां प्रदीयते । (४०।१)

स्वर्गं ह्यपत्यमोजश्च शौर्यं क्षेत्रं बलं तथा ॥ (४०।२)

पुत्रश्रैष्ठ्यं स सौभाग्यं समृद्धिं मुख्यतां शुभम् । (४१।१)

प्रवृत्तचक्रतां चैव वाणिज्यप्रभृतींस्तथा ॥ (४१।२)

अरोगित्वं यशो वीतशोकतां परमां गतिम् । (४२।१)

धनं विद्यां च वाक्सिद्धिं कुप्यं गोऽजाविकं तथा ॥ (४२।२)

अश्वानायुश्च विधिवद्यः श्राद्धं सम्प्रयच्छति । (४३।१)

कृत्तिकादिभरण्यन्तं स कामान्प्राप्नुयादिमान् ॥ (४३।२)

वस्त्राद्याः प्रीणयन्त्येव नरं श्राद्धकृतं द्विजाः । (४४।१)

आयुः प्रजा धनं विद्यां स्वर्गमोक्षसुखानि च ॥ (४४।२)

प्रयच्छति यथा राज्यं प्रीत्या नित्यं पितामहः ॥ (४५।१)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तश्राद्धविधिनिरूपणं नाम नवनवतितमो ऽध्यायः ॥ (४६।१)