ऋषय ऊचुः । (१।१)

प्रभावो नन्दिनश्चैव लिङ्गपूजाफलं श्रुतम् । (१।२)

श्रुतिभिः संमितं सर्वं रोमहर्षण सुव्रत ॥ (१।३)

जयाभिषेक ईशेन कथितो मनवे पुरा । (२।१)

हिताय मेरुशिखरे क्षत्रियाणां त्रिशूलिना ॥ (२।२)

तत्कथं षोडशविधं महादानं च शोभनम् । (३।१)

वक्तुमर्हसि चास्माकं सूत बुद्धिमतांवर ॥ (३।२)

सूत उवाच । (४।१)

जीवच्छ्राद्धं पुरा कृत्वा मनुः स्वायंभुवः प्रभुः । (४।२)

मेरुमासाद्य देवेशम् अस्तावीन्नीललोहितम् ॥ (४।३)

तपसा च विनीताय प्रहृष्टः प्रददौ भवः । (५।१)

दिव्यं दर्शनमीशानस् तेनापश्यत् तम् अव्ययम् ॥ (५।२)

नत्वा सम्पूज्य विधिना कृताञ्जलिपुटः स्थितः । (६।१)

हर्षगद्गदया वाचा प्रोवाच च ननाम च ॥ (६।२)

देवदेव जगन्नाथ नमस्ते भुवनेश्वर । (७।१)

जीवच्छ्राद्धं महादेव प्रसादेन विनिर्मितम् ॥ (७।२)

पूजितश् च ततो देवो दृष्टश् चैव मयाधुना । (८।१)

शक्राय कथितं पूर्वं धर्मकामार्थमोक्षदम् ॥ (८।२)

जयाभिषेकं देवेश वक्तुमर्हसि मे प्रभो । (९।१)

सूत उवाच । (९।२)

तस्मै देवो महादेवो भगवान्नीललोहितः ॥ (९।३)

जयाभिषेकमखिलमवदत्परमेश्वरः । (१०।१)

श्रीभगवानुवाच । (१०।२)

जयाभिषेकं वक्ष्यामि नृपाणां हितकाम्यया ॥ (१०।३)

अपमृत्युजयार्थं च सर्वशत्रुजयाय च । (११।१)

युद्धकाले तु सम्प्राप्ते कृत्वैवमभिषेचनम् ॥ (११।२)

स्वपतिं चाभिषिच्यैव गच्छेद्योद्धुं रणाजिरे । (१२।१)

विधिना मण्डपं कृत्वा प्रपां वा कूटमेव वा ॥ (१२।२)

नवधा स्थापयेद् वह्निं ब्राह्मणो वेदपारगः । (१३।१)

ततः सर्वाभिषेकार्थं सूत्रपातं च कारयेत् ॥ (१३।२)

प्रागाद्यं वर्णसूत्रं च दक्षिणाद्यं तथा पुनः । (१४।१)

सहस्राणां द्वयं तत्र शतानां च चतुष्टयम् ॥ (१४।२)

शेषमेव शुभं कोष्ठं तेषु कोष्ठं तु संहरेत् । (१५।१)

बाह्ये वीथ्यां पदं चैकं समन्तादुपसंहरेत् ॥ (१५।२)

अङ्गसूत्राणि संगृह्य विधिना पृथगेव तु । (१६।१)

प्रागाद्यं वर्णसूत्रं च दक्षिणाद्यं तथा पुनः ॥ (१६।२)

प्रागाद्यं दक्षिणाद्यं च षट्त्रिंशत् संहरेत् क्रमात् । (१७।१)

प्रागाद्याः पङ्क्तयः सप्त दक्षिणाद्यास्तथा पुनः ॥ (१७।२)

तस्मादेकोनपञ्चाशत्पङ्क्तयः परिकीर्तिताः । (१८।१)

नव पङ्क्तीर्हरेन्मध्ये गन्धगोमयवारिणा ॥ (१८।२)

कमलं चालिखेत्तत्र हस्तमात्रेण शोभनम् । (१९।१)

अष्टपत्रं सितं वृत्तं कर्णिकाकेसरान्वितम् ॥ (१९।२)

अष्टाङ्गुलप्रमाणेन कर्णिका हेमसन्निभा । (२०।१)

चतुरङ्गुलमानेन केसरस्थानमुच्यते ॥ (२०।२)

धर्मो ज्ञानं च वैराग्यमैश्वर्यं च यथाक्रमम् । (२१।१)

आग्नेयादिषु कोणेषु स्थापयेत्प्रणवेन तु ॥ (२१।२)

अव्यक्तादीनि वै दिक्षु गात्राकारेण वै न्यसेत् । (२२।१)

अव्यक्तं नियतः कालः काली चेति चतुष्टयम् ॥ (२२।२)

सितरक्तहिरण्याभकृष्णा धर्मादयः क्रमात् । (२३।१)

हंसाकारेण वै गात्रं हेमाभासेन सुव्रताः ॥ (२३।२)

आधारशक्तिमध्ये तु कमलं सृष्टिकारणम् । (२४।१)

बिन्दुमात्रं कलामध्ये नादाकारमतः परम् ॥ (२४।२)

नादोपरि शिवं ध्यायेद् ॐकाराख्यं जगद्गुरुम् । (२५।१)

मनोन्मनीं च पद्माभं महादेवं च भावयेत् ॥ (२५।२)

वामादयः क्रमेणैव प्रागाद्याः केसरेषु वै । (२६।१)

वामा ज्येष्ठा तथा रौद्री काली विकरणी तथा ॥ (२६।२)

बला प्रमथिनी देवी दमनी च यथाक्रमम् । (२७।१)

वामदेवादिभिः सार्धं प्रणवेनैव विन्यसेत् ॥ (२७।२)

नमो ऽस्तु वामदेवाय नमो ज्येष्ठाय शूलिने ॥ (२८।१)

रुद्राय कालरूपाय कलाविकरणाय च । (२९।१)

बलाय च तथा सर्वभूतस्य दमनाय च ॥ (२९।२)

मनोन्मनाय देवाय मनोन्मन्यै नमोनमः । (३०।१)

मन्त्रैरेतैर्यथान्यायं पूजयेत्परिमण्डलम् ॥ (३०।२)

प्रथमावरणं प्रोक्तं द्वितीयावरणं शृणु । (३१।१)

द्वितीयावरणे चैव शक्तयः षोडशैव तु ॥ (३१।२)

तृतीयावरणे चैव चतुर्विंशद् अनुक्रमात् । (३२।१)

पिशाचवीथिर् वै मध्ये नाभिवीथिः समन्ततः ॥ (३२।२)

मन्त्रैरेतैर्यथान्यायं पिशाचानां प्रकीर्तिताः । (३३।१)

अष्टोत्तरसहस्रं तु पदमष्टारसंयुतम् ॥ (३३।२)

तेषु तेषु पृथक्त्वेन पदेषु कमलं क्रमात् । (३४।१)

कल्पयेच्छालिनीवारगोधूमैश्च यवादिभिः ॥ (३४।२)

तण्डुलैश्च तिलैर्वाथ गौरसर्षपसंयुतैः । (३५।१)

अथवा कल्पयेदेतैर्यथाकालं विधानतः ॥ (३५।२)

अष्टपत्रं लिखेत्तेषु कर्णिकाकेसरान्वितम् । (३६।१)

शालीनामाढकं प्रोक्तं कमलानां पृथक् पृथक् ॥ (३६।२)

तण्डुलानां तदर्धं स्यात्तदर्धं च यवादयः । (३७।१)

द्रोणं प्रधानकुंभस्य तदर्धं तण्डुलाः स्मृताः ॥ (३७।२)

तिलानामाढकं मध्ये यवानां च तदर्धकम् । (३८।१)

अथांभसा समभ्युक्ष्य कमलं प्रणवेन तु ॥ (३८।२)

तेषु सर्वेषु विधिना प्रणवं विन्यसेत्क्रमात् । (३९।१)

एवं समाप्य चाभ्युक्ष्य पदसाहस्रमुत्तमम् ॥ (३९।२)

कलशानां सहस्राणि हैमानि च शुभानि च । (४०।१)

उक्तलक्षणयुक्तानि कारयेद्राजतानि वा ॥ (४०।२)

ताम्रजानि यथान्यायं प्रणवेनार्घ्यवारिणा । (४१।१)

द्वादशाङ्गुलविस्तारमुदरे समुदाहृतम् ॥ (४१।२)

वर्तितं तु तदर्धेन नाभिस्तस्य विधीयते । (४२।१)

कण्ठं तु द्व्यङ्गुलोत्सेधं विस्तारं चतुरङ्गुलम् ॥ (४२।२)

ओष्ठं च द्व्यङ्गुलोत्सेधं निर्गमं द्व्यङ्गुलं स्मृतम् । (४३।१)

तत्तद्वै द्विगुणं दिव्यं शिवकुंभे प्रकीर्तितम् ॥ (४३।२)

यवमात्रान्तरं सम्यक् तन्तुना वेष्टयेद्धि वै । (४४।१)

अवगुण्ठ्य तथाभ्युक्ष्य कुशोपरि यथाविधि ॥ (४४।२)

पूर्ववत्प्रणवेनैव पूरयेद्गन्धवारिणा । (४५।१)

स्थापयेच्छिवकुंभाढ्यं वर्धनीं च विधानतः ॥ (४५।२)

मध्यपद्मस्य मध्ये तु सकूर्चं साक्षतं क्रमात् । (४६।१)

आवेष्ट्य वस्त्रयुग्मेन प्रच्छाद्य कमलेन तु ॥ (४६।२)

हैमेन चित्ररत्नेन सहस्रकलशं पृथक् । (४७।१)

शिवकुंभे शिवं स्थाप्य गायत्र्या प्रणवेण च ॥ (४७।२)

विद्महे पुरुषायैव महादेवाय धीमहि । (४८।१)

तन्नो रुद्रः प्रचोदयात् ॥ (४८।२)

मन्त्रेणानेन रुद्रस्य सान्निध्यं सर्वदा स्मृतम् । (४९।१)

वर्धन्यां देवीगायत्र्या देवीं संस्थाप्य पूजयेत् ॥ (४९।२)

गणांबिकायै विद्महे महातपायै धीमहि । (५०।१)

तन्नो गौरी प्रचोदयात् ॥ (५०।२)

प्रथमावरणे चैव वामाद्याः परिकीर्तिताः । (५१।१)

प्रथमावरणं प्रोक्तं द्वितीयावरणं शृणु ॥ (५१।२)

शक्तयः षोडशैवात्र पूर्वाद्यान्तेषु सुव्रत । (५२।१)

ऐन्द्रव्यूहस्य मध्ये तु सुभद्रां स्थाप्य पूजयेत् ॥ (५२।२)

भद्रामाग्नेयचक्रे तु याम्ये तु कनकाण्डजाम् । (५३।१)

अंबिकां नैरृते व्यूहे मध्यकुंभे तु पूजयेत् ॥ (५३।२)

श्रीदेवीं वारुणे भागे वागीशां वायुगोचरे । (५४।१)

गोमुखीं सौम्यभागे तु मध्यकुंभे तु पूजयेत् ॥ (५४।२)

रुद्रव्यूहस्य मध्ये तु भद्रकर्णां समर्चयेत् । (५५।१)

ऐन्द्राग्निविदिशोर् मध्ये पूजयेद् अणिमां शुभाम् ॥ (५५।२)

याम्यपावकयोर्मध्ये लघिमां कमले न्यसेत् । (५६।१)

राक्षसान्तकयोर् मध्ये महिमां मध्यतो यजेत् ॥ (५६।२)

वरुणासुरयोर्मध्ये प्राप्तिं वै मध्यतो यजेत् । (५७।१)

वरुणानिलयोर्मध्ये प्राकाम्यं कमले न्यसेत् ॥ (५७।२)

वित्तेशानिलयोर्मध्ये ईशित्वं स्थाप्य पूजयेत् । (५८।१)

वित्तेशेशानयोर्मध्ये वशित्वं स्थाप्य पूजयेत् ॥ (५८।२)

ऐन्द्रेशेशानयोर् मध्ये यजेत् कामावसायकम् । (५९।१)

द्वितीयावरणं प्रोक्तं तृतीयावरणं शृणु ॥ (५९।२)

शक्तयस्तु चतुर्विंशत्प्रदानकलशेषु च । (६०।१)

पूजयेद्व्यूहमध्ये तु पूर्ववद्विधिपूर्वकम् ॥ (६०।२)

दीक्षां दीक्षायिकां चैव चण्डां चण्डांशुनायिकाम् । (६१।१)

सुमतिं सुमत्यायीं च गोपां गोपायिकां तथा ॥ (६१।२)

अथ नन्दं च नन्दायीं पितामहमतः परम् । (६२।१)

पितामहायीं पूर्वाद्यं विधिना स्थाप्य पूजयेत् ॥ (६२।२)

एवं सम्पूज्य विधिना तृतीयावरणं शुभम् । (६३।१)

सौभद्रं व्यूहमासाद्य प्रथमावरणे क्रमात् ॥ (६३।२)

प्रागाद्यं विधिना स्थाप्य शक्त्यष्टकमनुक्रमात् । (६४।१)

द्वितीयावरणे चैव प्रागाद्यं शृणु शक्तयः ॥ (६४।२)

षोडशैव तु अभ्यर्च्य पद्ममुद्रां तु दर्शयेत् । (६५।१)

बिन्दुका बिन्दुगर्भा च नादिनी नादगर्भजा ॥ (६५।२)

शक्तिका शक्तिगर्भा च परा चैव परापरा । (६६।१)

प्रथमावरणे ऽष्टौ च शक्तयः परिकीर्तिताः ॥ (६६।२)

चण्डा चण्डमुखी चैव चण्डवेगा मनोजवा । (६७।१)

चण्डाक्षी चण्डनिर्घोषा भृकुटी चण्डनायिका ॥ (६७।२)

मनोत्सेधा मनोध्यक्षा मानसी माननायिका । (६८।१)

मनोहरी मनोह्लादी मनःप्रीतिर्महेश्वरी ॥ (६८।२)

द्वितीयावरणे चैव षोडशैव प्रकीर्तिताः । (६९।१)

सौभद्रः कथितो व्यूहो भद्रं व्यूहं शृणुष्व मे ॥ (६९।२)

ऐन्द्री हौताशनी याम्या नैरृती वारुणी तथा । (७०।१)

वायव्या चैव कौबेरी ऐशानी चाष्टशक्तयः ॥ (७०।२)

प्रथमावरणं प्रोक्तं द्वितीयावरणं शृणु । (७१।१)

हरिणी च सुवर्णा च काञ्चनी हाटकी तथा ॥ (७१।२)

रुक्मिणी सत्यभामा च सुभगा जम्बुनायिका । (७२।१)

वाग्भवा वाक्पथा वाणी भीमा चित्ररथा सुधीः ॥ (७२।२)

वेदमाता हिरण्याक्षी द्वितीयावरणे स्मृताः । (७३।१)

भद्राख्यः कथितो व्यूहः कनकाख्यं शृणुष्व मे ॥ (७३।२)

वज्रं शक्तिं च दण्डं च खड्गं पाशं ध्वजं तथा । (७४।१)

गदां त्रिशूलं क्रमशः प्रथमावरणे स्मृताः ॥ (७४।२)

युद्धा प्रबुद्धा चण्डा च मुण्डा चैव कपालिनी । (७५।१)

मृत्युहन्त्री विरूपाक्षी कपर्दा कमलासना ॥ (७५।२)

दंष्ट्रिणी रङ्गिणी चैव लम्बाक्षी कङ्कभूषणी । (७६।१)

सम्भावा भाविनी चैव षोडशैव प्रकीर्तिताः ॥ (७६।२)

कथितः प्रथमव्यूहो ह्यम्बिकाख्यं शृणुष्व मे । (७७।१)

खेचरी चात्मना सा च भवानी वह्निरूपिणी ॥ (७७।२)

वह्निनी वह्निनाभा च महिमामृतलालसा । (७८।१)

प्रथमावरणे चाष्टौ शक्तयः सर्वसंमताः ॥ (७८।२)

क्षमा च शिखरा देवी ऋतुरत्ना शिला तथा । (७९।१)

छाया भूतपती धन्या इन्द्रमाता च वैष्णवी ॥ (७९।२)

तृष्णा रागवती मोहा कामकोपा महोत्कटा । (८०।१)

इन्द्रा च बधिरा देवी षोडशैताः प्रकीर्तिताः ॥ (८०।२)

कथितश्चांबिकाव्यूहः श्रीव्यूहं शृणु सुव्रत । (८१।१)

स्पर्शा स्पर्शवती गन्धा प्राणापाना समानिका ॥ (८१।२)

उदाना व्याननामा च प्रथमावरणे स्मृताः । (८२।१)

तमोहता प्रभामोघा तेजिनी दहनी तथा ॥ (८२।२)

भीमास्या जालिनी चोषा शोषिणी रुद्रनायिका । (८३।१)

वीरभद्रा गणाध्यक्षा चन्द्रहासा च गह्वरा ॥ (८३।२)

गणमाताम्बिका चैव शक्तयः सर्वसंमताः । (८४।१)

द्वितीयावरणे प्रोक्ताः षोडशैव यथाक्रमात् ॥ (८४।२)

श्रीव्यूहः कथितो भद्रं वागीशं शृणु सुव्रत । (८५।१)

धारा वारिधरा चैव वह्निकी नाशकी तथा ॥ (८५।२)

मर्त्यातीता महामाया वज्रिणी कामधेनुका । (८६।१)

प्रथमावरणे ऽप्येवं शक्तयो ऽष्टौ प्रकीर्तिताः ॥ (८६।२)

पयोष्णी वारुणी शान्ता जयन्ती च वरप्रदा । (८७।१)

प्लाविनी जलमाता च पयोमाता महाम्बिका ॥ (८७।२)

रक्ता कराली चण्डाक्षी महोच्छुष्मा पयस्विनी । (८८।१)

माया विद्येश्वरी काली कालिका च यथाक्रमम् ॥ (८८।२)

षोडशैव समाख्याताः शक्तयः सर्वसंमताः । (८९।१)

व्यूहो वागीश्वरः प्रोक्तो गोमुखो व्यूह उच्यते ॥ (८९।२)

शङ्खिनी हालिनी चैव लङ्कावर्णा च कल्किनी । (९०।१)

यक्षिणी मालिनी चैव वमनी च रसात्मनी ॥ (९०।२)

प्रथमावरणे चैव शक्तयो ऽष्टौ प्रकीर्तिताः । (९१।१)

चण्डा घण्टा महानादा सुमुखी दुर्मुखी बला ॥ (९१।२)

रेवती प्रथमा घोरा सैन्या लीना महाबला । (९२।१)

जया च विजया चैव अपरा चापराजिता ॥ (९२।२)

द्वितीयावरणे चैव शक्तयः षोडशैव तु । (९३।१)

कथितो गोमुखीव्यूहो भद्रकर्णीं शृणुष्व मे ॥ (९३।२)

महाजया विरूपाक्षी शुक्लाभा काशमातृका । (९४।१)

संहारी जातहारी च दंष्ट्राली शुष्करेवती ॥ (९४।२)

प्रथमावरणे चाष्टौ शक्तयः परिकीर्तिताः । (९५।१)

पिपीलिका पुण्यहारी अशनी सर्वहारिणी ॥ (९५।२)

भद्रहा विश्वहारी च हिमा योगेश्वरी तथा । (९६।१)

छिद्रा भानुमती छिद्रा सैंहिकी सुरभी समा ॥ (९६।२)

सर्वभव्या च वेगाख्या शक्तयः षोडशैव तु । (९७।१)

महाव्यूहाष्टकं प्रोक्तम् उपव्यूहाष्टकं शृणु ॥ (९७।२)

अणिमाव्यूहम् आवेष्ट्य प्रथमावरणे क्रमात् । (९८।१)

ऐन्द्रा तु चित्रभानुश्च वारुणी दण्डिरेव च ॥ (९८।२)

प्राणरूपी तथा हंसः स्वात्मशक्तिः पितामहः । (९९।१)

प्रथमावरणं प्रोक्तं द्वितीयावरणं शृणु ॥ (९९।२)

केशवो भगवान् रुद्रश्चन्द्रमा भास्करस्तथा । (१००।१)

महात्मा च तथा ह्यात्मा ह्यन्तरात्मा महेश्वरः ॥ (१००।२)

परमात्मा ह्यणुर्जीवः पिङ्गलः पुरुषः पशुः । (१०१।१)

भोक्ता भूतपतिर्भीमो द्वितीयावरणे स्मृताः ॥ (१०१।२)

कथितश् चाणिमाव्यूहो लघिमाख्यं वदामि ते । (१०२।१)

श्रीकण्ठोऽन्तश्च सूक्ष्मश्च त्रिमूर्तिः शशकस्तथा ॥ (१०२।२)

अमरेशः स्थितीशश्च दारतश्च तथाष्टमः । (१०३।१)

प्रथमावरणं प्रोक्तं द्वितीयावरणं शृणु ॥ (१०३।२)

स्थाणुर्हरश्च दण्डेशो भौक्तीशः सुरपुङ्गवः । (१०४।१)

सद्योजातो ऽनुग्रहेशः क्रूरसेनः सुरेश्वरः ॥ (१०४।२)

क्रोधीशश्च तथा चण्डः प्रचण्डः शिव एव च । (१०५।१)

एकरुद्रस्तथा कूर्मश्चैकनेत्रश्चतुर्मुखः ॥ (१०५।२)

द्वितीयावरणे रुद्राः षोडशैव प्रकीर्तिताः । (१०६।१)

कथितो लघिमाव्यूहो महिमां शृणु सुव्रत ॥ (१०६।२)

अजेशः क्षेमरुद्रश्च सोमो ऽंशो लाङ्गली तथा । (१०७।१)

दण्डारुश् चार्धनारी च एकान्तश्चान्त एव च ॥ (१०७।२)

पाली भुजङ्गनामा च पिनाकी खड्गिर् एव च । (१०८।१)

काम ईशस्तथा श्वेतो भृगुः षोडश वै स्मृताः ॥ (१०८।२)

कथितो महिमाव्यूहः प्राप्तिव्यूहं शृणुष्व मे । (१०९।१)

संवर्तो लकुलीशश्च वाडवो हस्तिर् एव च ॥ (१०९।२)

चण्डयक्षो गणपतिर्महात्मा भृगुजो ऽष्टमः । (११०।१)

प्रथमावरणं प्रोक्तं द्वितीयावरणं शृणु ॥ (११०।२)

त्रिविक्रमो महाजिह्व ऋक्षः श्रीभद्र एव च । (१११।१)

महादेवो दधीचश्च कुमारश्च परावरः ॥ (१११।२)

महादंष्ट्रः करालश्च सूचकश्च सुवर्धनः । (११२।१)

महाध्वाङ्क्षो महानन्दो दण्डी गोपालकस्तथा ॥ (११२।२)

प्राप्तिव्यूहः समाख्यातः प्राकाम्यं शृणु सुव्रत । (११३।१)

पुष्पदन्तो महानागो विपुलानन्दकारकः ॥ (११३।२)

शुक्लो विशालः कमलो बिल्वश्चारुण एव च । (११४।१)

प्रथमावरणं प्रोक्तं द्वितीयावरणं शृणु ॥ (११४।२)

रतिप्रियः सुरेशानश्चित्राङ्गश्च सुदुर्जयः । (११५।१)

विनायकः क्षेत्रपालो महामोहश्च जङ्गलः ॥ (११५।२)

वत्सपुत्रो महापुत्रो ग्रामदेशाधिपस्तथा । (११६।१)

सर्वावस्थाधिपो देवो मेघनादः प्रचण्डकः ॥ (११६।२)

कालदूतश्च कथितो द्वितीयावरणं स्मृतम् । (११७।१)

प्राकाम्यः कथितो व्यूह ऐश्वर्यं कथयामि ते ॥ (११७।२)

मङ्गला चर्चिका चैव योगेशा हरदायिका । (११८।१)

भासुरा सुरमाता च सुन्दरी मातृकाष्टमी ॥ (११८।२)

प्रथमावरणे प्रोक्ता द्वितीयावरणं शृणु । (११९।१)

गणाधिपश्च मन्त्रज्ञो वरदेवः षडाननः ॥ (११९।२)

विदग्धश्च विचित्रश्च अमोघो मोघ एव च । (१२०।१)

अश्वीरुद्रश्च सोमेशश् चोत्तमोदुम्बरस्तथा ॥ (१२०।२)