ब्रह्मोवाच । (१।१)

हरिवंशं प्रवक्ष्यामि कृष्णमाहात्म्यमुत्तमम् । (१।२)

वसुदेवात्तु देवक्यां वासुदेवो बलो ऽभवत् ॥ (१।३)

धर्मादिरक्षणार्थाय ह्यधर्मादिविनष्टये । (२।१)

कृष्णः पीत्वा स्तनौ गाढं पूतनामनयत्क्षयम् ॥ (२।२)

शकटः परिवृत्तो ऽथ भग्नौ च यमलार्जुनौ । (३।१)

दमितः कालियो नागो धेनुको विनिपातितः ॥ (३।२)

धृतो गोवर्धनः शैल इन्द्रेण परिपूजितः । (४।१)

भारावतरणं चक्रे प्रतिज्ञां कृतवान्हरिः ॥ (४।२)

रक्षणायार्जुनादेश्च ह्यरिष्टादिर्निपातितः । (५।१)

केशी विनिहतो दैत्यो गोपाद्याः परितोषिताः ॥ (५।२)

चाणूरो मुष्टिको मल्लः कंसो मञ्चान्निपातितः । (६।१)

रुक्मिणीसत्यभामाद्याः ह्यष्टौ पत्न्यो हरेः पराः ॥ (६।२)

षोडश स्त्रीसहस्राणि ह्यन्यान्यास महात्मनः । (७।१)

तासां पुत्राश्च पौत्राद्याः शतशो ऽथ सहस्रशः ॥ (७।२)

रुक्मिण्यां चैव प्रद्युम्नो न्यवधीच्छम्बरं च यः । (८।१)

तस्य पुत्रो ऽनिरुद्धो ऽभूद् उषाबाणसुतापतिः ॥ (८।२)

हरिशकरयोर् यत्र महायुद्धं बभूव ह । (९।१)

बाणबाहुसहस्रं च छिन्नं बाहुद्वयं ह्यभूत् ॥ (९।२)

नरको निहतो येन पारिजातं जहार यः । (१०।१)

बलश्च शिशुपालश्च हतश्च द्विविदः कपिः ॥ (१०।२)

अनिरुद्धादभूद्वज्रः स च राजा गते हरौ । (११।१)

संदीपनिं गुरुं चक्रे सपुत्रं च चकार सः । (११।२)

मथुरायां चोग्रसेनं पालनं च दिवौकसाम् ॥ (११।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे हरिवंशवर्णनं नाम चतुश्चात्वारिंशदुत्तरशततमो ऽध्यायः ॥ (१२।१)