रुद्र उवाच । (१।१)

विष्णोर्ध्यानं पुनर्ब्रूहि शङ्खचक्रगदाधर । (१।२)

येन विज्ञातमात्रेण कृतकृत्यो भवेन्नरः ॥ (१।३)

हरिरुवाच । (२।१)

प्रवक्ष्यामि हरेर्ध्यानं मायातन्त्रविमर्दकम् । (२।२)

मूर्तामूर्तादिभेदेन तद्ध्यानं द्विविधं हर ॥ (२।३)

अमूर्तं रुद्र कथितं हन्त मूर्तं ब्रवीम्यहम् । (३।१)

सूर्यकोटिप्रतीकाशो जिष्णुर् भ्राजिष्णुर् एकतः ॥ (३।२)

कुन्दगोक्षीरधवलो हरिर्ध्येयो मुमुक्षुभिः । (४।१)

विशालेन सुसौम्येन शङ्खेन च समन्वितः ॥ (४।२)

सहस्रादित्यतुल्येन ज्वालामालोग्ररूपिणा । (५।१)

चक्रेण चान्वितः शान्तो गदाहस्तः शुभाननः ॥ (५।२)

किरीटेन महार्हेण रत्नप्रज्वलितेन च । (६।१)

सायुधः सर्वगो देवः सरोरुहधरस्तथा ॥ (६।२)

वनमालाधरः शुभ्रः समांसो हेमभूषणः । (७।१)

सुवस्त्रः शुद्धदेहश्च सुकर्णः पद्मसंस्थितः ॥ (७।२)

हिरण्मयशरीरश्च चारुहारी शुभाङ्गदः । (८।१)

केयूरेण समायुक्तो वनमालासमन्वितः ॥ (८।२)

श्रीवत्सकौस्तुभयुतो लक्ष्मीवन्द्येक्षणान्वितः । (९।१)

अणिमादिगुणैर् युक्तः सृष्टिसंहारकारकः ॥ (९।२)

मुनिध्येयो ऽसुरध्येयो देवध्येयो ऽतिसुन्दरः । (१०।१)

ब्रह्मादिस्तम्बपर्यन्तभूतजातहृदिस्थितः ॥ (१०।२)

सनातनो ऽव्ययो मेध्यः सर्वानुग्रहकृत्प्रभुः । (११।१)

नारायणो महादेवः स्फुरन्मकरकुण्डलः ॥ (११।२)

सन्तापनाशनो ऽभ्यर्च्यो मङ्गल्यो दुष्टनाशनः । (१२।१)

सर्वात्मा सर्वरूपश्च सर्वगो ग्रहनाशनः ॥ (१२।२)

चार्वङ्गुलीयसंयुक्तः सुदीप्तनख एव च । (१३।१)

शरण्यः लसुखकारी च सौम्यरूपो महेश्वरः ॥ (१३।२)

सर्वालङ्कारसंयुक्तश्चारुचन्दनचर्चितः । (१४।१)

सर्वदेवसमायुक्तः सर्वदेवप्रियंकरः ॥ (१४।२)

सर्वलोकहितैषी च सर्वेशः सर्वभावनः । (१५।१)

आदित्यमण्डले संस्थो ऽग्निस्थो वारिसंस्थितः ॥ (१५।२)

वासुदेवो जगद्धाता ध्येयो विष्णुर्मुमुक्षुभिः । (१६।१)

वासुदेवो ऽहमस्मीति आत्मा ध्येयो हरिहरिः ॥ (१६।२)

ध्यायन्त्येवं च ये विष्णुं ते यान्ति परमां गतिम् । (१७।१)

याज्ञवल्क्यः पुरा ह्येवं ध्यात्वा विष्णुं सुरेश्वरम् ॥ (१७।२)

धर्मोपदेशकर्तृत्वं सम्प्राप्यागात् परं पदम् । (१८।१)

तस्मात्त्वमपि देवेश विष्णुं चिन्तय शङ्कर ॥ (१८।२)

विष्णुध्यानं पठेद्यस्तु प्राप्नोति परमां गतिम् ॥ (१९।१)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे विष्णुध्यानं नाम द्विनवतितमो ऽध्यायः ॥ (२०।१)