सनत्कुमार उवाच । (१।१)

भूयो देवगणश्रेष्ठ शिवमाहात्म्यमुत्तमम् । (१।२)

शृण्वतो नास्ति मे तृप्तिस् त्वद्वाक्यामृतपानतः ॥ (१।३)

कथं शरीरी भगवान् कस्माद्रुद्रः प्रतापवान् । (२।१)

सर्वात्मा च कथं शम्भुः कथं पाशुपतं व्रतम् ॥ (२।२)

कथं वा देवमुख्यैश्च श्रुतो दृष्टश्च शङ्करः । (३।१)

शैलादिरुवाच । (३।२)

अव्यक्तादभवत्स्थाणुः शिवः परमकारणम् ॥ (३।३)

स सर्वकारणोपेत ऋषिर् विश्वाधिकः प्रभुः । (४।१)

देवानां प्रथमं देवं जायमानं मुखाम्बुजात् ॥ (४।२)

ददर्श चाग्रे ब्रह्माणं चाज्ञया तमवैक्षत । (५।१)

दृष्टो रुद्रेण देवेशः ससर्ज सकलं च सः ॥ (५।२)

वर्णाश्रमव्यवस्थाश्च स्थापयामास वै विराट् । (६।१)

सोमं ससर्ज यज्ञार्थं सोमादिदमजायत ॥ (६।२)

चरुश्च वह्निर्यज्ञश्च वज्रपाणिः शचीपतिः । (७।१)

विष्णुर्नारायणः श्रीमान् सर्वं सोममयं जगत् ॥ (७।२)

रुद्राध्यायेन ते देवा रुद्रं तुष्टुवुरीश्वरम् । (८।१)

प्रसन्नवदनस्तस्थौ देवानां मध्यतः प्रभुः ॥ (८।२)

अपहृत्य च विज्ञानमेषामेव महेश्वरः । (९।१)

देवा ह्यपृच्छंस्तं देवं को भवानिति शङ्करम् ॥ (९।२)

अब्रवीद्भगवान्रुद्रो ह्यहमेकः पुरातनः । (१०।१)

आसं प्रथम एवाहं वर्तामि च सुरोत्तमाः ॥ (१०।२)

भविष्यामि च लोके ऽस्मिन्मत्तो नान्यः कुतश्चन । (११।१)

व्यतिरिक्तं न मत्तो ऽस्ति नान्यत् किंचित् सुरोत्तमाः ॥ (११।२)

नित्यो ऽनित्यो ऽहमनघो ब्रह्माहं ब्रह्मणस्पतिः । (१२।१)

दिशश्च विदिशश्चाहं प्रकृतिश्च पुमानहम् ॥ (१२।२)

त्रिष्टुब्जगत्यनुष्टुप् च छन्दोऽहं तन्मयः शिवः । (१३।१)

सत्योऽहं सर्वगः शान्तस्त्रेताग्निर्गौरवं गुरुः ॥ (१३।२)

गौरहं गह्वरश्चाहं नित्यं गहनगोचरः । (१४।१)

ज्येष्ठोऽहं सर्वतत्त्वानां वरिष्ठोऽहम् अपां पतिः ॥ (१४।२)

आपोऽहं भगवानीशस् तेजोऽहं वेदिरप्यहम् । (१५।१)

ऋग्वेदोऽहं यजुर्वेदः सामवेदोऽहम् आत्मभूः ॥ (१५।२)

अथर्वणोऽहं मन्त्रोऽहं तथा चाङ्गिरसां वरः । (१६।१)

इतिहासपुराणानि कल्पोऽहं कल्पनाप्यहम् ॥ (१६।२)

अक्षरं च क्षरं चाहं क्षान्तिः शान्तिरहं क्षमा । (१७।१)

गुह्योऽहं सर्ववेदेषु वरेण्योऽहम् अजोऽप्यहम् ॥ (१७।२)

पुष्करं च पवित्रं च मध्यं चाहं ततः परम् । (१८।१)

बहिश्चाहं तथा चान्तः पुरस्तादहमव्ययः ॥ (१८।२)

ज्योतिश्चाहं तमश्चाहं ब्रह्मा विष्णुर्महेश्वरः । (१९।१)

बुद्धिश्चाहमहङ्कारस्तन्मात्राणीन्द्रियाणि च ॥ (१९।२)

एवं सर्वं च मामेव यो वेद सुरसत्तमाः । (२०।१)

स एव सर्ववित्सर्वं सर्वात्मा परमेश्वरः ॥ (२०।२)

गां गोभिर्ब्राह्मणान् सर्वान् ब्राह्मण्येन हवींषि च । (२१।१)

आयुषायुस्तथा सत्यं सत्येन सुरसत्तमाः ॥ (२१।२)

धर्मं धर्मेण सर्वांश्च तर्पयामि स्वतेजसा । (२२।१)

इत्यादौ भगवानुक्त्वा तत्रैवान्तरधीयत ॥ (२२।२)

नापश्यन्त ततो देवं रुद्रं परमकारणम् । (२३।१)

ते देवाः परमात्मानं रुद्रं ध्यायन्ति शङ्करम् ॥ (२३।२)

सनारायणका देवाः सेन्द्राश्च मुनयस्तथा । (२४।१)

तथोर्ध्वबाहवो देवा रुद्रं स्तुन्वन्ति शंकरम् ॥ (२४।२)

इति श्रीलिङ्गमहापुराणे उत्तरभागे सप्तदशो ऽध्यायः ॥ (२५।१)