हरिरुवाच । (१।१)

चतुर्दश मनून्वक्ष्ये तत्सुताश्च सुकादिकान् । (१।२)

मनुः स्वायम्भुवः पूर्वम् अग्निघ्राद्याश्च तत्सुताः ॥ (१।३)

मरीचिरत्र्यङ्गिरसौ पुलस्त्यः पुलहः क्रतुः । (२।१)

वसिष्ठश्च महातेजा ऋषयः सप्त कीर्तिताः ॥ (२।२)

जयाख्याशाचमिताख्याश्च शुक्रा यामास्तथैव च । (३।१)

गणा द्वादशकाश्चेति चत्वारः सोमपायिनः ॥ (३।२)

विश्वभुग्वामदेवेन्द्रो बाष्कलिस्तदरिर्ह्यभूत् । (४।१)

स हतो विष्णुना दैत्यश्चक्रेण सुमहात्मना ॥ (४।२)

मनुः स्वारोचिषश्चाथ तत्पुत्रो मण्डलेश्वरः । (५।१)

चित्रको विनतश्चैव कर्णान्तो विद्युतो रविः ॥ (५।२)

बृहद्गुणो नभश्चैव महाबलपराक्रमः । (६।१)

ऊर्जस्तम्बस्तथा प्राण ऋषभो निश्चलस्तथा ॥ (६।२)

दत्तोलिश् चावरीवांश्च ऋष्यः सप्त कीर्तिताः । (७।१)

तुषिता द्वादश प्रोक्तास्तथा पारावताश्च ये ॥ (७।२)

इन्द्रो विपश्चिद्देवानां तद्रिपुः पुरुकृत्सरः । (८।१)

जघान हस्तिरूपेण भगवान्मधुसूदनः ॥ (८।२)

औत्तमस्य मनोः पुत्रा आजश्च परशुस्तथा । (९।१)

विनीतश्च सुकेतुश्च सुमित्रः सुबलः शुचिः ॥ (९।२)

देवो देवावृधो रुद्र महोत्साहो जितस्तथा । (१०।१)

रथौजा ऊर्ध्वबाहुश्च शरणश्चानघो मुनिः ॥ (१०।२)

सुतपाः शङ्कुरित्येते ऋषयः सप्त कीर्तिताः । (११।१)

वशवर्तिस्वधामानः शिवाः सत्याः प्रतर्दनाः ॥ (११।२)

पञ्च देवगणाः प्रोक्ताः सर्वे द्वादशकास्तु ते । (१२।१)

इन्द्रः स्वशान्तिस्तच्छुक्रः प्रलम्बो नाम दानवः ॥ (१२।२)

मत्स्यरूपी हरिर्विष्णुस्तं जघान च दानवम् । (१३।१)

तामसस्य मनोः पुत्रा जानुजङ्घो ऽथ निर्भयः ॥ (१३।२)

नवख्यातिर्नयश्चैव प्रियभृत्यो विविक्षिपः । (१४।१)

दृढेषुधिः प्रस्तलाक्षः कृबन्धुः कृतस्तथा ॥ (१४।२)

ज्योतिर्धामा पृथुः काव्यश्चैत्रश् चेताग्निहेमकाः । (१५।१)

मुनयः कीर्तिताः सप्त सुरागाः सुधियस्तथा ॥ (१५।२)

हरयो देवतामां च चत्वारः पञ्चविंशकाः । (१६।१)

गणा इन्द्रः शिबिस् तस्य शत्रुर् भीमरथाः स्मृताः ॥ (१६।२)

हरिणा कूर्मरूपेण हतो भीमरथो ऽसुरः । (१७।१)

रैवतस्य मनोः पुत्रो महाप्राणश्च साधकः ॥ (१७।२)

वनबन्धुर् निरमित्रः प्रत्यङ्गः परहा शुचिः । (१८।१)

दृढव्रतः केतुशृगं ऋषयस्तस्य वर्ण्यते ॥ (१८।२)

वेदश्रीर्वेदबाहुश्च ऊर्ध्वबाहुस्तथैव च । (१९।१)

हिरण्यरोमा पर्जन्यः सत्यनेत्रः स्वधाम च ॥ (१९।२)

अभूतरजसश्चैव तथा देवाश्वमेधसः । (२०।१)

वैकुण्ठश्चामृतश्चैव चत्वारो देवतागणाः ॥ (२०।२)

गणे चतुर्दश सुरा विभुर् इन्द्रः प्रतापवान् । (२१।१)

शान्तः शत्रुर्हतो दैत्यो हंसरूपेण विष्णुना ॥ (२१।२)

चाक्षुषस्य मनोः पुत्रा उरुः पुरुर्महाबलः । (२२।१)

शतद्युम्नस्तपस्वी च सत्यबाहुः कृतिस्तथा ॥ (२२।२)

अग्निष्णुर् अतिरात्रश्च सुद्युम्नश्च तथा नरः । (२३।१)

हविष्मानुत्तमः श्रीमान्स्वधामा विरजस्तथा ॥ (२३।२)

अभिमानः सहिष्णुश्च मधुश्रीर् ऋषयः स्मृताः । (२४।१)

आर्याः प्रभूता भाव्याश्च लेखाश्च पृथुकास्तथा ॥ (२४।२)

अष्टकस्य गणाः पञ्च तथा प्रोक्ता दिवौकसाम् । (२५।१)

इन्द्रो मनोजवः शत्रुर्महाकालो महाभजः ॥ (२५।२)

अश्वरूपेण स हतो हरिणा लोकधारिणा । (२६।१)

मनोर्वैवस्वतस्यैते पुत्रा विष्णुपरायणाः ॥ (२६।२)

इक्ष्वाकुरथ नाभागो धृष्टः शर्यातिरेव च । (२७।१)

नरिष्यन्तस्तथा पांसुर्नभो नेदिष्ठ एव च ॥ (२७।२)

करूषश्च पृषध्रश्च सुद्युम्नश्च मनोः सुताः । (२८।१)

अत्रिर्वसिष्ठो भगवाञ्जमदग्निश्च कश्यपः ॥ (२८।२)

गौतमश्च भरद्वाजो विश्वामित्रो ऽथ सप्तमः । (२९।१)

तथा ह्येकोनपञ्चाशन्मरुतः परिकीर्तिताः ॥ (२९।२)

आदित्या वसवः साध्यागणा द्वादशकास्त्रयः । (३०।१)

एकादशा तथा रुद्रा वसवो ऽष्टौ प्रकीर्तिताः ॥ (३०।२)

द्वावश्विनौ विनिर्दिष्टौ विश्वेदेवास्तथा दशा । (३१।१)

दशैवाङ्गिरसो देवा नव देवगणास्तथा ॥ (३१।२)

तेजस्वी नाम वै शक्रो हिरण्याक्षो रिपुः स्मृतः । (३२।१)

हतो वराहरूपेण हरिण्याख्यो ऽथ विष्णुना ॥ (३२।२)

वक्ष्ये मनोर्भविष्यस्य सावर्ण्याख्यस्य वै सुतान् । (३३।१)

विजयश् चार्ववीरश्च निर्मोहः सत्यवाक्रृती ॥ (३३।२)

वरिष्ठश्च गरिष्ठश्च वाचः संगतिरेव च । (३४।१)

अश्वत्थामा कृपो व्यासो गालवो दीप्तिमानथ ॥ (३४।२)

ऋष्यशृङ्गस्तथा राम ऋषयः सप्त कीर्तिताः । (३५।१)

सुतपा अमृताभाश्च मुख्याश्चापि तथा सुराः ॥ (३५।२)

तेषां गणस्तु देवानाम् एकैको विंशकः स्मृतः । (३६।१)

विरोचनसुतस्तेषां बलिरिन्द्रो भविष्यति ॥ (३६।२)

दत्त्वेमां याचमानाय विष्णवे यः पदत्रयम् । (३७।१)

ऋद्धिमिन्द्रपदं हित्वा ततः सिद्धिमवाप्स्यति ॥ (३७।२)

वारुणेर्दक्षसावर्णेर्नवमस्य सुताञ्छृणु । (३८।१)

धृतिकेतुर् दीप्तिकेतुः पञ्चहस्तो निरामयः । (३८।२)

पृथुश्रवा बृहद्द्युम्न ऋचीको बृहतो गुणः ॥ (३८।३)

मेधातिथिर्द्युतिश्चैव सवसो वसुरेव च । (३९।१)

ज्योतिष्मान्हव्यकव्यौ च ऋषयो विभुरीश्वरः ॥ (३९।२)

परो मरीचिर्गर्भश्च स्वधर्माणश्च ते त्रयः । (४०।१)

देशशत्रुकालकाक्षस् तद्धन्ता पद्मनाभकः ॥ (४०।२)

भविष्यन्ति तदा देवा एकैको द्वादशो गणः । (४१।१)

तेषामिन्द्रो महावीर्यो भविष्यत्यद्भुतो हर ॥ (४१।२)

धर्मपुत्रस्य पुत्रांस्तु दशमस्य मनोः शृणु । (४२।१)

सुक्षेत्रश्चोत्तमौजाश्च भूरिश्रेण्यश्च वीर्यवान् ॥ (४२।२)

शतानीको निरमित्रो वृषसेनो जयद्रथः । (४३।१)

भूरिद्युम्नः सुवर्चाश्च शान्तिरिन्द्रः प्रतापवान् ॥ (४३।२)

अयोमूर्तिर् हविष्मांश्च सुकृतिश्चाव्ययस्तथा । (४४।१)

नाभागो ऽप्रतिमौजाश्च सौरभ ऋषयस्तथा ॥ (४४।२)

प्राणाख्याः शतसंख्यास्तु देवतानां गणस्तदा । (४५।१)

तेषामिन्द्रश्च भविता शान्तिर्नाम महाबलः । (४५।२)

बलिः शत्रुस्तं हरिश्च गदया घातयिष्यति ॥ (४५।३)

रुद्रपुत्रस्य ते पुत्रान्वक्ष्याम्येकादशस्य तु । (४६।१)

सर्वत्रगः सुशर्मा च देवानीकः पुरुर्गुरुः ॥ (४६।२)

क्षेत्रवर्णो दृढेषुश्च आर्द्रकः पुत्रकस्तथा । (४७।१)

हविष्मांश्च हविष्यश्च वरुणो विश्वविस्तरौ ॥ (४७।२)

विष्णुश्चैवाग्नितेजाश्च ऋषयः सप्त कीर्तिताः । (४८।१)

विहङ्गमाः कामगम् निर्माणरुचयस्तथा ॥ (४८।२)

एकैकस्त्रिंशकस्तेषां गणश्चैन्द्रश्च वै वृषः । (४९।१)

धसग्रीवो रिपुस्तस्य श्रीरूपी घातयिष्यति ॥ (४९।२)

मनोस्तु दक्षपुत्रस्य द्वादशस्यात्मजाञ्छृणु । (५०।१)

देववानुपदेवश्च देवश्रेष्ठो विदूरथः ॥ (५०।२)

मित्रवान्मित्रदेवश्च मित्रबिन्दुश्च वीर्यवान् । (५१।१)

मित्रवाहः प्रवाहश्च दक्षपुत्रमनोः सुताः ॥ (५१।२)

तपस्वी सुतपाश्चैव तपोमूर्तिस्तपोरतिः । (५२।१)

तपोधृतिर्द्युतिश्चान्यः सप्तमश्च तपोधनाः ॥ (५२।२)

स्वधर्माणः सुतपसो हरितो होहितास्तथा । (५३।१)

सुरारयो गणाश्चैते प्रत्येकं दशको गणः ॥ (५३।२)

ऋतधामा च भद्रेन्द्रस्तारको नाम तद्रिपुः । (५४।१)

हरिर्नपुंसकं भूत्वा घातयिष्यति शङ्कर ॥ (५४।२)

त्रयोदशस्य रौच्यस्य मनोः पुत्रान्निबोध मे । (५५।१)

चित्रसेनो विचित्रश्च तपोधर्मरतो धृतिः ॥ (५५।२)

सुनेत्रः क्षेत्रवृत्तिश्च सुनयो धर्मपो दृढः । (५६।१)

धृतिमानव्ययश्चैव निशारूपो निरुत्सुकः ॥ (५६।२)

निर्मोहस् तत्त्वदर्शी च ऋषयः सप्त कीर्तिताः । (५७।१)

स्वरोमाणः स्वधर्माणः स्वकर्माणस्तथामराः ॥ (५७।२)

त्रयस्त्रिंशद्विभेदास्ते देवानां तत्र वै गणाः । (५८।१)

इन्द्रो दिवस्पतिः शत्रुस्त्विष्टिभो नाम दानवः ॥ (५८।२)

मायूरेण च रूपेण घातयिष्यति माधवः । (५९।१)

चतुर्दशस्य भौत्यस्य शृणु पुत्रान्मनोर्मम ॥ (५९।२)

उरुर् गभीरो धृष्टश्च तरस्वी ग्राह एव च । (६०।१)

अभिमानिप्रवीरश्च जिष्णुः संक्रन्दनस्तथा । (६०।२)

तेजस्वी दुर्लभश्चैव भौत्यस्यैते मनोः सुताः ॥ (६०।३)

अग्नीध्रश्चाग्निबाहुश्च मागधश्च तथा शुचिः । (६१।१)

अजितो मुक्तशुक्रौ च ऋषयः सप्त कीर्तिताः ॥ (६१।२)

चाक्षुषाः कर्मनिष्ठाश्च पवित्रा भ्राजिनस्तथा । (६२।१)

वचोवृद्धा देवगणाः पञ्च प्रोक्तास्तु सप्तकाः ॥ (६२।२)

शुचिरिन्द्रो महादैत्यो रिपुहन्ता हरिः स्वयम् । (६३।१)

एको देवश्चतुर्धा तु व्यासरूपेण विष्णुना ॥ (६३।२)

कृतस्ततः पुराणानि विद्याश्चाष्टादशैव तु । (६४।१)

अङ्गानि चतुरो वेदा मीमांसान्यायविस्तरः ॥ (६४।२)

पुराणं धर्मशास्त्रं च आयुर्वेदार्थशास्त्रकम् । (६५।१)

धनुर्वेदश्च गान्धर्वो विद्या ह्यष्टादशैव ताः ॥ (६५।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे मनुतद्वंशनिरूपणं नाम सप्ताशीतितमो ऽध्यायः ॥ (६६।१)