सनत्कुमार उवाच । (१।१)

अथान्यत् सम्प्रवक्ष्यामि कल्पपादपमुत्तमम् । (१।२)

शतनिष्केण कृत्वैवं सर्वशाखासमन्वितम् ॥ (१।३)

शाखानां विविधं कृत्वा मुक्तादामाद्यलम्बनम् । (२।१)

दिव्यैर्मारकतैश्चैव चाङ्कुराग्रं प्रविन्यसेत् ॥ (२।२)

प्रवालं कारयेद्विद्वान्प्रवालेन द्रुमस्य तु । (३।१)

फलानि पद्मरागैश्च परितो ऽस्य सुशोभयेत् ॥ (३।२)

मूलं च नीलरत्नेन वज्रेण स्कन्धमुत्तमम् । (४।१)

वैडूर्येण द्रुमाग्रं च पुष्परागेण मस्तकम् ॥ (४।२)

गोमेदकेन वै कन्दं सूर्यकान्तेन सुव्रत । (५।१)

चन्द्रकान्तेन वा वेदीं द्रुमस्य स्फटिकेन वा ॥ (५।२)

वितस्तिमात्रमायामं वृक्षस्य परिकीर्तितम् । (६।१)

शाखाष्टकस्य मानं च विस्तारं चोर्ध्वतस्तथा ॥ (६।२)

तन्मूले स्थापयेल्लिङ्गं लोकपालैः समावृतम् । (७।१)

पूर्वोक्तवेदिमध्ये तु मण्डले स्थाप्य पादपम् ॥ (७।२)

पूजयेद् देवम् ईशानं लोकपालांश्च यत्नतः । (८।१)

पूर्ववज्जपहोमाद्यं तुलाभारवदाचरेत् ॥ (८।२)

निवेदयेद्द्रुमं शंभोर्योगिनां वाथ वा नृप । (९।१)

भस्माङ्गिभ्यो ऽथवा राजा सार्वभौमो भविष्यति ॥ (९।२)

इति श्रीलिङ्गमहापुराणे उत्तरभागे कल्पपादपदानविधिर् नाम त्रयस्त्रिंशो ऽध्यायः ॥ (१०।१)