शैलादिरुवाच । (१।१)

अथ ते सम्प्रवक्ष्यामि शिवार्चनमनुत्तमम् । (१।२)

त्रिसंध्यम् अर्चयेद् ईशम् अग्निकार्यं च शक्तितः ॥ (१।३)

शिवस्नानं पुरा कृत्वा तत्त्वशुद्धिं च पूर्ववत् । (२।१)

पुष्पहस्तः प्रविश्याथ पूजास्थानं समाहितः ॥ (२।२)

प्राणायामत्रयं कृत्वा दाहनाप्लावनानि च । (३।१)

गन्धादिवासितकरो महामुद्रां प्रविन्यसेत् ॥ (३।२)

विज्ञानेन तनुं कृत्वा ब्रह्माग्नेरपि यत्नतः । (४।१)

अव्यक्तबुद्ध्यहङ्कारतन्मात्रासंभवां तनुम् ॥ (४।२)

शिवामृतेन संपूतं शिवस्य च यथातथम् । (५।१)

अधोनिष्ट्या वितस्त्यां तु नाभ्यामुपरि तिष्ठति ॥ (५।२)

हृदयं तद्विजानीयाद्विश्वस्यायतनं महत् । (६।१)

हृत्पद्मकर्णिकायां तु देवं साक्षात्सदाशिवम् ॥ (६।२)

पञ्चवक्त्रं दशभुजं सर्वाभरणभूषितम् । (७।१)

प्रतिवक्त्रं त्रिनेत्रं च शशाङ्ककृतशेखरम् ॥ (७।२)

बद्धपद्मासनासीनं शुद्धस्फटिकसन्निभम् । (८।१)

ऊर्ध्वं वक्त्रं सितं ध्यायेत्पूर्वं कुङ्कुमसन्निभम् ॥ (८।२)

नीलाभं दक्षिणं वक्त्रमतिरक्तं तथोत्तरम् । (९।१)

गोक्षीरधवलं दिव्यं पश्चिमं परमेष्ठिनः ॥ (९।२)

शूलं परशुखड्गं च वज्रं शक्तिं च दक्षिणे । (१०।१)

वामे पाशाङ्कुशं घण्टां नागं नाराचमुत्तमम् ॥ (१०।२)

वरदाभयहस्तं वा शेषं पूर्ववदेव तु । (११।१)

सर्वाभरणसंयुक्तं चित्रांबरधरं शिवम् ॥ (११।२)

ब्रह्माङ्गविग्रहं देवं सर्वदेवोत्तमोत्तमम् । (१२।१)

पूजयेत्सर्वभावेन ब्रह्माङ्गैर्ब्रह्मणः पतिम् ॥ (१२।२)

उक्तानि पञ्च ब्रह्माणि शिवाङ्गानि शृणुष्व मे । (१३।१)

शक्तिभूतानि च तथा हृदयादीनि सुव्रत ॥ (१३।२)

ॐ ईशानः सर्वविद्यानां हृदयाय शक्तिबीजाय नमः । (१४।१)

ॐ ईश्वरः सर्वभूतानाममृताय शिरसे नमः ॥ (१४।२)

ॐ ब्रह्माधिपतये कालाग्निरूपाय शिखायै नमः । (१५।१)

ॐ ब्रह्मणोऽधिपतये कालचण्डमारुताय कवचाय नमः ॥ (१५।२)

ॐ ब्रह्मणे बृंहणाय ज्ञानमूर्तये नेत्राय नमः । (१६।१)

ॐ शिवाय सदाशिवाय पाशुपतास्त्राय अप्रतिहताय फट्फट् ॥ (१६।२)

ॐ सद्योजाताय भवेनानिभवे भवस्य मां भवोद्भवाय शिवमूर्तये नमः । (१७।१)

ॐ हंसशिखाय विद्यादेहाय आत्मस्वरूपाय परापराय शिवाय शिवतमाय नमः ॥ (१७।२)

कथितानि शिवाङ्गानि मूर्तिविद्या च तस्य वै । (१८।१)

ब्रह्माङ्गमूर्ति विद्याङ्गसहितां शिवशासने ॥ (१८।२)

सौराणि च प्रवक्ष्यामि बाष्कलाद्यानि सुव्रत । (१९।१)

अङ्गानि सर्ववेदेषु सारभूतानि सुव्रत ॥ (१९।२)

ॐभूः ॐभुवः ॐ स्वः ॐमहः ॐ जनः ॐ तपः ॐसत्यम् ॐऋतम् ॐ ब्रह्मा नवाक्षरमयं मन्त्रं बाष्कलं परिकीर्तितम् । (२०।१)

न क्षरतीति लोके ऽस्मिंस्ततो ह्यक्षरमुच्यते । (२०।२)

सत्यम् अक्षरम् इत्य् उक्तं प्रणवादिनमोऽन्तकम् ॥ (२०।३)

ॐ भूर्भुवः स्वः तत्सवितुर्वरेण्यं भर्गो देवस्य धीमहि । (२१।१)

धियो यो नः प्रचोदयात् । (२१।२)

नमः सूर्याय खखोल्काय नमः ॥ (२१।३)

मूलमन्त्रमिति प्रोक्तं भास्करस्य महात्मनः । (२२।१)

नवाक्षरेण दीप्ताद्यमूलमन्त्रेण भास्करम् ॥ (२२।२)

पूजयेदङ्गमन्त्राणि कथयामि समासतः । (२३।१)

वेदादिभिः प्रभूताद्यं प्रणवेन तु मध्यमम् ॥ (२३।२)

ॐभूः ब्रह्मणे हृदयाय नमः । (२४।१)

ॐभुवः विष्णवे शिरसे नमः । (२४।२)

ॐस्वः रुद्राय शिखायै नमः ॐभूर्भुवः स्वः ज्वालामालिन्यै देवाय नमः ॐमहः महेश्वराय कवचाय नमः । (२४।३)

ॐ जनः शिवाय नेत्रेभ्यो नमः । (२४।४)

ॐ तपस् तापनाय अस्त्राय नमः । (२४।५)

एवं प्रसंगादेवेह सौराणि कथितानि ह । (२४।६)

शैवानि च समासेन न्यासयोगेन सुव्रत ॥ (२४।७)

इत्थं मन्त्रमयं देवं पूजयेद्धृदयांबुजे । (२५।१)

नाभौ होमं तु कर्तव्यं जनयित्वा यथाक्रमम् ॥ (२५।२)

मनसा सर्वकार्याणि शिवाग्नौ देवमीश्वरम् । (२६।१)

पञ्चब्रह्माङ्गसम्भूतं शिवमूर्तिं सदाशिवम् ॥ (२६।२)

रक्तपद्मासनासीनं शकलीकृत्य यत्नतः । (२७।१)

मूलेन मूर्तिमन्त्रेण ब्रह्माङ्गाद्यैस्तु सुव्रत ॥ (२७।२)

समिदाज्याहुतीर्हुत्वा मनसा चन्द्रमण्डलात् । (२८।१)

चन्द्रस्थानात्समुत्पन्नां पूर्णधारामनुस्मरेत् ॥ (२८।२)

पूर्णाहुतिविधानेन ज्ञानिनां शिवशासने । (२९।१)

शिवं वक्त्रगतं ध्यायेत्तेजोमात्रं च शाङ्करम् ॥ (२९।२)

ललाटे देवदेवेशं भ्रूमध्ये वा स्मरेत्पुनः । (३०।१)

यच्च हृत्कमले सर्वं समाप्य विधिविस्तरम् ॥ (३०।२)

शुद्धदीपशिखाकारं भावयेद्भवनाशनम् । (३१।१)

लिङ्गे च पूजयेद्देवं स्थण्डिले वा सदाशिवम् ॥ (३१।२)

इति श्रीलिङ्गमहापुराणे उत्तरभागे त्रयोविंशतितमोऽध्यायः ॥ (३२।१)