हरिरुवाच । (१।१)

जनमेजयः पुरोश्चाभून्नमस्युर्जनमेजयात् । (१।२)

तस्य पुत्रश्चाभयदः सुद्युश्चाभयदादभूत् ॥ (१।३)

सुद्योर् बहुगतिः पुत्रः संजातिस्तस्य चात्मजः । (२।१)

वत्सजातिश्च संजातेः रौद्राश्वश्च तदात्मजः ॥ (२।२)

ऋतेयुः स्थण्डिलेयुश्च कक्षेयुश्च कृतेयुकः । (३।१)

जलेयुः संततेयुश्च रौद्राश्वस्य सुता वराः ॥ (३।२)

रतिनार ऋतेयोश्च तस्य प्रतिरथः सुतः । (४।१)

तस्य मेधातिथिः पुत्रस् तत्पुत्रश् चैनिलः स्मृतः ॥ (४।२)

ऐनिलस्य तु दुष्यन्तो भरतस्तस्य चात्मजः । (५।१)

शकुन्तलायां संजज्ञे वितथो भरतादभूत् ॥ (५।२)

वितथस्य सुतो मन्युर्मन्योश्चैव नरः स्मृतः । (६।१)

नरस्य संकृतिः पुत्रो गर्गो वै संकृतेः सुतः ॥ (६।२)

गर्गाद् अमन्युः पुत्रो वै शिनिः पुत्रो व्यजायत । (७।१)

मन्युपुत्रान्महावीर्यात्सुतो ऽभवदुरुक्षयः ॥ (७।२)

उरुक्षयात्त्रय्यारुणिर् व्यूहक्षत्राच्च मन्युजात् । (८।१)

सुहोत्रस्तस्य हस्ती च अजमीढद्विमीढकौ ॥ (८।२)

हस्तिनः पुरुमीढश्च कण्वो ऽभूदजमीढतः । (९।१)

कण्वान्मेधातिथिर्जज्ञे यतः काण्वायना द्विजाः ॥ (९।२)

अजमीढाद् बृहदिषुस् तत्पुत्रश्च बृहद्धनुः । (१०।१)

बृहत्कर्मा तस्य पुत्रस्तस्य पुत्रो जयद्रथः ॥ (१०।२)

जयद्रथाद्विश्वजिच्च सेनजिच्च तदात्मजः । (११।१)

रुचिराश्वः सेनजितः पृथुसेनस्तदात्मजः ॥ (११।२)

पारस्तु पृथुसेनस्य पाराद्द्वीपो ऽभवन्नृपः । (१२।१)

नृपस्य सृमरः पुत्रः सुकृतिश्च पृथोः सुतः ॥ (१२।२)

विभ्राजः सुकृतेः पुत्रो विभ्राजाद् अश्वहो ऽभवत् । (१३।१)

कृत्यां तस्माद्ब्रह्मदत्तो विष्वक्सेनस्तदात्मजः ॥ (१३।२)

यवीनरो द्विमीढस्य धृतिमांश्च यवीनरात् । (१४।१)

धृतिमतः सत्यधृतिर्दृढनेमिस्तदात्मजः ॥ (१४।२)

दृढनेमेः सुपार्श्वो ऽभूत् सुपार्श्वात्सन्नतिस्तथा । (१५।१)

कृतस्तु सन्नतेः पुत्रः कृतादुग्रायुधो ऽभवत् ॥ (१५।२)

उग्रायुधाच्च क्षेम्यौ ऽभूत्सुधीरस्तु तदात्मजः । (१६।१)

पुरञ्जयः सुधीराच्च तस्य पुत्रो विदूरथः ॥ (१६।२)

अजमीढान्नलिन्यां च नीलो नाम नृपो ऽभवत् । (१७।१)

नीलाच्छान्तिरभूत्पुत्रः सुशान्तिस्तस्य चात्मजः ॥ (१७।२)

सुशान्तेश्च पुरुर्जातो ह्यर्कस्तस्य सुतो ऽभवत् । (१८।१)

अर्कस्य चैव हर्यश्वो हर्यश्वान्मुकुलो ऽभवत् ॥ (१८।२)

यवीनरो बृहद्भानुः कम्पिल्लः सृञ्जयस्तथा । (१९।१)

पाञ्चालान्मुकुलाज्जज्ञे शरद्वान्वैष्णवो महान् ॥ (१९।२)

दिवोदासो द्वितीयो ऽस्य ह्यहल्यायां शरद्वतः । (२०।१)

शतानन्दो ऽभवत्पुत्रस्तस्य सत्यधृतिः सतः ॥ (२०।२)

कृपः कृपी सत्यधृतेरुर्वश्यां वीर्यहानितः । (२१।१)

द्रोणपत्नी कृपी जज्ञे अश्वत्थामानमुत्तमम् ॥ (२१।२)

दिवोदासान्मित्रयुश्च मित्रयोश्च्यवनो ऽभवत् । (२२।१)

सुदासश्च्यवनाज्जज्ञे सौदासस्तस्य चात्मजः ॥ (२२।२)

सहदेवस्तस्य पुत्रः सहदेवात्तु सोमकः । (२३।१)

जन्तुस्तु सोमकाज्जज्ञे पृषतश्चापरो महान् ॥ (२३।२)

पृषताद्द्रुपदो जज्ञे धृष्टद्युम्नस्ततो ऽभवत् । (२४।१)

धृष्टद्युम्नाद्धृष्टकेतुरृक्षो ऽभूतजमीढतः ॥ (२४।२)

ऋक्षात्संवरणो जज्ञे कुरुः संवरणादभूत् । (२५।१)

सुधनुश्च पीक्षिच्च जह्नुश्चैव कुरोः सुताः ॥ (२५।२)

सुधनुषः सुहोत्रो ऽभूच्च्यवनो ऽभूत्सुहोत्रतः । (२६।१)

च्यवनात्कृतको जज्ञे तथोपरिचरो वसुः ॥ (२६।२)

बृहद्रथश्च प्रत्यग्रः सत्याद्याश्च वसोः सुताः । (२७।१)

बृहद्रथात्कुशाग्रश्च कुशाग्रादृषभो ऽभवत् ॥ (२७।२)

ऋषभात्पुष्पवांस्तस्माज्जज्ञे सत्यहितो नृपः । (२८।१)

सत्यहितात् सुधन्वाभूज् जह्नुश्चैव सुधन्वनः ॥ (२८।२)

बृहद्रथाज्जरासन्धः सहदेवस्तदात्मजः । (२९।१)

सहदेवाच्च च सोमापिः सोमापेः श्रुतवान्सुतः ॥ (२९।२)

भीमसेनोग्रसेनौ च श्रुतसेनो ऽपराजितः । (३०।१)

जनमेजयस्तथान्यो ऽभूज्जह्नोस्तु सुरथो ऽभवत् ॥ (३०।२)

विदूरथस्तु सुरथात्सार्वभौमो विदूरथात् । (३१।१)

जयसेनः सार्वभौमाद् आवधीतस् तदात्मजः ॥ (३१।२)

अयुतायुस्तस्य पुत्रस्तस्य चाक्रोधनः सुतः । (३२।१)

अक्रोधनस्यातिथिश्च ऋक्षो ऽभूदतिथेः सुतः ॥ (३२।२)

ऋक्षाच्च भीमसेनो ऽभूद्दिलीपो भीमसेनतः । (३३।१)

प्रतीपो ऽभूद्दिलीपाच्च देवापिस्तु प्रतीपतः ॥ (३३।२)

शन्तनुश्चैव बाह्लीकस्त्रयस्ते भ्रातरो नृपाः । (३४।१)

बाह्लीकात्सोमदत्तो ऽभूद्भूरिर्भूरिश्रवास्ततः ॥ (३४।२)

शलश्च शन्तनोर् भीष्मो गङ्गायां धार्मिको महान् । (३५।१)

चित्राङ्गदविचित्रौ तु सत्यवत्यां तु शन्तनोः ॥ (३५।२)

भार्ये विचित्रवीर्यस्य त्वम्बिकाम्बालिके तयोः । (३६।१)

धृतराष्ट्रं च पाण्डुं च तद्दास्यां विदुरं तथा ॥ (३६।२)

व्यास उत्पादयामास गान्धागी धृतराष्ट्रतः । (३७।१)

शतपुत्रं दुर्योधनाद्यं पाण्डोः पञ्च प्रजज्ञिरे ॥ (३७।२)

प्रतिविन्ध्यः श्रुतसोमः श्रुतकीर्तिस्तथार्जुनात् । (३८।१)

शतानीकः श्रुतकर्मा द्रौपद्यां पञ्च वै क्रमात् ॥ (३८।२)

यौधेयी च हिडिम्बा च कौशी चैव सुभद्रिका । (३९।१)

विजया वै रेणुमती पञ्चभ्यस्तु सुताः क्रमात् ॥ (३९।२)

देवको घटोत्कचश्च ह्यभिमन्युश्च सर्वगः । (४०।१)

सुहोत्रो निरमित्रश्च परीक्षिदभिमन्युजः ॥ (४०।२)

जनमेजयो ऽस्य ततो भविष्यांश्च नृपाञ्छृणु ॥ (४१।१)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे चन्द्रवंशवर्णनं नाम चत्वारिंशदुत्तरशततमो ऽध्यायः ॥ (४२।१)