सनत्कुमार उवाच । (१।१)

तुला ते कथिता ह्येषा आद्या सामान्यरूपिणी । (१।२)

हिरण्यगर्भं वक्ष्यामि द्वितीयं सर्वसिद्धिदम् ॥ (१।३)

अधः पात्रं सहस्रेण हिरण्येन विधीयते । (२।१)

ऊर्ध्वपात्रं तदर्धेन मुखं संवेशमात्रकम् ॥ (२।२)

हैममेवं शुभं कुर्यात् सर्वालंकारसंयुतम् । (३।१)

अधः पात्रे स्मरेद्देवीं गुणत्रयसमन्विताम् ॥ (३।२)

चतुर्विंशतिकां देवीं ब्रह्मविष्ण्वग्निरूपिणीम् । (४।१)

ऊर्ध्वपात्रे गुणातीतं षड्विंशकम् उमापतिम् ॥ (४।२)

आत्मानं पुरुषं ध्यायेत् पञ्चविंशकम् अग्रजम् । (५।१)

पूर्वोक्तस्थानमध्ये ऽथ वेदिकोपरि मण्डले ॥ (५।२)

शालिमध्ये क्षिपेन्नीत्वा नववस्त्रैश्च वेष्टयेत् । (६।१)

माषकल्केन चालिप्य पञ्चद्रव्येण पूजयेत् ॥ (६।२)

ईशानाद्यैर्यथान्यायं पञ्चभिः परिपूजयेत् । (७।१)

पूर्ववच्छिवपूजा च होमश्चैव यथाक्रमम् ॥ (७।२)

देवीं गायत्रिकां जप्त्वा प्रविशेत्प्राङ्मुखः स्वयम् । (८।१)

विधिनैव तु सम्पाद्य गर्भाधानादिकां क्रियाम् ॥ (८।२)

कृत्वा षोडशमार्गेण विधिना ब्राह्मणोत्तमः । (९।१)

दूर्वाङ्कुरैस्तु कर्तव्या सेचना दक्षिणे पुटे ॥ (९।२)

औदुंबरफलैः सार्धम् एकविंशत्कुशोदकम् । (१०।१)

ईशान्यां तावदेवात्र कुर्यात्सीमन्तकर्मणि ॥ (१०।२)

उद्वहेत्कन्यकां कृत्वा त्रिंशन्निष्केण शोभनाम् । (११।१)

अलंकृत्य तथा हुत्वा शिवाय विनिवेदयेत् ॥ (११।२)

अन्नप्राशनके विद्वान् भोजयेत्पायसादिभिः । (१२।१)

एवं विश्वजितान्ता वै गर्भाधानादिकाः क्रियाः ॥ (१२।२)

शक्तिबीजेन कर्तव्या ब्राह्मणैर्वेदपारगैः । (१३।१)

शेषं सर्वं च विधिवत्तुलाहेमवदाचरेत् ॥ (१३।२)

इति श्रीलिङ्गमहापुराणे उत्तरभागे एकोनत्रिंशो ऽध्यायः ॥ (१४।१)