सूत उवाच । (१।१)

ईशानकल्पवृत्तान्तमधिकृत्य महात्मना । (१।२)

ब्रह्मणा कल्पितं पूर्वं पुराणं लैङ्गम् उत्तमम् ॥ (१।३)

ग्रन्थकोटिप्रमाणं तु शतकोटिप्रविस्तरे । (२।१)

चतुर्लक्षेण संक्षिप्ते व्यासैः सर्वान्तरेषु वै ॥ (२।२)

व्यस्तेष्टा दशधा चैव ब्रह्मादौ द्वापरादिषु । (३।१)

लिङ्गमेकादशं प्रोक्तं मया व्यासाच्छ्रुतं च तत् ॥ (३।२)

अस्यैकादशसाहस्रे ग्रन्थमानमिह द्विजाः । (४।१)

तस्मात्संक्षेपतो वक्ष्ये न श्रुतं विस्तरेण यत् ॥ (४।२)

चतुर्लक्षेण संक्षिप्ते कृष्णद्वैपायनेन तु । (५।१)

अत्रैकादशसाहस्रैः कथितो लिङ्गसम्भवः ॥ (५।२)

सर्गः प्राधानिकः पश्चात् प्राकृतो वैकृतानि च । (६।१)

अण्डस्यास्य च सम्भूतिर् अण्डस्यावरणाष्टकम् ॥ (६।२)

अण्डोद्भवत्वं शर्वस्य रजोगुणसमाश्रयात् । (७।१)

विष्णुत्वं कालरुद्रत्वं शयनं चाप्सु तस्य च ॥ (७।२)

प्रजापतीनां सर्गश् च पृथिव्युद्धरणं तथा । (८।१)

ब्रह्मणश् च दिवारात्रमायुषो गणनं पुनः ॥ (८।२)

सवनं ब्रह्मणश्चैव युगकल्पश् च तस्य तु । (९।१)

दिव्यं च मानुषं वर्षमार्षं वै ध्रौव्यमेव च ॥ (९।२)

पित्र्यं पितॄणां सम्भूतिर् धर्मश्चाश्रमिणां तथा । (१०।१)

अवृद्धिर्जगतो भूयो देव्याः शक्त्युद्भवस्तथा ॥ (१०।२)

स्त्रीपुम्भावो विरिञ्चस्य सर्गो मिथुनसम्भवः । (११।१)

आख्याष्टकं हि रुद्रस्य कथितं रोदनान्तरे ॥ (११।२)

ब्रह्मविष्णुविवादश् च पुनर्लिङ्गस्य सम्भवः । (१२।१)

शिलादस्य तपश्चैव वृत्रारेर्दर्शनं तथा ॥ (१२।२)

प्रार्थना योनिजस्याथ दुर्लभत्वं सुतस्य तु । (१३।१)

शिलादशक्रसंवादः पद्मयोनित्वमेव च ॥ (१३।२)

भवस्य दर्शनं चैव तिष्येष्वाचार्यशिष्ययोः । (१४।१)

व्यासावताराश् च तथा कल्पमन्वन्तराणि च ॥ (१४।२)

कल्पत्वं चैव कल्पानाम् आख्याभेदेष्वनुक्रमात् । (१५।१)

कल्पेषु कल्पे वाराहे वाराहत्वं हरेस् तथा ॥ (१५।२)

मेघवाहनकल्पस्य वृत्तान्तं रुद्रगौरवम् । (१६।१)

पुनर्लिङ्गोद्भवश्चैव ऋषिमध्ये पिनाकिनः ॥ (१६।२)

लिङ्गस्याराधनं स्नानविधानं शौचलक्षणम् । (१७।१)

वाराणस्याश् च माहात्म्यं क्षेत्रमाहात्म्यवर्णनम् ॥ (१७।२)

भुवि रुद्रालयानां तु संख्या विष्णोर्गृहस्य च । (१८।१)

अन्तरिक्षे तथाण्डे ऽस्मिन् देवायतनवर्णनम् ॥ (१८।२)

दक्षस्य पतनं भूमौ पुनः स्वारोचिषे ऽन्तरे । (१९।१)

दक्षशापश् च दक्षस्य शापमोक्षस्तथैव च ॥ (१९।२)

कैलासवर्णनं चैव योगः पाशुपतस् तथा । (२०।१)

चतुर्युगप्रमाणं च युगधर्मः सुविस्तरः ॥ (२०।२)

संध्यांशकप्रमाणं च संध्यावृत्तं भवस्य च । (२१।१)

श्मशाननिलयश्चैव चन्द्ररेखासमुद्भवः ॥ (२१।२)

उद्वाहः शंकरस्याथ पुत्रोत्पादनमेव च । (२२।१)

मैथुनातिप्रसङ्गेन विनाशो जगतां भयम् ॥ (२२।२)

शापः सत्या कृतो देवान्पुरा विष्णुं च पालितम् । (२३।१)

शुक्रोत्सर्गस्तु रुद्रस्य गाङ्गेयोद्भव एव च ॥ (२३।२)

ग्रहणादिषु कालेषु स्नाप्य लिङ्गं फलं तथा । (२४।१)

क्षुब्धधी च विवादश् च दधीचोपेन्द्रयोस् तथा ॥ (२४।२)

उत्पत्तिर्नन्दिनाम्ना तु देवदेवस्य शूलिनः । (२५।१)

पतिव्रतायाश्चाख्यानं पशुपाशविचारणा ॥ (२५।२)

प्रवृत्तिलक्षणं ज्ञानं निवृत्त्यधिकृता तथा । (२६।१)

वसिष्ठतनयोत्पत्तिर्वासिष्ठानां महात्मनाम् ॥ (२६।२)

मुनीनां वंशविस्तारो राज्ञां शक्तेर्विनाशनम् । (२७।१)

दौरात्म्यं कौशिकस्याथ सुरभेर्बन्धनं तथा ॥ (२७।२)

सुतशोको वसिष्ठस्य अरुन्धत्याः प्रलापनम् । (२८।१)

स्नुषायाः प्रेषणं चैव गर्भस्थस्य वचस् तथा ॥ (२८।२)

पराशरस्यावतारो व्यासस्य च शुकस्य च । (२९।१)

विनाशो राक्षसानां च कृतो वै शक्तिसूनुना ॥ (२९।२)

देवतापरमार्थं तु विज्ञानं च प्रसादतः । (३०।१)

पुराणकरणं चैव पुलस्त्यस्याज्ञया गुरोः ॥ (३०।२)

भुवनानां प्रमाणं च ग्रहाणां ज्योतिषां गतिः । (३१।१)

जीवच्छ्राद्धविधानं च श्राद्धार्हाः श्राद्धमेव च ॥ (३१।२)

नान्दीश्राद्धविधानं च तथाध्ययनलक्षणम् । (३२।१)

पञ्चयज्ञप्रभावश् च पञ्चयज्ञविधिस् तथा ॥ (३२।२)

रजस्वलानां वृत्तिश् च वृत्त्या पुत्रविशिष्टता । (३३।१)

मैथुनस्य विधिश्चैव प्रतिवर्णमनुक्रमात् ॥ (३३।२)

भोज्याभोज्यविधानं च सर्वेषामेव वर्णिनाम् । (३४।१)

प्रायश्चित्तम् अशेषस्य प्रत्येकं चैव विस्तरात् ॥ (३४।२)

नरकाणां स्वरूपं च दण्डः कर्मानुरूपतः । (३५।१)

स्वर्गिनारकिणां पुंसां चिह्नं जन्मान्तरेषु च ॥ (३५।२)

नानाविधानि दानानि प्रेतराजपुरं तथा । (३६।१)

कल्पं पञ्चाक्षरस्याथ रुद्रमाहात्म्यमेव च ॥ (३६।२)

वृत्रेन्द्रयोर्महायुद्धं विश्वरूपविमर्दनम् । (३७।१)

श्वेतस्य मृत्योः संवादः श्वेतार्थे कालनाशनम् ॥ (३७।२)

देवदारुवने शम्भोः प्रवेशः शंकरस्य तु । (३८।१)

सुदर्शनस्य चाख्यानं क्रमसंन्यासलक्षणम् ॥ (३८।२)

श्रद्धासाध्यो ऽथ रुद्रस्तु कथितं ब्रह्मणा तदा । (३९।१)

मधुना कैटभेनैव पुरा हृतगतेर्विभोः ॥ (३९।२)

ब्रह्मणः परमं ज्ञानमादातुं मीनता हरेः । (४०।१)

सर्वावस्थासु विष्णोश् च जननं लीलयैव तु ॥ (४०।२)

रुद्रप्रसादाद्विष्णोश् च जिष्णोश्चैव तु सम्भवः । (४१।१)

मन्थानधारणार्थाय हरेः कूर्मत्वमेवच ॥ (४१।२)

संकर्षणस्य चोत्पत्तिः कौशिक्याश् च पुनर्भवः । (४२।१)

यदूनां चैव सम्भूतिर् यादवत्वं हरेः स्वयम् ॥ (४२।२)

भोजराजस्य दौरात्म्यं मातुलस्य हरेर्विभोः । (४३।१)

बालभावे हरेः क्रीडा पुत्रार्थं शंकरार्चनम् ॥ (४३।२)

नारस्य च तथोत्पत्तिः कपाले वैष्णवाद्धरात् । (४४।१)

भूभारनिग्रहार्थे तु रुद्रस्याराधनं हरेः ॥ (४४।२)

वैन्येन पृथुना भूमेः पुरा दोहप्रवर्तनम् । (४५।१)

देवासुरे पुरा लब्धो भृगुशापश् च विष्णुना ॥ (४५।२)

कृष्णत्वे द्वारकायां तु निलयो माधवस्य तु । (४६।१)

लब्धो हिताय शापस्तु दुर्वासस्याननाद्धरेः ॥ (४६।२)

वृष्ण्यन्धकविनाशाय शापः पिण्डारवासिनाम् । (४७।१)

एरकस्य तथोत्पत्तिस्तोमरस्योद्भवस् तथा ॥ (४७।२)

एरकालाभतो ऽन्योन्यं विवादे वृष्णिविग्रहः । (४८।१)

लीलया चैव कृष्णेन स्वकुलस्य च संहृतिः ॥ (४८।२)

एरकास्त्रबलेनैव गमनं स्वेच्छयैव तु । (४९।१)

ब्रह्मणश्चैव मोक्षस्य विज्ञानं तु सुविस्तरम् ॥ (४९।२)

पुरान्धकाग्निदक्षाणां शक्रेभमृगरूपिणाम् । (५०।१)

मदनस्यादिदेवस्य ब्रह्मणश् चामरारिणाम् ॥ (५०।२)

हलाहलस्य दैत्यस्य कृतावज्ञा पिनाकिना । (५१।१)

जालंधरवधश्चैव सुदर्शनसमुद्भवः ॥ (५१।२)

विष्णोर्वरायुधावाप्तिस् तथा रुद्रस्य चेष्टितम् । (५२।१)

तथान्यानि च रुद्रस्य चरितानि सहस्रशः ॥ (५२।२)

हरेः पितामहस्याथ शक्रस्य च महात्मनः । (५३।१)

प्रभावानुभवश्चैव शिवलोकस्य वर्णनम् ॥ (५३।२)

भूमौ रुद्रस्य लोकं च पाताले हाटकेश्वरम् । (५४।१)

तपसां लक्षणं चैव द्विजानां वैभवं तथा ॥ (५४।२)

आधिक्यं सर्वमूर्तीनां लिङ्गमूर्तेर् विशेषतः । (५५।१)

लिङ्गे ऽस्मिन्नानुपूर्व्येण विस्तरेणानुकीर्त्यते ॥ (५५।२)

एतज्ज्ञात्वा पुराणस्य संक्षेपं कीर्तयेत्तु यः । (५६।१)

सर्वपापविनिर्मुक्तो ब्रह्मलोकं स गच्छति ॥ (५६।२)