सनत्कुमार उवाच । (१।१)

लोकपालाष्टकं दिव्यं साक्षात्परमदुर्लभम् । (१।२)

सर्वसंपत्करं गुह्यं परचक्रविनाशनम् ॥ (१।३)

स्वदेशरक्षणं दिव्यं गजवाजिविवर्धनम् । (२।१)

पुत्रवृद्धिकरं पुण्यं गोब्राह्मणहितावहम् ॥ (२।२)

पूर्वोक्तदेशकाले तु वेदिकोपरिमण्डले । (३।१)

मध्ये शिवं समभ्यर्च्य यथान्यायं यथाक्रमम् ॥ (३।२)

दिग्विदिक्षु प्रकर्तव्यं स्थण्डिलं वालुकामयम् । (४।१)

अष्टौ विप्रान्समभ्यर्च्य वेदवेदाङ्गपारगान् ॥ (४।२)

जितेन्द्रियान् कुलोद्भूतान् सर्वलक्षणसंयुतान् । (५।१)

शिवाभिमुखम् आसीनान् आहतेष्वंबरेषु च ॥ (५।२)

वस्त्रैर् आभरणैर् दिव्यैर् लोकपालकमन्त्रकैः । (६।१)

गन्धपुष्पैः सुधूपैश्च ब्राह्मणानर्चयेत्क्रमात् ॥ (६।२)

पूर्वतो होमयेदग्नौ लोकपालकमन्त्रकैः । (७।१)

समिद्घृताभ्यां होतव्यमग्निकार्यं क्रमेण वा ॥ (७।२)

एवं हुत्वा विधानेन आचार्यः शिववत्सलः । (८।१)

यजमानं समाहूय सर्वाभरणभूषितान् ॥ (८।२)

तेन तान्पूजयित्वाथ द्विजेभ्यो दापयेद्धनम् । (९।१)

पृथक्पृथक्तन्मन्त्रैश्च दशनिष्कं च भूषणम् ॥ (९।२)

दशनिष्केण कर्तव्यमासनं केवलं पृथक् । (१०।१)

स्नपनं तत्र कर्तव्यं शिवस्य विधिपूर्वकम् ॥ (१०।२)

दक्षिणा च प्रदातव्या यथाविभवविस्तरम् । (११।१)

एवं यः कुरुते दानं लोकेशानां तु भक्तितः । (११।२)

लोकेशानां चिरं स्थित्वा सार्वभौमो भवेद्बुधः ॥ (११।३)

इति श्रीलिङ्गमहापुराणे उत्तरभागे त्रिचत्वारिंशो ऽध्यायः ॥ (१२।१)