हरिरुवाच । (१।१)

सन्ध्याविधिं प्रवक्ष्यामि शृणु रुद्राघनाशनम् । (१।२)

प्राणायामत्रयं कृत्वा सन्ध्यास्नानमुपक्रमेत् ॥ (१।३)

सप्रणवां सव्याहृतिं गायत्त्रीं शिरसा सह । (२।१)

त्रिः पठेद् आयतप्रणः प्राणायामः स उच्यते ॥ (२।२)

मनोवाक्कायजं दोषं प्राणायामैर्दहेद्द्विजः । (३।१)

तस्मात्सर्वेषु कालेषु प्राणायामपरो भवेत् ॥ (३।२)

सायमग्निश्च मेत्युक्ता प्रातः सूर्येत्यपः पिबेत् । (४।१)

आपः पुनन्तु मध्याह्ने उपस्पृश्य यथाविधि ॥ (४।२)

आपोहिष्ठेत्यृचा कुर्यान्मार्जनं तु कुशोदकैः । (५।१)

प्रणवेन तु संयुक्तं क्षिपेद्वारि पदे पदे ॥ (५।२)

रजस्तमःस्वमोहोत्थाञ् जाग्रत्स्वप्नसुषुप्तिजान् । (६।१)

वाङ्मनःकर्मजान् दोषान् नवैतान् नवभिर् दहेत् ॥ (६।२)

समुद्धृत्योदकं पाणौ जप्त्वा च द्रुपदां क्षिपेत् । (७।१)

त्रिपडष्टौ द्वादशधा वर्तयेदघमर्पणम् ॥ (७।२)

उदुत्यञ्चित्रम् इत्याभ्याम् उपतिष्ठेद्दिवाकरम् । (८।१)

दिवा रात्रौ च यत्पापं सर्वं नश्यति तत्क्षणात् ॥ (८।२)

पूर्वसंध्यां जपंस्तिष्ठेत्पश्चिमामुपविश्य च । (९।१)

महाव्याहृतिसंयुक्तां गायत्त्रीं प्रणवान्विताम् ॥ (९।२)

दशभिर्जन्मजनितं शतेन तु पुरा कृतम् । (१०।१)

त्रियुगं तु सहस्रेण गायत्त्री हन्ति दुष्कृतम् ॥ (१०।२)

रक्ता भवति गायत्त्री सावित्री शुक्लवर्णिका । (११।१)

कृष्णा सरस्वती ज्ञेया संध्यात्रयमुदाहृतम् ॥ (११।२)

ॐ भूर्विन्यस्य हृदये ॐ भुवः शिरसि न्यसेत् । (१२।१)

ॐ स्वरिति शिखायां च गायत्त्र्याः प्रथमं पदम् ॥ (१२।२)

विन्यसेत्कवचे विद्वान्द्वितीयं नेत्रयोर्न्यसेत् । (१३।१)

तृतीयेनाङ्गविन्यासं चतुर्थं सर्वतो न्यसेत् ॥ (१३।२)

संध्याकाले तु विन्यस्य जपेद्वै वेदमातरम् । (१४।१)

शिवस्तस्यास्तु सर्वाह्ने प्राणायामपरं न्यसेत् ॥ (१४।२)

त्रिपदा या तु गायत्त्री ब्रह्मविष्णुमहेश्वरी । (१५।१)

विनियोगमृषिच्छन्दो ज्ञात्वा तु जपमारभेत् ॥ (१५।२)

सर्वपापविनिर्मुक्तो ब्रह्मलोकमवाप्नुयात् । (१६।१)

परोरजसि सावद्ॐ तुरीयपदमीरितम् ॥ (१६।२)

तं हन्ति सूर्यः सन्ध्यायां नोपास्तिं कुरुते तु यः । (१७।१)

तुरीयस्य पदस्यापि ऋषिर्निर्मल एव च ॥ (१७।२)

छन्दस्तु देवी गायत्त्री परमात्मा च देवता ॥ (१८।१)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे संध्याविधिर्नाम षट्त्रिंशो ऽध्यायः ॥ (१९।१)