ऋषय ऊचुः । (१।१)

आदित्यवंशं सोमस्य वंशं वंशविदां वर । (१।२)

वक्तुमर्हसि चास्माकं संक्षेपाद् रोमहर्षण ॥ (१।३)

सूत उवाच । (२।१)

अदितिः सुषुवे पुत्रमादित्यं कश्यपाद्द्विजाः । (२।२)

तस्यादित्यस्य चैवासीद् भार्या त्रयम् अथापरम् ॥ (२।३)

संज्ञा राज्ञी प्रभा छाया पुत्रांस्तासां वदामि वः । (३।१)

संज्ञा त्वाष्ट्री च सुषुवे सूर्यान्मनुमनुत्तमम् ॥ (३।२)

यमं च यमुनां चैव राज्ञी रेवतमेव च । (४।१)

प्रभा प्रभातम् आदित्याच्छायां संज्ञाप्यकल्पयत् ॥ (४।२)

छाया च तस्मात्सुषुवे सावर्णिं भास्कराद्द्विजाः । (५।१)

ततः शनिं च तपतीं विष्टिं चैव यथाक्रमम् ॥ (५।२)

छाया स्वपुत्राभ्यधिकं स्नेहं चक्रे मनौ तदा । (६।१)

पूर्वो मनुर्न चक्षाम यमस्तु क्रोधमूर्छितः ॥ (६।२)

संताडयामास रुषा पादमुद्यम्य दक्षिणम् । (७।१)

यमेन ताडिता सा तु छाया वै दुःखिताभवत् ॥ (७।२)

छायाशापात् पदं चैकं यमस्य क्लिन्नमुत्तमम् । (८।१)

पूयशोणितसम्पूर्णं कृमीणां निचयान्वितम् ॥ (८।२)

सोऽपि गोकर्णमाश्रित्य फलकेनानिलाशनः । (९।१)

आराधयन्महादेवं यावद्वर्षायुतायुतम् ॥ (९।२)

भवप्रसादाद् आगत्य लोकपालत्वमुत्तमम् । (१०।१)

पितॄणामाधिपत्यं तु शापमोक्षं तथैव च ॥ (१०।२)

लब्धवान्देवदेवस्य प्रभावाच्छूलपाणिनः । (११।१)

असहन्ती पुरा भानोस् तेजोमयम् अनिन्दिता ॥ (११।२)

रूपं त्वाष्ट्री स्वदेहात्तु छायाख्यां सा त्वकल्पयत् । (१२।१)

वडवारूपमास्थाय तपस्तेपे तु सुव्रता ॥ (१२।२)

कालात्प्रयत्नतो ज्ञात्वा छायां छायापतिः प्रभुः । (१३।१)

वडवामगमत्संज्ञामश्वरूपेण भास्करः ॥ (१३।२)

वडवा च तदा त्वाष्ट्री संज्ञा तस्माद्दिवाकरात् । (१४।१)

सुषुवे चाश्विनौ देवौ देवानां तु भिषग्वरौ ॥ (१४।२)

लिखितो भास्करः पश्चात्संज्ञापित्रा महात्मना । (१५।१)

विष्णोश्चक्रं तु यद्घोरं मण्डलाद्भास्करस्य तु ॥ (१५।२)

निर्ममे भगवांस्त्वष्टा प्रधानं दिव्यमायुधम् । (१६।१)

रुद्रप्रसादाच्च शुभं सुदर्शनमिति स्मृतम् ॥ (१६।२)

लब्धवान् भगवांश्चक्रं कृष्णः कालाग्निसन्निभम् । (१७।१)

मनोस्तु प्रथमस्यासन्नव पुत्रास्तु तत्समाः ॥ (१७।२)

इक्ष्वाकुर् नभगश् चैव धृष्णुः शर्यातिरेव च । (१८।१)

नरिष्यन्तश् च वै धीमान् नाभागोऽरिष्ट एव च ॥ (१८।२)

करूषश् च पृषध्रश् च नवैते मानवाः स्मृताः । (१९।१)

इला ज्येष्ठा वरिष्ठा च पुंस्त्वं प्राप च या पुरा ॥ (१९।२)

सुद्युम्न इति विख्याता पुंस्त्वं प्राप्ता त्विला पुरा । (२०।१)

मित्रावरुणयोस्त्वत्र प्रसादान्मुनिपुङ्गवाः ॥ (२०।२)

पुनः शरवणं प्राप्य स्त्रीत्वं प्राप्तो भवाज्ञया । (२१।१)

सुद्युम्नो मानवः श्रीमान् सोमवंशप्रवृद्धये ॥ (२१।२)

इक्ष्वाकोरश्वमेधेन इला किंपुरुषो ऽभवत् । (२२।१)

इला किंपुरुषत्वे च सुद्युम्न इति चोच्यते ॥ (२२।२)

मासमेकं पुमान्वीरः स्त्रीत्वं मासमभूत्पुनः । (२३।१)

इला बुधस्य भवनं सोमपुत्रस्य चाश्रिता ॥ (२३।२)

बुधेनान्तरमासाद्य मैथुनाय प्रवर्तिता । (२४।१)

सोमपुत्राद्बुधाच्चापि ऐलो जज्ञे पुरूरवाः ॥ (२४।२)

सोमवंशाग्रजो धीमान्भवभक्तः प्रतापवान् । (२५।१)

इक्ष्वाकोर्वंशविस्तारं पश्चाद्वक्ष्ये तपोधनाः ॥ (२५।२)

पुत्रत्रयमभूत्तस्य सुद्युम्नस्य द्विजोत्तमाः । (२६।१)

उत्कलश् च गयश्चैव विनताश्वस्तथैव च ॥ (२६।२)

उत्कलस्योत्कलं राष्ट्रं विनताश्वस्य पश्चिमम् । (२७।१)

गया गयस्य चाख्याता पुरी परमशोभना ॥ (२७।२)

सुराणां संस्थितिर्यस्यां पितॄणां च सदा स्थितिः । (२८।१)

इक्ष्वाकुज्येष्ठदायादो मध्यदेशम् अवाप्तवान् ॥ (२८।२)

कन्याभावाच्च सुद्युम्नो नैव भागमवाप्तवान् । (२९।१)

वसिष्ठवचनात् त्वासीत् प्रतिष्ठाने महाद्युतिः ॥ (२९।२)

प्रतिष्ठा धर्मराजस्य सुद्युम्नस्य महात्मनः । (३०।१)

तत्पुरूरवसे प्रादाद्राज्यं प्राप्य महायशाः ॥ (३०।२)

मानवेयो महाभागः स्त्रीपुंसोर्लक्षणान्वितः । (३१।१)

इक्ष्वाकोरभवद्वीरो विकुक्षिर्धर्मवित्तमः ॥ (३१।२)

ज्येष्ठः पुत्रशतस्यासीद्दश पञ्च च तत्सुताः । (३२।१)

अभूज्ज्येष्ठः ककुत्स्थश् च ककुत्स्थात्तु सुयोधनः ॥ (३२।२)

ततः पृथुर्मुनिश्रेष्ठा विश्वकः पार्थिवस् तथा । (३३।१)

विश्वकस्यार्द्रको धीमान्युवनाश्वस्तु तत्सुतः ॥ (३३।२)

शाबस्तिश् च महातेजा वंशकस्तु ततोऽभवत् । (३४।१)

निर्मिता येन शाबस्ती गौडदेशे द्विजोत्तमाः ॥ (३४।२)

वंशाच्च बृहदश्वोऽभूत् कुवलाश्वस्तु तत्सुतः । (३५।१)

धुन्धुमारत्वमापन्नो धुन्धुं हत्वा महाबलम् ॥ (३५।२)

धुन्धुमारस्य तनयास्त्रयस्त्रैलोक्यविश्रुताः । (३६।१)

दृढाश्वश्चैव चण्डाश्वः कपिलाश्वश् च ते स्मृताः ॥ (३६।२)

दृढाश्वस्य प्रमोदस्तु हर्यश्वस्तस्य वै सुतः । (३७।१)

हर्यश्वस्य निकुम्भस्तु संहताश्वस्तु तत्सुतः ॥ (३७।२)

कृशाश्वोऽथ रणाश्वश् च संहताश्वात्मजावुभौ । (३८।१)

युवनाश्वो रणाश्वस्य मान्धाता तस्य वै सुतः ॥ (३८।२)

मान्धातुः पुरुकुत्सो ऽभूद् अम्बरीषश् च वीर्यवान् । (३९।१)

मुचुकुन्दश् च पुण्यात्मा त्रयस्त्रैलोक्यविश्रुताः ॥ (३९।२)

अंबरीषस्य दायादो युवनाश्वोऽपरः स्मृतः । (४०।१)

हरितो युवनाश्वस्य हरितास्तु यतः स्मृताः ॥ (४०।२)

एते ह्यङ्गिरसः पक्षे क्षत्रोपेता द्विजातयः । (४१।१)

पुरुकुत्सस्य दायादस् त्रसद्दस्युर् महायशाः ॥ (४१।२)

नर्मदायां समुत्पन्नः सम्भूतिस्तस्य चात्मजः । (४२।१)

विष्णुवृद्धः सुतस्तस्य विष्णुवृद्धा यतः स्मृताः ॥ (४२।२)

एते ह्यङ्गिरसः पक्षे क्षत्रोपेताः समाश्रिताः । (४३।१)

सम्भूतिरपरं पुत्रमनरण्यमजीजनत् ॥ (४३।२)

रावणेन हतो यो ऽसौ त्रैलोक्यविजये द्विजाः । (४४।१)

बृहदश्वो ऽनरण्यस्य हर्यश्वस्तस्य चात्मजः ॥ (४४।२)

हर्यश्वात्तु दृषद्वत्यां जज्ञे वसुमना नृपः । (४५।१)

तस्य पुत्रोऽभवद्राजा त्रिधन्वा भवभावितः ॥ (४५।२)

प्रसादाद् ब्रह्मसूनोर् वैतण्डिनः प्राप्य शिष्यताम् । (४६।१)

अश्वमेधसहस्रस्य फलं प्राप्य तदाज्ञया ॥ (४६।२)

गणैश्वर्यमनुप्राप्तो भवभक्तः प्रतापवान् । (४७।१)

कथं चैवाश्वमेधं वै करोमीति विचिन्तयन् ॥ (४७।२)

धनहीनश् च धर्मात्मा दृष्टवान् ब्रह्मणः सुतम् । (४८।१)

तण्डिसंज्ञं द्विजं तस्माल्लब्धवान्द्विजसत्तमाः ॥ (४८।२)

नाम्नां सहस्रं रुद्रस्य ब्रह्मणा कथितं पुरा । (४९।१)

तेन नाम्नां सहस्रेण स्तुत्वा तण्डिर्महेश्वरम् ॥ (४९।२)

लब्धवान्गाणपत्यं च ब्रह्मयोनिर्द्विजोत्तमः । (५०।१)

ततस्तस्मान्नृपो लब्ध्वा तण्डिना कथितं पुरा ॥ (५०।२)

नाम्नां सहस्रं जप्त्वा वै गाणपत्यमवाप्तवान् । (५१।१)

ऋषय ऊचुः । (५१।२)

नाम्नां सहस्रं रुद्रस्य ताण्डिना ब्रह्मयोनिना ॥ (५१।३)

कथितं सर्ववेदार्थसंचयं सूत सुव्रत । (५२।१)

नाम्नां सहस्रं विप्राणां वक्तुम् अर्हसि शोभनम् ॥ (५२।२)

सहस्रनामन् ओड़् शिवसूत उवाच । (५३।१)

सर्वभूतात्मभूतस्य हरस्यामिततेजसः । (५३।२)

अष्टोत्तरसहस्रं तु नाम्नां शृणुत सुव्रताः ॥ (५३।३)

यज्जप्त्वा तु मुनिश्रेष्ठा गाणपत्यमवाप्तवान् । (५४।१)

ॐ स्थिरः स्थाणुः प्रभुर्भानुः प्रवरो वरदो वरः ॥ (५४।२)

सर्वात्मा सर्वविख्यातः सर्वः सर्वकरो भवः । (५५।१)

जटी दण्डी शिखण्डी च सर्वगः सर्वभावनः ॥ (५५।२)

हरिश् च हरिणाक्षश् च सर्वभूतहरः स्मृतः । (५६।१)

प्रवृत्तिश् च निवृत्तिश् च शान्तात्मा शाश्वतो ध्रुवः ॥ (५६।२)

श्मशानवासी भगवान्खचरो गोचरो ऽर्दनः । (५७।१)

अभिवाद्यो महाकर्मा तपस्वी भूतधारणः ॥ (५७।२)

उन्मत्तवेषः प्रच्छन्नः सर्वलोकः प्रजापतिः । (५८।१)

महारूपो महाकायः सर्वरूपो महायशाः ॥ (५८।२)

महात्मा सर्वभूतश् च विरूपो वामनो नरः । (५९।१)

लोकपालो ऽन्तर्हितात्मा प्रसादो ऽभयदो विभुः ॥ (५९।२)

पवित्रश् च महांश्चैव नियतो नियताश्रयः । (६०।१)

स्वयंभूः सर्वकर्मा च आदिरादिकरो निधिः ॥ (६०।२)

सहस्राक्षो विशालाक्षः सोमो नक्षत्रसाधकः । (६१।१)

चन्द्रः सूर्यः शनिः केतुर्ग्रहो ग्रहपतिर्मतः ॥ (६१।२)

राजा राज्योदयः कर्ता मृगबाणार्पणो घनः । (६२।१)

महातपा दीर्घतपा अदृश्यो धनसाधकः ॥ (६२।२)

संवत्सरः कृतीमन्त्रः प्राणायामः परंतपः । (६३।१)

योगी योगो महाबीजो महारतो महाबलः ॥ (६३।२)

सुवर्णरेताः सर्वज्ञः सुबीजो वृषवाहनः । (६४।१)

दशबाहुस्त्वनिमिषो नीलकण्ठ उमापतिः ॥ (६४।२)

विश्वरूपः स्वयंश्रेष्ठो बलवीरो बलाग्रणीः । (६५।१)

गणकर्ता गणपतिर्दिग्वासाः काम्य एव च ॥ (६५।२)

मन्त्रवित्परमो मन्त्रः सर्वभावकरो हरः । (६६।१)

कमण्डलुधरो धन्वी बाणहस्तः कपालवान् ॥ (६६।२)

शरी शतघ्नी खड्गी च पट्टिशी चायुधी महान् । (६७।१)

अजश् च मृगरूपश् च तेजस्तेजस्करो विधिः ॥ (६७।२)

उष्णीषी च सुवक्त्रश् च उदग्रो विनतस् तथा । (६८।१)

दीर्घश् च हरिकेशश् च सुतीर्थः कृष्ण एव च ॥ (६८।२)

शृगालरूपः सर्वार्थो मुण्डः सर्वशुभङ्करः । (६९।१)

सिंहशार्दूलरूपश् च गन्धकारी कपर्द्यपि ॥ (६९।२)

ऊर्ध्वरेता ऊर्ध्वलिङ्गी च ऊर्ध्वशायी नभस्तलः । (७०।१)

त्रिजटी चीरवासाश् च रुद्रः सेनापतिर् विभुः ॥ (७०।२)

अहोरात्रं च नक्तं च तिग्ममन्युः सुवर्चसः । (७१।१)

गजहा दैत्यहा कालो लोकधाता गुणाकरः ॥ (७१।२)

सिंहशार्दूलरूपाणाम् आर्द्रचर्मांबरंधरः । (७२।१)

कालयोगी महानादः सर्वावासश्चतुष्पथः ॥ (७२।२)

निशाचरः प्रेतचारी सर्वदर्शी महेश्वरः । (७३।१)

बहुभूतो बहुधनः सर्वसारो ऽमृतेश्वरः ॥ (७३।२)

नृत्यप्रियो नित्यनृत्यो नर्तनः सर्वसाधकः । (७४।१)

सकार्मुको महाबाहुर्महाघोरो महातपाः ॥ (७४।२)

महाशरो महापाशो नित्यो गिरिचरो मतः । (७५।१)

सहस्रहस्तो विजयो व्यवसायो ह्यनिन्दितः ॥ (७५।२)

अमर्षणो मर्षणात्मा यज्ञहा कामनाशनः । (७६।१)

दक्षहा परिचारी च प्रहसो मध्यमस् तथा ॥ (७६।२)

तेजोऽपहारी बलवान्विदितो ऽभ्युदितो बहुः । (७७।१)

गंभीरघोषो योगात्मा यज्ञहा कामनाशनः ॥ (७७।२)

गंभीररोषो गंभीरो गंभीरबलवाहनः । (७८।१)

न्यग्रोधरूपो न्यग्रोधो विश्वकर्मा च विश्वभुक् ॥ (७८।२)

तीक्ष्णोपायश् च हर्यश्वः सहायः कर्मकालवित् । (७९।१)

विष्णुः प्रसादितो यज्ञः समुद्रो वडवामुखः ॥ (७९।२)

हुताशनसहायश् च प्रशान्तात्मा हुताशनः । (८०।१)

उग्रतेजा महातेजा जयो विजयकालवित् ॥ (८०।२)

ज्योतिषामयनं सिद्धिः संधिर्विग्रह एव च । (८१।१)

खड्गी शङ्खी जटी ज्वाली खचरो द्युचरो बली ॥ (८१।२)

वैणवी पणवी कालः कालकण्ठः कटंकटः । (८२।१)

नक्षत्रविग्रहो भावो निभावः सर्वतोमुखः ॥ (८२।२)

विमोचनस्तु शरणो हिरण्यकवचोद्भवः । (८३।१)

मेखलाकृतिरूपश् च जलाचारः स्तुतस् तथा ॥ (८३।२)

वीणी च पणवी ताली नाली कलिकटुस् तथा । (८४।१)

सर्वतूर्यनिनादी च सर्वव्याप्यपरिग्रहः ॥ (८४।२)

व्यालरूपी बिलावासी गुहावासी तरंगवित् । (८५।१)

वृक्षः श्रीमालकर्मा च सर्वबन्धविमोचनः ॥ (८५।२)

बन्धनस्तु सुरेन्द्राणां युधि शत्रुविनाशनः । (८६।१)

सखा प्रवासो दुर्वापः सर्वसाधुनिषेवितः ॥ (८६।२)

प्रस्कन्दो ऽप्यविभावश् च तुल्यो यज्ञविभागवित् । (८७।१)

सर्ववासः सर्वचारी दुर्वासा वासवो मतः ॥ (८७।२)

हैमो हेमकरो यज्ञः सर्वधारी धरोत्तमः । (८८।१)

आकाशो निर्विरूपश् च विवासा उरगः खगः ॥ (८८।२)

भिक्षुश् च भिक्षुरूपी च रौद्ररूपः सुरूपवान् । (८९।१)

वसुरेताः सुवचस्वी वसुवेगो महाबलः ॥ (८९।२)

मनोवेगो निशाचारः सर्वलोकशुभप्रदः । (९०।१)

सर्वावासी त्रयीवासी उपदेशकरो धरः ॥ (९०।२)

मुनिरात्मा मुनिर् लोकः सभाग्यश् च सहस्रभुक् । (९१।१)

पक्षी च पक्षरूपश् च अतिदीप्तो निशाकरः ॥ (९१।२)

समीरो दमनाकारो ह्यर्थो ह्यर्थकरो वशः । (९२।१)

वासुदेवश् च देवश् च वामदेवश् च वामनः ॥ (९२।२)

सिद्धियोगापहारी च सिद्धः सर्वार्थसाधकः । (९३।१)

अक्षुण्णः क्षुण्णरूपश् च वृषणो मृदुर् अव्ययः ॥ (९३।२)

महासेनो विशाखश् च षष्टिभागो गवां पतिः । (९४।१)

चक्रहस्तस्तु विष्टम्भी मूलस्तम्भन एव च ॥ (९४।२)

ऋतुरृतुकरस्तालो मधुर्मधुकरो वरः । (९५।१)

वानस्पत्यो वाजसनो नित्यमाश्रमपूजितः ॥ (९५।२)

ब्रह्मचारी लोकचारी सर्वचारी सुचारवित् । (९६।१)

ईशान ईश्वरः कालो निशाचारी ह्यनेकदृक् ॥ (९६।२)

निमित्तस्थो निमित्तं च नन्दिर् नन्दिकरो हरः । (९७।१)

नन्दीश्वरः सुनन्दी च नन्दनो विषमर्दनः ॥ (९७।२)

भगहारी नियन्ता च कालो लोकपितामहः । (९८।१)

चतुर्मुखो महालिङ्गश्चारुलिङ्गस्तथैव च ॥ (९८।२)

लिङ्गाध्यक्षः सुराध्यक्षः कालाध्यक्षो युगावहः । (९९।१)

बीजाध्यक्षो बीजकर्ता अध्यात्मानुगतो बलः ॥ (९९।२)

इतिहासश् च कल्पश् च दमनो जगदीश्वरः । (१००।१)

दम्भो दम्भकरो दाता वंशो वंशकरः कलिः ॥ (१००।२)

लोककर्ता पशुपतिर्महाकर्ता ह्यधोक्षजः । (१०१।१)

अक्षरं परमं ब्रह्म बलवाञ्छुक्त एव च ॥ (१०१।२)

नित्यो ह्यनीशः शुद्धात्मा शुद्धो मानो गतिर्हविः । (१०२।१)

प्रासादस्तु बलो दर्पो दर्पणो हव्य इन्द्रजित् ॥ (१०२।२)

वेदकारः सूत्रकारो विद्वांश् च परमर्दनः । (१०३।१)

महामेघनिवासी च महाघोरो वशीकरः ॥ (१०३।२)

अग्निज्वालो महाज्वालः परिधूम्रावृतो रविः । (१०४।१)

धिषणः शङ्करो नित्यो वर्चस्वी धूम्रलोचनः ॥ (१०४।२)

नीलस् तथाङ्गलुप्तश् च शोभनो नरविग्रहः । (१०५।१)

स्वस्ति स्वस्तिस्वभावश् च भोगी भोगकरो लघुः ॥ (१०५।२)

उत्सङ्गश् च महाङ्गश् च महागर्भः प्रतापवान् । (१०६।१)

कृष्णवर्णः सुवर्णश् च इन्द्रियः सर्ववर्णिकः ॥ (१०६।२)

महापादो महाहस्तो महाकायो महायशाः । (१०७।१)

महामूर्धा महामात्रो महामित्रो नगालयः ॥ (१०७।२)

महास्कन्धो महाकर्णो महोष्ठश् च महाहनुः । (१०८।१)

महानासो महाकण्ठो महाग्रीवः श्मशानवान् ॥ (१०८।२)

महाबलो महातेजा ह्यन्तरात्मा मृगालयः । (१०९।१)

लम्बितोष्ठश् च निष्ठश् च महामायः पयोनिधिः ॥ (१०९।२)

महादन्तो महादंष्ट्रो महाजिह्वो महामुखः । (११०।१)

महानखो महारोमा महाकेशो महाजटः ॥ (११०।२)

असपत्नः प्रसादश् च प्रत्ययो गीतसाधकः । (१११।१)

प्रस्वेदनो ऽस्वेदनश् च आदिकश् च महामुनिः ॥ (१११।२)

वृषको वृषकेतुश् च अनलो वायुवाहनः । (११२।१)

मण्डली मेरुवासश् च देववाहन एव च ॥ (११२।२)

अथर्वशीर्षः सामास्य ऋक्सहस्रोर्जितेक्षणः । (११३।१)

यजुः पादभुजो गुह्यः प्रकाशौजास्तथैव च ॥ (११३।२)

अमोघार्थप्रसादश् च अन्तर्भाव्यः सुदर्शनः । (११४।१)

उपहारः प्रियः सर्वः कनकः काञ्चनस्थितः ॥ (११४।२)

नाभिर् नन्दिकरो हर्म्यः पुष्करः स्थपतिः स्थितः । (११५।१)

सर्वशास्त्रो धनश्चाद्यो यज्ञो यज्वा समाहितः ॥ (११५।२)

नगो नीलः कविः कालो मकरः कालपूजितः । (११६।१)

सगणो गणकारश् च भूतभावनसारथिः ॥ (११६।२)

भस्मशायी भस्मगोप्ता भस्मभूततनुर्गणः । (११७।१)

आगमश् च विलोपश् च महात्मा सर्वपूजितः ॥ (११७।२)

शुक्लः स्त्रीरूपसम्पन्नः शुचिर्भूतनिषेवितः । (११८।१)

आश्रमस्थः कपोतस्थो विश्वकर्मा पतिर्विराट् ॥ (११८।२)

विशालशाखस् ताम्रोष्ठो ह्यम्बुजालः सुनिश्चितः । (११९।१)

कपिलः कलशः स्थूल आयुधश्चैव रोमशः ॥ (११९।२)

गन्धर्वो ह्यदितिस्तार्क्ष्यो ह्यविज्ञेयः सुशारदः । (१२०।१)

परश्वधायुधो देवो ह्यर्थकारी सुबान्धवः ॥ (१२०।२)

तुम्बवीणो महाकोप ऊर्ध्वरेता जलेशयः । (१२१।१)

उग्रो वंशकरो वंशो वंशवादी ह्यनिन्दितः ॥ (१२१।२)

सर्वाङ्गरूपी मायावी सुहृदो ह्यनिलो बलः । (१२२।१)

बन्धनो बन्धकर्ता च सुबन्धनविमोचनः ॥ (१२२।२)

राक्षसघ्नो ऽथ कामारिर्महादंष्ट्रो महायुधः । (१२३।१)

लम्बितो लम्बितोष्ठश् च लम्बहस्तो वरप्रदः ॥ (१२३।२)

बाहुस्त्वनिन्दितः सर्वः शङ्करोऽथाप्यकोपनः । (१२४।१)

अमरेशो महाघोरो विश्वदेवः सुरारिहा ॥ (१२४।२)

अहिर्बुध्न्यो निरृतिश् च चेकितानो हली तथा । (१२५।१)

अजैकपाच्च कापाली शं कुमारो महागिरिः ॥ (१२५।२)

धन्वन्तरिर्धूमकेतुः सूर्यो वैश्रवणस् तथा । (१२६।१)

धाता विष्णुश् च शक्रश् च मित्रस्त्वष्टा धरो ध्रुवः ॥ (१२६।२)

प्रभासः पर्वतो वायुरर्यमा सविता रविः । (१२७।१)

धृतिश्चैव विधाता च मान्धाता भूतभावनः ॥ (१२७।२)

नीरस्तीर्थश् च भीमश् च सर्वकर्मा गुणोद्वहः । (१२८।१)

पद्मगर्भो महागर्भश्चन्द्रवक्त्रो नभो ऽनघः ॥ (१२८।२)

बलवांश्चोपशान्तश् च पुराणः पुण्यकृत्तमः । (१२९।१)

क्रूरकर्ता क्रूरवासी तनुरात्मा महौषधः ॥ (१२९।२)

सर्वाशयः सर्वचारी प्राणेशः प्राणिनां पतिः । (१३०।१)

देवदेवः सुखोत्सिक्तः सदसत्सर्वरत्नवित् ॥ (१३०।२)

कैलासस्थो गुहावासी हिमवद्गिरिसंश्रयः । (१३१।१)

कुलहारी कुलाकर्ता बहुवित्तो बहुप्रजः ॥ (१३१।२)

प्राणेशो बन्धकी वृक्षो नकुलश् चाद्रिकस् तथा । (१३२।१)

ह्रस्वग्रीवो महाजानुर् अलोलश् च महौषधिः ॥ (१३२।२)

सिद्धान्तकारी सिद्धार्थश्छन्दो व्याकरणोद्भवः । (१३३।१)

सिंहनादः सिंहदंष्ट्रः सिंहास्यः सिंहवाहनः ॥ (१३३।२)

प्रभावात्मा जगत्कालः कालः कम्पी तरुस्तनुः । (१३४।१)

सारङ्गो भूतचक्राङ्कः केतुमाली सुवेधकः ॥ (१३४।२)

भूतालयो भूतपतिरहोरात्रो मलो ऽमलः । (१३५।१)

वसुभृत् सर्वभूतात्मा निश्चलः सुविदुर् बुधः ॥ (१३५।२)

असुहृत्सर्वभूतानां निश्चलश्चलविद्बुधः । (१३६।१)

अमोघः संयमो हृष्टो भोजनः प्राणधारणः ॥ (१३६।२)

धृतिमान्मतिमांस्त्र्यक्षः सुकृतस्तु युधांपतिः । (१३७।१)

गोपालो गोपतिर्ग्रामो गोचर्मवसनो हरः ॥ (१३७।२)

हिरण्यबाहुश् च तथा गुहावासः प्रवेशनः । (१३८।१)

महामना महाकामश् चित्तकामो जितेन्द्रियः ॥ (१३८।२)

गान्धारश् च सुरापश् च तापकर्मरतो हितः । (१३९।१)

महाभूतो भूतवृतो ह्यप्सरोगणसेवितः ॥ (१३९।२)

महाकेतुर् धराधाता नैकतानरतः स्वरः । (१४०।१)

अवेदनीय आवेद्यः सर्वगश् च सुखावहः ॥ (१४०।२)

तारणश्चरणो धाता परिधा परिपूजितः । (१४१।१)

संयोगी वर्धनो वृद्धो गणिको ऽथ गणाधिपः ॥ (१४१।२)

नित्यो धाता सहायश् च देवासुरपतिः पतिः । (१४२।१)

युक्तश् च युक्तबाहुश् च सुदेवोऽपि सुपर्वणः ॥ (१४२।२)

आषाढश् च सुषाढश् च स्कन्धदो हरितो हरः । (१४३।१)

वपुरावर्तमानो ऽन्यो वपुःश्रेष्ठो महावपुः ॥ (१४३।२)

शिरोविमर्शनः सर्वलक्ष्यलक्षणभूषितः । (१४४।१)

अक्षयो रथगीतश् च सर्वभोगी महाबलः ॥ (१४४।२)

साम्नायोऽथ महाम्नायस्तीर्थदेवो महायशाः । (१४५।१)

निर्जीवो जीवनो मन्त्रः सुभगो बहुकर्कशः ॥ (१४५।२)

रत्नभूतो ऽथ रत्नाङ्गो महार्णवनिपातवित् । (१४६।१)

मूलं विशालो ह्यमृतं व्यक्ताव्यक्तस्तपोनिधिः ॥ (१४६।२)

आरोहणो ऽधिरोहश् च शीलधारी महातपाः । (१४७।१)

महाकण्ठो महायोगी युगो युगकरो हरिः ॥ (१४७।२)

युगरूपो महारूपो वहनो गहनो नगः । (१४८।१)

न्यायो निर्वापणो ऽपादः पण्डितो ह्यचलोपमः ॥ (१४८।२)

बहुमालो महामालः शिपिविष्टः सुलोचनः । (१४९।१)

विस्तारो लवणः कूपः कुसुमाङ्गः फलोदयः ॥ (१४९।२)

ऋषभो वृषभो भङ्गो मणिबिम्बजटाधरः । (१५०।१)

इन्दुर्विसर्गः सुमुखः शूरः सर्वायुधः सहः ॥ (१५०।२)

निवेदनः सुधाजातः स्वर्गद्वारो महाधनुः । (१५१।१)

गिरावासो विसर्गश् च सर्वलक्षणलक्षवित् ॥ (१५१।२)

गन्धमाली च भगवाननन्तः सर्वलक्षणः । (१५२।१)

संतानो बहुलो बाहुः सकलः सर्वपावनः ॥ (१५२।२)

करस्थाली कपाली च ऊर्ध्वसंहननो युवा । (१५३।१)

यन्त्रतन्त्रसुविख्यातो लोकः सर्वाश्रयो मृदुः ॥ (१५३।२)

मुण्डो विरूपो विकृतो दण्डी कुण्डी विकुर्वणः । (१५४।१)

वार्यक्षः ककुभो वज्री दीप्ततेजाः सहस्रपात् ॥ (१५४।२)

सहस्रमूर्धा देवेन्द्रः सर्वदेवमयो गुरुः । (१५५।१)

सहस्रबाहुः सर्वाङ्गः शरण्यः सर्वलोककृत् ॥ (१५५।२)

पवित्रं त्रिमधुर्मन्त्रः कनिष्ठः कृष्णपिङ्गलः । (१५६।१)

ब्रह्मदण्डविनिर्माता शतघ्नः शतपाशधृक् ॥ (१५६।२)

कला काष्ठा लवो मात्रा मुहूर्तो ऽहः क्षपा क्षणः । (१५७।१)

विश्वक्षेत्रप्रदो बीजं लिङ्गमाद्यस्तु निर्मुखः ॥ (१५७।२)

सदसद्व्यक्तमव्यक्तं पिता माता पितामहः । (१५८।१)

स्वर्गद्वारं मोक्षद्वारं प्रजाद्वारं त्रिविष्टपः ॥ (१५८।२)

निर्वाणं हृदयश्चैव ब्रह्मलोकः परा गतिः । (१५९।१)

देवासुरविनिर्माता देवासुरपरायणः ॥ (१५९।२)

देवासुरगुरुर् देवो देवासुरनमस्कृतः । (१६०।१)

देवासुरमहामात्रो देवासुरगणाश्रयः ॥ (१६०।२)

देवासुरगणाध्यक्षो देवासुरगणाग्रणीः । (१६१।१)

देवाधिदेवो देवर्षिर् देवासुरवरप्रदः ॥ (१६१।२)

देवासुरेश्वरो विष्णुर् देवासुरमहेश्वरः । (१६२।१)

सर्वदेवमयो ऽचिन्त्यो देवतात्मा स्वयम्भवः ॥ (१६२।२)

उद्गतस्त्रिक्रमो वैद्यो वरदो ऽवरजो ऽम्बरः । (१६३।१)

इज्यो हस्ती तथा व्याघ्रो देवसिंहो महर्षभः ॥ (१६३।२)

विबुधाग्र्यः सुरः श्रेष्ठः स्वर्गदेवस्तथोत्तमः । (१६४।१)

संयुक्तः शोभनो वक्ता आशानां प्रभवो ऽव्ययः ॥ (१६४।२)

गुरुः कान्तो निजः सर्गः पवित्रः सर्ववाहनः । (१६५।१)

शृङ्गी शृङ्गप्रियो बभ्रू राजराजो निरामयः ॥ (१६५।२)

अभिरामः सुशरणो निरामः सर्वसाधनः । (१६६।१)

ललाटाक्षो विश्वदेहो हरिणो ब्रह्मवर्चसः ॥ (१६६।२)

स्थावराणां पतिश्चैव नियतेन्द्रियवर्तनः । (१६७।१)

सिद्धार्थः सर्वभूतार्थो ऽचिन्त्यः सत्यः शुचिव्रतः ॥ (१६७।२)

व्रताधिपः परं ब्रह्म मुक्तानां परमा गतिः । (१६८।१)

विमुक्तो मुक्तकेशश् च श्रीमाञ्छ्रीवर्धनो जगत् ॥ (१६८।२)

यथाप्रधानं भगवान् इति भक्त्या स्तुतो मया । (१६९।१)

भक्तिमेवं पुरस्कृत्य मया यज्ञपतिर्विभुः ॥ (१६९।२)

ततो ह्यनुज्ञां प्राप्यैवं स्तुतो भक्तिमतां गतिः । (१७०।१)

तस्माल्लब्ध्वा स्तवं शंभोर्नृपस्त्रैलोक्यविश्रुतः ॥ (१७०।२)

अश्वमेधसहस्रस्य फलं प्राप्य महायशाः । (१७१।१)

गणाधिपत्यं सम्प्राप्तस् तण्डिनस्तेजसा प्रभोः ॥ (१७१।२)

यः पठेच्छृणुयाद् वापि श्रावयेद्ब्राह्मणानपि । (१७२।१)

अश्वमेधसहस्रस्य फलं प्राप्नोति वै द्विजाः ॥ (१७२।२)

ब्रह्मघ्नश् च सुरापश् च स्तेयी च गुरुतल्पगः । (१७३।१)

शरणागतघाती च मित्रविश्वासघातकः ॥ (१७३।२)

मातृहा पितृहा चैव वीरहा भ्रूणहा तथा । (१७४।१)

संवत्सरं क्रमाज्जप्त्वा त्रिसंध्यं शङ्कराश्रमे ॥ (१७४।२)

देवम् इष्ट्वा त्रिसंध्यं च सर्वपापैः प्रमुच्यते ॥ (१७५।१)

इति श्रीलिङ्गमहापुराणे पूर्वभागे रुद्रसहस्रनामकथनं नाम पञ्चषष्टितमो ऽध्यायः ॥ (१७६।१)