याज्ञवल्क्य उवाच । (१।१)

प्रेताशौचं प्रवक्ष्यामि तच्छृणुध्वं यतव्रताः । (१।२)

ऊनद्विवर्षं निखनेन्न कुर्याद् उदकं ततः ॥ (१।३)

आ श्मशानादनुव्रज्य इतरैर्ज्ञातिभिर्युतः । (२।१)

यमसूक्तं तथा जप्यं जपद्भिर्लौकिकाग्निना ॥ (२।२)

स दग्धव्य उपेतश् चेद् आहिताग्न्यावृतार्थवत् । (३।१)

सप्तमाद्दशमाद्वापि ज्ञातयो ऽभ्युपयान्त्य् अपः ॥ (३।२)

अप नः शोशुचदघमनेन पितृदिङ्मुखाः । (४।१)

एवं मातामहाचार्यपत्नीनां चोदकक्रियाः ॥ (४।२)

कामोदकाः पुत्रसखिस्वस्रीयश्वशुरर्त्विजः । (५।१)

नामगोत्रेण ह्युदकं सकृत्सिञ्चन्ति वाग्यताः ॥ (५।२)

पाषण्डपतितानां तु न कुर्युरुदकक्रियाः । (६।१)

न ब्रह्मचारिणो व्रात्या योषितः कामगास्तथा ॥ (६।२)

सुराप्यस् त्वात्मघातिन्यो नाशौचोदकभाजनाः । (७।१)

ततो न रोदितव्यं हि त्वनित्या जीवसंस्थितिः ॥ (७।२)

क्रिया कार्या यथाशक्ति ततो गच्छेद्गृहान्प्रति । (८।१)

विदश्य निम्बपत्राणि नियता द्वारि वेश्मनः ॥ (८।२)

आचम्याथाग्निमुदकं गोमयं गौरसर्षपान् । (९।१)

प्रविशेयुः समालभ्य कृत्वाश्मनि पदं शनैः ॥ (९।२)

प्रवेशनादिकं कर्म प्रेतसंस्पर्शनादपि । (१०।१)

ईक्षतां तत्क्षणाच्छुद्धिः परेषां स्नानसंयमात् ॥ (१०।२)

क्रीतलब्धाशना भूमौ स्वपेयुस्ते पृथक्पृथक् । (११।१)

पिण्डयज्ञकृता देयं प्रेतायान्नं दिनत्रयम् ॥ (११।२)

जलमेकाहमाकाशे स्थाप्यं क्षीरं तु मृन्मये । (१२।१)

वैतानोपासनाः कार्याः क्रियाश्च श्रुतिचोदिताः ॥ (१२।२)

आ दन्तजन्मनः सद्यः आ चूडं नैशिकी स्मृता । (१३।१)

त्रिरात्रम् आ व्रतादेशाद् दशरात्रम् अतः परम् ॥ (१३।२)

त्रिरात्रं दशरात्रं वा शावमाशौचमुच्यते । (१४।१)

ऊनद्विवर्ष उभयोः सूतकं मातुरेव हि ॥ (१४।२)

अन्तरा जन्ममरणे शेषाहोभिर्विशुध्यति । (१५।१)

दश द्वादश वर्णानां तथा पञ्चदशैव च ॥ (१५।२)

त्रिंशद्दिनानि च तथा भवति प्रेतसूतकम् । (१६।१)

अहस्त्वदत्तकन्यासु बालेषु च विशोधनम् ॥ (१६।२)

गुर्वन्तेवास्यनूचानमातुलश्रोत्रियेषु च । (१७।१)

अनौरसेषु पुत्रेषु भार्यास्वन्यगतासु च ॥ (१७।२)

निवासराजनि तथा तदहः शुद्धिकारम् । (१८।१)

हतानां नृपगोविप्रैरन्वक्षं चात्मघातिनाम् ॥ (१८।२)

विषाद्यैश्च हतानां च नाशौचं पृथिवीपतेः । (१९।१)

सत्रिव्रतिब्रह्मचारिदातृब्रह्मविदां तथा ॥ (१९।२)

दाने विवाहे यज्ञे च संग्रामे देशविप्लवे । (२०।१)

आपद्यपि च कष्टायां सद्यः शौचं विधीयते ॥ (२०।२)

कालो ऽग्निः कर्ममृद्वायुर्मनो ज्ञानं तपो जपः । (२१।१)

पश्चात्तापो निराहारः सर्वेषां शुद्धिहेतवः ॥ (२१।२)

अकार्यकारिणां दानं वेगो नद्यास्तु शुद्धिकृत् । (२२।१)

क्षात्रेण कर्मणा जीवेद्विशां वाप्यापदि द्विजः ॥ (२२।२)

फलसोमक्षौमवीरुद्दधि क्षीरं घृतं जलम् । (२३।१)

तिलौदनरसक्षारमधु लाक्षा शृतं हविः ॥ (२३।२)

वस्त्रोपलासवं पुष्पं शाकमृच्चर्मपादुकम् । (२४।१)

एणत्वचं च कौशेयं लवणं मासमेव च ॥ (२४।२)

पिण्याकमूलगन्धांश्च वैश्यवृत्तो न विक्रयेत् । (२५।१)

धर्मार्थं विक्रयं नेयास्तिला धान्येन तत्समाः ॥ (२५।२)

लवणादि न विक्रीयात्तथा चापद्गतो द्विजः । (२६।१)

हीनाद्विप्रो विगृह्णंश्च लिप्यते नार्कवद्द्विजः ॥ (२६।२)

कुर्यात्कृष्यादिकं तद्वदविक्रेया हयास्तथा । (२७।१)

बुभुक्षितस् त्र्यं स्थित्वा दृष्ट्वा वृत्तिविवर्जितम् । (२७।२)

राजा धर्म्यां प्रकुर्वीत वृत्तिं विप्रादिकस्य च ॥ (२७।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्ताशौचापद्वृत्त्योर्निरूपणं नाम षडुत्तरशततमो ऽध्यायः ॥ (२८।१)