ऋषय ऊचुः । (१।१)

श्रुता वज्रेश्वरी विद्या ब्राह्मी शक्रोपकारिणी । (१।२)

अनया सर्वकार्याणि नृपाणामिति नः श्रुतम् ॥ (१।३)

विनियोगं वदस्वास्या विद्याया रोमहर्षण । (२।१)

सूत उवाच । (२।२)

वश्यमाकर्षणं चैव विद्वेषणमतः परम् ॥ (२।३)

उच्चाटनं स्तम्भनं च मोहनं ताडनं तथा । (३।१)

उत्सादनं तथा छेदं मारणं प्रतिबन्धनम् ॥ (३।२)

सेनास्तंभनकादीनि सावित्र्या सर्वमाचरेत् । (४।१)

आगच्छ वरदे देवि भूम्यां पर्वतमूर्धनि ॥ (४।२)

ब्राह्मणेभ्यो ह्यनुज्ञाता गच्छ देवि यथासुखम् । (५।१)

उद्वास्यानेन मन्त्रेण गन्तव्यं नान्यथा द्विजाः ॥ (५।२)

प्रतिकार्यं तथा बाह्यं कृत्वा वश्यादिकां क्रियाम् । (६।१)

उद्वास्य वह्निमाधाय पुनरन्यं यथाविधि ॥ (६।२)

देवीमावाह्य च पुनर् जपेत् सम्पूजयेत् पुनः । (७।१)

होमं च विधिना वह्नौ पुनरेव समाचरेत् ॥ (७।२)

सर्वकार्याणि विधिना साधयेद्विद्यया पुनः । (८।१)

जातीपुष्पैश्च वश्यार्थी जुहुयादयुतत्रयम् ॥ (८।२)

घृतेन करवीरेण कुर्यादाकर्षणं द्विजाः । (९।१)

विद्वेषणं विशेषेण कुर्याल्लाङ्गलकस्य च ॥ (९।२)

तैलेनोच्चाटनं प्रोक्तं स्तंभनं मधुना स्मृतम् । (१०।१)

तिलेन मोहनं प्रोक्तं ताडनं रुधिरेण च ॥ (१०।२)

खरस्य च गजस्याथ उष्ट्रस्य च यथाक्रमम् । (११।१)

स्तंभनं सर्षपेणापि पाटनं च कुशेन च ॥ (११।२)

मारणोच्चाटने चैव रोहीबीजेन सुव्रताः । (१२।१)

बन्धनं त्वहिपत्त्रेण सेनास्तंभमतः परम् ॥ (१२।२)

कुनट्या नियतं विद्यात्पूजयेत्परमेश्वरीम् । (१३।१)

घृतेन सर्वसिद्धिः स्यात्पयसा वा विशुध्यते ॥ (१३।२)

तिलेन रोगनाशश्च कमलेन धनं भवेत् । (१४।१)

कान्तिर्मधूकपुष्पेण सावित्र्या ह्ययुतत्रयम् ॥ (१४।२)

जयादिप्रभृतीन्सर्वान् स्विष्टान्तं पूर्ववत्स्मृतम् । (१५।१)

एवं संक्षेपतः प्रोक्तो विनियोगो ऽतिविस्तृतः ॥ (१५।२)

जपेद्वा केवलां विद्यां सम्पूज्य च विधानतः । (१६।१)

सर्वसिद्धिमवाप्नोति नात्र कार्या विचारणा ॥ (१६।२)

इति श्रीलिङ्गमहापुराणे उत्तरभागे द्विपञ्चाशत्तमो ऽध्यायः ॥ (१७।१)