सनत्कुमार उवाच । (१।१)

अथ ते सम्प्रवक्ष्यामि हेमधेनुविधिक्रमम् । (१।२)

सर्वपापप्रशमनं ग्रहदुर्भिक्षनाशनम् ॥ (१।३)

उपसर्गप्रशमनं सर्वव्याधिनिवारणम् । (२।१)

निष्काणां च सहस्रेण सुवर्णेन तु कारयेत् ॥ (२।२)

तदर्धेनापि वा सम्यक् तदर्धार्धेन वा पुनः । (३।१)

शतेन वा प्रकर्तव्या सर्वरूपगुणान्विता ॥ (३।२)

गोरूपं सुखुरं दिव्यं सर्वलक्षणसंयुतम् । (४।१)

खुराग्रे विन्यसेद्वज्रं शृङ्गे वै पद्मरागकम् ॥ (४।२)

भ्रुवोर्मध्ये न्यसेद्दिव्यं मौक्तिकं मुनिसत्तमाः । (५।१)

वैडूर्येण स्तनाः कार्या लाङ्गूलं नीलतः शुभम् ॥ (५।२)

दन्तस्थाने प्रकर्तव्यः पुष्परागः सुशोभनः । (६।१)

पशुवत्कारयित्वा तु वत्सं कुर्यात्सुशोभनम् ॥ (६।२)

सुवर्णदशनिष्केण सर्वरत्नसुशोभितम् । (७।१)

पूर्वोक्तवेदिकामध्ये मण्डलं परिकल्प्य तु ॥ (७।२)

तन्मध्ये सुरभिं स्थाप्य सवत्सां सर्वतत्त्ववित् । (८।१)

सवत्सां सुरभिं तत्र वस्त्रयुग्मेन वेष्टयेत् ॥ (८।२)

सम्पूजयेद् गां गायत्र्या सवत्सां सुरभिं पुनः । (९।१)

अथैकाग्निविधानेन होमं कुर्याद्यथाविधि ॥ (९।२)

समिदाज्यविधानेन पूर्ववच्छेषमाचरेत् । (१०।१)

शिवपूजा प्रकर्तव्या लिङ्गं स्नाप्य घृतादिभिः ॥ (१०।२)

गामालभ्य च गायत्र्या शिवाया दापयेच्छुभाम् । (११।१)

दक्षिणा च प्रकर्तव्या त्रिंशन्निष्का महामते ॥ (११।२)

इति श्रीलिङ्गमहापुराणे उत्तरभागे हेमधेनुदानविधिनिरूपणं नाम पञ्चत्रिंशो ऽध्यायः ॥ (१२।१)