सूत उवाच । (१।१)

एवं ब्रह्माब्रवीच्छ्रुत्वा हरेरष्टनिधींस्तथा । (१।२)

तत्र पद्ममहापद्मौ तथा मकरकच्छपौ ॥ (१।३)

मुकुन्दकुन्दौ नीलश्च शङ्खश्चैवापरो निधिः । (२।१)

सत्यामृद्धौ भवन्त्येते स्वरूपं कथयाम्यहम् ॥ (२।२)

पद्मेन लक्षितश्चैव सात्त्विको जायते नरः । (३।१)

दाक्षिण्यसारः पुरुषः सुवर्णादिकसंग्रहम् ॥ (३।२)

रूप्यादि कुर्याद्दद्यात्तु यतिदैवादियज्वनाम् । (४।१)

महापद्माङ्कितो दद्याद्धनाद्यं धार्मिकाय च ॥ (४।२)

निधी पद्ममहापद्मौ सात्त्विकौ पुरुषौ स्मृती । (५।१)

मकरेणाङ्कितः खड्गबाणकुन्तादिसंग्रही ॥ (५।२)

दद्याच्छ्रुताय मैत्रीं च याति नित्यं च राजभिः । (६।१)

द्रव्यार्थं शत्रुणा नाशं संग्रामे चापि संव्रजेत् ॥ (६।२)

मकरः कच्छपश्चैव तामसौ तु निधी स्मृतौ । (७।१)

कच्छपी विश्वसेन्नैव न भुङ्केन ददाति च ॥ (७।२)

निधानमुर्व्यां कुरुते निधिः सो ऽप्येकपूरुषः । (८।१)

राजसेनमुकुन्देन लक्षिता राज्यसंग्रही ॥ (८।२)

भुक्तभोगो गायनेभ्यो दद्याद्वेश्यादिकासु च । (९।१)

रजस्तमोमयो नन्दी आधारः स्यात्कुलस्य च ॥ (९।२)

स्तुतः प्रीतो भवति वै बहुभार्या भवन्ति च । (१०।१)

पूर्वमित्रेषु शैथिल्यं प्रीतिमन्यैः करोति च ॥ (१०।२)

नीलेन चाङ्कितः सत्त्वतेजसा संयुतो भवेत् । (११।१)

वस्त्रधान्यादिसंग्राही तडागादि करोति च ॥ (११।२)

त्रिपूरुषो निधिश्चैव आम्रारामादि कारयेत् । (१२।१)

एकस्य स्यान्निधिः शङ्खः स्वयं भुङ्क्ते धनादिकम् ॥ (१२।२)

कदन्नभुक्परिजनो न च शोभनवस्त्रधृक् । (१३।१)

स्वपोषणपरः शङ्खी दद्यात्परनरे वृथा ॥ (१३।२)

मिश्रावलोकनान् मिश्रस्वभावफलदायिनः । (१४।१)

निधीनां रूपमुक्तं तु हरिणापि हरादिके । (१४।२)

हरिर्भुवनकोशादि यथोवाच तथा वदे ॥ (१४।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे नवनिधिवर्णनं नाम त्रिपञ्चाशत्तमो ऽध्यायः ॥ (१५।१)