याज्ञवल्क्य उवाच । (१।१)

अथ दानविधिं वक्ष्ये तन्मे शृणुत सुव्रताः । (१।२)

अन्येभ्यो ब्राह्मणाः श्रेष्ठास्तेभ्यश्चैव क्रियापराः ॥ (१।३)

ब्रह्मवेत्ता च तेभ्यो ऽपि पात्रं विद्यात् तपोऽन्विताः । (२।१)

गोभूधान्यहिरण्यादि पात्रे दातव्यमर्चितम् ॥ (२।२)

विद्यातपोभ्यां हीनेन न तु ग्राह्यः प्रतिग्रहः । (३।१)

गृह्णन्प्रदातारमधो नयत्यात्मानमेव च ॥ (३।२)

दातव्यं प्रत्यहं पात्रे निमित्तेषु विशेषतः । (४।१)

याचितेनापि दातव्यं श्रद्धापूतं तु शक्तितः ॥ (४।२)

हेमशृङ्गी शफैः रौप्यैः सुशीला वस्त्रसंयुता । (५।१)

सकांस्यपात्रा दातव्या क्षीरिणी गौः सदक्षिणा ॥ (५।२)

दशसौवर्णिकं शृङ्गं शफं सप्तपलैः कृतम् । (६।१)

पञ्चाशत्पलिकं पात्रं कांस्यं वत्सस्य कीर्त्यते ॥ (६।२)

स्वर्णपिप्पलपात्रेण वत्सो वा वत्सिकापि वा । (७।१)

अस्या अपि च दातव्यमपत्यं रोगवर्जितम् ॥ (७।२)

दाता स्वर्गमवाप्नोति वत्सरान्रोमसंमितान् । (८।१)

कपिला चेत्तारयेत् भूयश्चासप्तमं कुलम् ॥ (८।२)

यावद्वत्सस्य द्वौ पादौ मुखं योन्यां प्रदृश्यते । (९।१)

तावद्गौः पृथिवी ज्ञेया यावद्गर्भं न मुञ्चति ॥ (९।२)

यथा कथञ्चिद्दत्त्वा गान्धेनुं वाधेनुमेव वा । (१०।१)

अरोगामपरिक्लिष्टां दाता स्वर्गे महीयते ॥ (१०।२)

श्रान्तसंवाहनं रोगिपरिचर्या सुरार्चनम् । (११।१)

पादशौचं द्विजोच्छिष्टमार्जनं गोप्रदानवत् ॥ (११।२)

द्विजाय यदभीष्टं तु दत्त्वा स्वर्गमवाप्नुयात् । (१२।१)

भूदीपांश्चान्नवस्त्राणि सर्पिर्दत्त्वा व्रजेच्छियम् ॥ (१२।२)

गृहधान्यच्छत्रमाल्यवृक्षया न घृतं जलम् । (१३।१)

शय्यानुलेपनं दत्त्वा स्वर्गलोके महीयते ॥ (१३।२)

ब्रह्मदाता ब्रह्मलोकं प्राप्नोति सुरदुर्लभम् । (१४।१)

वेदार्थयज्ञशास्त्राणि धर्मशास्त्राणि चैव हि ॥ (१४।२)

मूल्येनापि लिखित्वापि ब्रह्मलोकमवाप्नुयात् । (१५।१)

एतन्मूलं जगद्यस्मादसृजत्पूर्वमीश्वरः ॥ (१५।२)

तस्मात्सर्वप्रयत्नेन कार्यो वेदार्थसंग्रहः । (१६।१)

इतिहासपुराणं वा लिखित्वा यः प्रयच्छति ॥ (१६।२)

ब्रह्मदानसमं पुण्यं प्राप्नोति द्विगुणोन्नतिम् । (१७।१)

लोकायतं कुतर्कश्च प्राकृतम्लेच्छभाषितम् ॥ (१७।२)

न श्रोतव्यं द्विजेनैतदधो नयति तं द्विजम् । (१८।१)

समर्थो यो न गृह्णीयाद्दातृलोकानवाप्नुयात् ॥ (१८।२)

कुशाः शाकं पयो गन्धाः प्रत्याख्येया न वारि च । (१९।१)

अयाचिताहृतं ग्राह्यमपि दुष्कृतकर्मणः ॥ (१९।२)

अन्यत्र कुलटाषण्ढपतितेभ्यो द्विषस्तथा । (२०।१)

देवातिथ्यर्चनकृते पितृतृप्त्यर्थमेव च । (२०।२)

सर्वतः प्रतिगृह्णीयाद् आत्मतृप्सर्थम् एव च ॥ (२०।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तदानधर्मनिरूपणं नामाष्टनवतितमो ऽध्यायः ॥ (२१।१)