ब्रह्मोवाच । (१।१)

व्रतानि कार्तिके वक्ष्ये स्नात्वा विष्णुं प्रपूजयेत् । (१।२)

एकभक्तेन नक्तेन मासं वायाचितेन वा ॥ (१।३)

दुग्धशाकफलाद्यैर्वा उपवासेन वा पुनः । (२।१)

सर्वपापविनिर्मुक्तः प्राप्तकामो हरिं व्रजेत् ॥ (२।२)

सदा हरेर्व्रतं श्रेष्ठं ततः स्याद्दक्षिणायने । (३।१)

चातुर्मास्ये ततस्तस्मात्कार्तिके भीष्मपञ्चकम् ॥ (३।२)

ततः श्रेष्ठव्रतं शुक्लस्यैकादश्यां समाचरेत् । (४।१)

स्नात्वा त्रिकालं पित्रादीन्यवाद्यैरर्चयेद्धरिम् ॥ (४।२)

यजेन्मौनी घृताद्यैश्च पञ्चगव्येन वारिभिः । (५।१)

स्नापयित्वाथ कर्पूरमुखैश्चैवानुलेपयेत् ॥ (५।२)

घृताक्तगुग्गुलैर्धूपं द्विजः पञ्चदिनं दहेत् । (६।१)

नैवेद्यं परमान्नं तु जपेदष्टोत्तरं शतम् ॥ (६।२)

ॐ नमो वासुदेवाय घृतव्रीहितिलादिकम् । (७।१)

अष्टाक्षरेण मन्त्रेण स्वाहान्तेन तु होमयेत् ॥ (७।२)

प्रथमे ऽह्नि हरेः पादौ यजेत् पद्मैर् द्वितयिक । (८।१)

बिल्वपत्रैर्जानुदेशं नाभिं गन्धेन चापरे ॥ (८।२)

स्कन्धा बिल्वजवाभिश्च पञ्चमे ऽह्नि शिरो ऽर्चयत् । (९।१)

मालत्या भूमिशायी स्याद्गोमयं प्राशयेत्क्रमात् ॥ (९।२)

गोमूत्रं च दधि क्षीरं पञ्चमे पञ्चगव्यकम् । (१०।१)

नक्तं कुर्यात्पञ्चदश्यां व्रती स्याद्भुक्तिमुक्तिभाक् ॥ (१०।२)

एकादशीव्रतं नित्यं तत्कुर्यात्पक्षयोर्द्वयोः । (११।१)

अघौघनरकं हन्यात्सर्वदं विष्णुलोकदम् ॥ (११।२)

एकादशी द्वादशी च निशान्ते च त्रयोदशी । (१२।१)

नित्यमेकादशी यत्र तत्र संनिहितो हरिः ॥ (१२।२)

दशम्येकादशी यत्र तत्रस्थाश्चासुरादयः । (१३।१)

द्वादश्यां पारणं कुर्यात्सूतके मृतके चरेत् ॥ (१३।२)

चतुर्दशीं प्रतिपदं पूर्वमिश्राम् उपावसेत् । (१४।१)

पौर्णमास्याम् अमावास्यां प्रतिपन्मिश्रितां मुने ॥ (१४।२)

द्वितीयां तृतीयामिश्रां तृतीयां चाप्युपावसेत् । (१५।१)

चतुर्थ्या संगतां नित्यं चतुर्थोञ्चनया युताम् । (१५।२)

पञ्चमीं षष्ठ्यसंयुक्तां षष्ठ्या युक्तां च सप्तमीम् ॥ (१५।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे भीष्मपञ्चकादिव्रतं नाम त्रयोविंशत्युत्तरशततमो ऽध्यायः ॥ (१६।१)