याज्ञवल्क्य उवाच । (१।१)

द्रव्यशुद्धिं प्रवक्ष्यामि तन्निबोधत सत्तमाः । (१।२)

सौवर्णराजताब्जानां शङ्खरज्ज्वादिचर्मणाम् ॥ (१।३)

पात्राणां चासनानां च वारिणा शुद्धिरिष्यते । (२।१)

उष्णवाभः स्रुक्स्रुवयोर् धान्यादेः प्रोक्षणेन च ॥ (२।२)

तक्षणाद्दारुशृङ्गादेर्यज्ञपात्रस्य मार्जनात् । (३।१)

सोष्णैर् उदकगोमूत्रैः शुध्यत्याविककौशिकम् ॥ (३।२)

भैक्ष्यं योषिन्मुखं पश्यन्पुनः पाकान्महीमयम् । (४।१)

गोघ्राते ऽन्ने तथा केशमक्षिकाकीटदूषिते ॥ (४।२)

भस्मक्षेपाद्विशुद्धिः स्याद्भूशुद्धिर् मार्जनादिना । (५।१)

त्रपुसीसकताम्राणां क्षाराम्लोदकवारिभिः ॥ (५।२)

भस्माद्भिर्लोहकांस्यानामज्ञातं च सदा शुचि । (६।१)

अमेध्याक्तस्य मृत्तोयैर्गन्धलेपापकर्षणात् ॥ (६।२)

शुचि गोतृप्तिदं तोयं प्रकृतिस्थं महीगतम् । (७।१)

तथा मांसं श्वचाण्डालक्रव्यादादिनिपातितम् ॥ (७।२)

रश्मिरग्नी रजश्छाया गौरश्वो वसुधानिलाः । (८।१)

अश्वाजविप्रुषो मेध्यास् तथाचमनबिन्दवः ॥ (८।२)

स्नात्वा पीत्वा क्षुते सुप्ते भुक्त्वा रथ्याप्रसर्पणे । (९।१)

आचान्तः पुनराचामेद्वासो ऽन्यत्परिधाय च ॥ (९।२)

क्षुते निष्ठीविते स्वापे परिधाने ऽश्रुपातने । (१०।१)

पञ्चस्वेतेषु नाचामेद्दक्षिणं श्रवणं स्पृशेत् । (१०।२)

तिष्ठन्त्यग्न्यादयो देवा विप्रकर्णे तु दक्षिणे ॥ (१०।३)

इति श्रीगारुडे महापुराणे पूर्वखण्डे प्रथमांशाख्ये आचारकाण्डे याज्ञवल्क्योक्तद्रव्यशुद्धिनिरूपणं नाम सप्तनवतितमो ऽध्यायः ॥ (११।१)