शैलादिरुवाच । (१।१)

तं प्रभुं प्रीतमनसं प्रणिपत्य वृषध्वजम् । (१।२)

अपृच्छन्मुनयो देवाः प्रीतिकण्टकितत्वचः ॥ (१।३)

देवा ऊचुः । (२।१)

भगवान् केन मार्गेण पूजनीयो द्विजातिभिः । (२।२)

कुत्र वा केन रूपेण वक्तुमर्हसि शङ्कर ॥ (२।३)

कस्याधिकारः पूजायां ब्राह्मणस्य कथं प्रभो । (३।१)

क्षत्रियाणां कथं देव वैश्यानां वृषभध्वज ॥ (३।२)

स्त्रीशूद्राणां कथं वापि कुण्डगोलादिनां तु वा । (४।१)

हिताय जगतां सर्वमस्माकं वक्तुमर्हसि ॥ (४।२)

सूत उवाच । (५।१)

तेषां भावं समालोक्य मुनीनां नीललोहितः । (५।२)

प्राह गंभीरया वाचा मण्डलस्थः सदाशिवः ॥ (५।३)

मण्डले चाग्रतः पश्यन्देवदेवं सहोमया । (६।१)

देवाश्च मुनयः सर्वे विद्युत्कोटिसमप्रभम् ॥ (६।२)

देस्च्रिप्तिओन् ओड़् शिवअष्टबाहुं चतुर्वक्त्रं द्वादशाक्षं महाभुजम् । (७।१)

अर्धनारीश्वरं देवं जटामुकुटधारिणम् ॥ (७।२)

सर्वाभरणसंयुक्तं रक्तमाल्यानुलेपनम् । (८।१)

रक्तांबरधरं सृष्टिस्थितिसंहारकारकम् ॥ (८।२)

तस्य पूर्वमुखं पीतं प्रसन्नं पुरुषात्मकम् । (९।१)

अघोरं दक्षिणं वक्त्रं नीलाञ्जनचयोपमम् ॥ (९।२)

दंष्ट्राकरालमत्युग्रं ज्वालामालासमावृतम् । (१०।१)

रक्तश्मश्रुं जटायुक्तं चोत्तरे विद्रुमप्रभम् ॥ (१०।२)

प्रसन्नं वामदेवाख्यं वरदं विश्वरूपिणम् । (११।१)

पश्चिमं वदनं तस्य गोक्षीरधवलं शुभम् ॥ (११।२)

मुक्ताफलमयैर्हारैर्भूषितं तिलकोज्ज्वलम् । (१२।१)

सद्योजातमुखं दिव्यं भास्करस्य स्मरारिणः ॥ (१२।२)

आदित्यम् अग्रतः पश्यन्पूर्ववच्चतुराननम् । (१३।१)

भास्करं पुरतो देवं चतुर्वक्त्रं च पूर्ववत् ॥ (१३।२)

भानुं दक्षिणतो देवं चतुर्वक्त्रं च पूर्ववत् । (१४।१)

रविमुत्तरतो ऽपश्यन्पूर्ववच्चतुराननम् ॥ (१४।२)

शिवस् शक्तिस्विस्तारां मण्डले पूर्वे उत्तरां दक्षिणे स्थिताम् । (१५।१)

बोधनीं पश्चिमे भागे मण्डलस्य प्रजापतेः ॥ (१५।२)

अध्यायनीं च कौबेर्यामेकवक्त्रां चतुर्भुजाम् । (१६।१)

सर्वाभरणसम्पन्नाः शक्तयः सर्वसंमताः ॥ (१६।२)

ब्रह्माणं दक्षिणे भागे विष्णुं वामे जनार्दनम् । (१७।१)

ऋग्यजुःसाममार्गेण मूर्तित्रयमयं शिवम् ॥ (१७।२)

ईशानं वरदं देवमीशानं परमेश्वरम् । (१८।१)

ब्रह्मासनस्थं वरदं धर्मज्ञानासनोपरि ॥ (१८।२)

वैराग्यैश्वर्यसंयुक्ते प्रभूते विमले तथा । (१९।१)

सारं सर्वेश्वरं देवमाराध्यं परमं सुखम् ॥ (१९।२)

सितपङ्कजमध्यस्थं दीप्ताद्यैर् अभिसंवृतम् । (२०।१)

दीप्तां दीपशिखाकारां सूक्ष्मां विद्युत्प्रभां शुभाम् ॥ (२०।२)

जयाम् अग्निशिखाकारां प्रभां कनकसप्रभाम् । (२१।१)

विभूतिं विद्रुमप्रख्यां विमलां पद्मसन्निभाम् ॥ (२१।२)

अमोघां कर्णिकाकारां विद्युतं विश्ववर्णिनीम् । (२२।१)

चतुर्वक्त्रां चतुर्वर्णां देवीं वै सर्वतोमुखीम् ॥ (२२।२)

सोममङ्गारकं देवं बुधं बुद्धिमतां वरम् । (२३।१)

बृहस्पतिं बृहद्बुद्धिं भार्गवं तेजसां निधिम् ॥ (२३।२)

मन्दं मन्दगतिं चैव समन्तात्तस्य ते सदा । (२४।१)

सूर्यं शिवो जगन्नाथः सोमः साक्षादुमा स्वयम् ॥ (२४।२)

पञ्चभूतानि शेषाणि तन्मयं च चराचरम् । (२५।१)

दृष्ट्वैव मुनयः सर्वे देवदेवमुमापतिम् ॥ (२५।२)

कृताञ्जलिपुटाः सर्वे मुनयो देवतास्तथा । (२६।१)

अस्तुवन् वाग्भिर् इष्टाभिर् वरदं नीललोहितम् ॥ (२६।२)

ऋषय ऊचुः । (२७।१)

भावना ओड़् अन् इमगे ओड़् शिवनमः शिवाय रुद्राय कद्रुद्राय प्रचेतसे । (२७।२)

मीढुष्टमाय शर्वाय शिपिविष्टाय रंहसे ॥ (२७।३)

प्रभूते विमले सारे ह्याधारे परमे सुखे । (२८।१)

नवशक्त्यावृतं देवं पद्मस्थं भास्करं प्रभुम् ॥ (२८।२)

आदित्यं भास्करं भानुं रविं देवं दिवाकरम् । (२९।१)

उमां प्रभां तथा प्रज्ञां संध्यां सावित्रिकामपि ॥ (२९।२)

विस्ताराम् उत्तरां देवीं बोधनीं प्रणमाम्यहम् । (३०।१)

आप्यायनीं च वरदां ब्रह्माणं केशवं हरम् ॥ (३०।२)

सोमादिवृन्दं च यथाक्रमेण सम्पूज्य मन्त्रैर्विहितक्रमेण । (३१।१)

स्मरामि देवं रविमण्डलस्थं सदाशिवं शङ्करमादिदेवम् ॥ (३१।२)

इन्द्रादिदेवांश्च तथेश्वरांश्च नारायणं पद्मजमादिदेवम् । (३२।१)

प्रागाद्यधोर्ध्वं च यथाक्रमेण वज्रादिपद्मं च तथा स्मरामि ॥ (३२।२)

सिंदूरवर्णाय समण्डलाय सुवर्णवज्राभरणाय तुभ्यम् । (३३।१)

पद्माभनेत्राय सपङ्कजाय ब्रह्मेन्द्रनारायणकारणाय ॥ (३३।२)

रथं च सप्ताश्वमनूरुवीरं गणं तथा सप्तविधं क्रमेण । (३४।१)

ऋतुप्रवाहेण च वालखिल्यान् स्मरामि मन्देहगणक्षयं च ॥ (३४।२)

हुत्वा तिलाद्यैर् विविधैस् तथाग्नौ पुनः समाप्यैव तथैव सर्वम् । (३५।१)

उद्वास्य हृत्पङ्कजमध्यसंस्थं स्मरामि बिंबं तव देवदेव ॥ (३५।२)

स्मरामि बिंबानि यथाक्रमेण रक्तानि पद्मामललोचनानि । (३६।१)

पद्मं च सव्ये वरदं च वामे करे तथा भूषितभूषणानि ॥ (३६।२)

दंष्ट्राकरालं तव दिव्यवक्त्रं विद्युत्प्रभं दैत्यभयङ्करं च । (३७।१)

स्मरामि रक्षाभिरतं द्विजानां मन्देहरक्षोगणभर्त्सनं च ॥ (३७।२)

सोमं सितं भूमिजम् अग्निवर्णं चामीकराभं बुधमिन्दुसूनुम् । (३८।१)

बृहस्पतिं काञ्चनसंनिकाशं शुक्रं सितं कृष्णतरं च मन्दम् ॥ (३८।२)

स्मरामि सव्यमभयं वाममूरुगतं वरम् । (३९।१)

सर्वेषां मन्दपर्यन्तं महादेवं च भास्करम् ॥ (३९।२)

पूर्णेन्दुवर्णेन च पुष्पगन्धप्रस्थेन तोयेन शुभेन पूर्णम् । (४०।१)

पात्रं दृढं ताम्रमयं प्रकल्प्य दास्ये तवार्घ्यं भगवन्प्रसीद ॥ (४०।२)

नमः शिवाय देवाय ईश्वराय कपर्दिने । (४१।१)

रुद्राय विष्णवे तुभ्यं ब्रह्मणे सूर्यमूर्तये ॥ (४१।२)

सूत उवाच । (४२।१)

यः शिवं मण्डले देवं सम्पूज्यैवं समाहितः । (४२।२)

प्रातर्मध्याह्नसायाह्ने पठेत्स्तवमनुत्तमम् ॥ (४२।३)

इत्थं शिवेन सायुज्यं लभते नात्र संशयः ॥ (४३।१)

इति श्रीलिङ्गमहापुराणे उत्तरभागे एकोनविंशोऽध्यायः ॥ (४४।१)