सनत्कुमार उवाच । (१।१)

अथातः सम्प्रवक्ष्यामि तिलधेनुविधिक्रमम् । (१।२)

पूर्वोक्तमण्डपे कुर्याच्छिवपूजां तु पश्चिमे ॥ (१।३)

तस्याग्रे मध्यतो भूमौ पद्ममालिख्य शोभनम् । (२।१)

वस्त्रैराच्छादितं पद्मं तन्मध्ये विन्यसेच्छुभम् ॥ (२।२)

तिलपुष्पं तु कृत्वाथ हेमपद्मं विनिक्षिपेत् । (३।१)

त्रिंशन्निष्केन कर्तव्यं तदर्धार्धेन वा पुनः ॥ (३।२)

पञ्चनिष्केण कर्तव्यं तदर्धार्धेन वा पुनः । (४।१)

तमाराध्य विधानेन गन्धपुष्पादिभिः क्रमात् ॥ (४।२)

पद्मस्योत्तरदिग्भागे विप्रान् एकादश न्यसेत् । (५।१)

तानभ्यर्च्य विधानेन गन्धपुष्पादिभिः क्रमात् ॥ (५।२)

आच्छादनोत्तरासंगं विप्रेभ्यो दापयेत्क्रमात् । (६।१)

उष्णीषं च प्रदातव्यं कुण्डले च विभूषिते ॥ (६।२)

हेमाङ्गुलीयकं दत्त्वा ब्राह्मणेभ्यो विधानतः । (७।१)

एकं दश च वस्त्राणि तेषामग्रे प्रकीर्य च ॥ (७।२)

तेषु वस्त्रेषु निःक्षिप्य तिलाद्यानि पृथक्पृथक् । (८।१)

कांस्यपात्रं शतपलं विभिद्यैकादशांशकम् ॥ (८।२)

इक्षुदण्डं च दातव्यं ब्राह्मणेभ्यो विशेषतः । (९।१)

गोशृङ्गे तु हिरण्येन द्विनिष्केण तु कारयेत् ॥ (९।२)

रजतेन तु कर्तव्याः खुरा निष्कद्वयेन तु । (१०।१)

एवं पृथक्पृथग् दत्त्वा तत्तिलेषु विनिक्षिपेत् ॥ (१०।२)

रुद्रैकादशमन्त्रैस्तु रुद्रेभ्यो दापयेत्तदा । (११।१)

पद्मस्य पूर्वदिग्भागे विप्रान्द्वादश पूजितान् ॥ (११।२)

एतेनैव तु मार्गेण तेषु श्रद्धासमन्वितः । (१२।१)

द्वादशादित्यमन्त्रैश्च दापयेदेवमेव च ॥ (१२।२)

पूर्ववद्दक्षिणे भागे विप्रान्षोडश संस्थितान् । (१३।१)

मूर्तिं विघ्नेशमन्त्रैश्च दापयेत्पूर्ववत्पुनः ॥ (१३।२)

यजमानेन कर्तव्यं सर्वमेतद्यथाक्रमम् । (१४।१)

केवलं रुद्रदानं वा आदित्येभ्यो ऽथवा पुनः ॥ (१४।२)

मूर्त्यादीनां च वा देयं यथाविभवविस्तरम् । (१५।१)

पद्मं विन्यस्य राजासौ शेषं वा कारयेन्नृपः ॥ (१५।२)

दक्षिणा च प्रदातव्या पञ्चनिष्केण भूषणम् ॥ (१६।१)

इति श्रीलिङ्गमहापुराणे उत्तरभागे तिलधेनुदानविधिनिरूपणं नाम सप्तत्रिंशो ऽध्यायः ॥ (१७।१)