श्रीगणेशाय नमः । (१।१)

अथ गयामाहात्म्यं प्रारभ्यते । (१।२)

ब्रह्मोवाच । (१।३)

सारात्सारतरं व्यास गयामाहात्म्यम् उत्तमम् । (१।४)

प्रवक्ष्यामि समासेन भुक्तिमुक्तिप्रदं शृणु ॥ (१।५)

गयासुरो ऽभवत्पूर्वं वीर्यवान्परमः स च । (२।१)

तपस्तप्यन्महाघोरं सर्वभूतोपतापनम् ॥ (२।२)

तत्तपस्तापिता देवास्तद्वधार्थं हरिं गताः । (३।१)

शरणं हरिरूचे तान् भवितव्यं शिवात्मभैः ॥ (३।२)

पात्यते ऽस्य महादेहस् तथेत्यूचुः सुरा हरिम् । (४।१)

कदाचिच्छिवपूजार्थं क्षीराब्धेः कमलानि च ॥ (४।२)

आनीय कीकटे देशे शयनं चाकरोद् बली । (५।१)

विष्णुमायाविमूढो ऽसौ गदया विष्णुना हतः ॥ (५।२)

अतो गदाधरो विष्णुर्गयायां मुक्तिदः स्थितः । (६।१)

तस्य देहो लिङ्गरूपी स्थितः शुद्धे पितामहः ॥ (६।२)

जनार्दनश्च कालेशस्तथान्यः प्रपितामहः । (७।१)

विष्णुराहाथ मर्यादां पुण्यक्षेत्रं भविष्यति ॥ (७।२)

यज्ञं श्राद्धं पिण्डदानं स्नानादि कुरुते नरः । (८।१)

स स्वर्गं ब्रह्मलोकं च गच्छेन्न नरकं नरः ॥ (८।२)

गयातीर्थं परं ज्ञात्वा यागं चक्रे पितामहः । (९।१)

ब्राह्मणान्पूजयामास ऋत्विगर्थमुपागतान् ॥ (९।२)

महानदीं रसवहां सृष्ट्वा वाप्यादिकं तथा । (१०।१)

भक्ष्यभोज्यफलादींश्च कामधेनुं तथासृजत् ॥ (१०।२)

पञ्चक्रोशं गयोक्षेत्रं ब्राह्मणेभ्यो ददौ प्रभुः । (११।१)

धरमयागेषु लोभात्तु प्रतिगृह्य धनादिकम् ॥ (११।२)

स्थिता विप्रास्तदा शप्ता गयायां ब्राह्मणास्ततः । (१२।१)

मा भूत् त्रैपुरुषी विद्या मा भूत्त्रैपुरुषं धनम् ॥ (१२।२)

युष्माकं स्याद्वारिवहा नदी पाषाणपर्वतः । (१३।१)

शप्तैस्तु प्रार्थितो ब्रह्मानुग्रहं कृतवान्प्रभुः ॥ (१३।२)

लोकाः पुण्या गयायां हि श्राद्धिनो ब्रह्मलोकगाः । (१४।१)

युष्मान्ये पूजयिष्यन्ति तैरहं पूजितः सदा ॥ (१४।२)

ब्रह्मज्ञानं गयाश्राद्धं गोगृहे मरणं तथा । (१५।१)

वासः पुंसां कुरुक्षेत्रे मुक्तिरेषा चतुर्विधा ॥ (१५।२)

समुद्राः सरितः सर्वा वापीकूपह्रदास्तथा । (१६।१)

स्नातुकामा गयातीर्थं व्यास यास यान्ति न संशयः ॥ (१६।२)

ब्रह्महत्या सुरापानं स्तेयं गुर्वङ्गनागमः । (१७।१)

पापं तत्संगजं सर्वं गयाश्राद्धाद्विनश्यति ॥ (१७।२)

असंस्कृता मृता ये च पशुचोरहताश्च ये । (१८।१)

सर्पदष्टा गयाश्राद्धान्मुक्ताः स्वर्गं व्रजन्ति ते ॥ (१८।२)

गयायां पिण्डदानेन यत्फलं लभते नरः । (१९।१)

न तच्छक्यं मया वक्तुं वर्षकोटिशतैरपि ॥ (१९।२)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे गयामाहात्म्यं नाम द्व्यशीतितमो ऽध्यायः ॥ (२०।१)