सूत उवाच । (१।१)

इति निशम्य कृताञ्जलयस् तदा दिवि महामुनयः कृतनिश्चयाः । (१।२)

शिवतरं शिवमीश्वरमव्ययं मनसि लिङ्गमयं प्रणिपत्य ते ॥ (१।३)

सकलदेवपतिर्भगवानजो हरिरशेषपतिर्गुरुणा स्वयम् । (२।१)

मुनिवराश्च गणाश्च सुरासुरा नरवराः शिवलिङ्गमयाः पुनः ॥ (२।२)

श्रुत्वैवं मुनयः सर्वे षट्कुलीयाः समाहिताः । (३।१)

संत्यज्य सर्वं देवस्य प्रतिष्ठां कर्तुमुद्यताः ॥ (३।२)

अपृच्छन्सूतमनघं हर्षगद्गदया गिरा । (४।१)

लिङ्गप्रतिष्ठां विपुलां सर्वे ते शंसितव्रताः ॥ (४।२)

सूत उवाच । (५।१)

प्रतिष्ठां लिङ्गमूर्तेर्वो यथावदनुपूर्वशः । (५।२)

प्रवक्ष्यामि समासेन धर्मकामार्थमुक्तये ॥ (५।३)

कृत्वैव लिङ्गं विधिना भुवि लिङ्गेषु यत्नतः । (६।१)

लिङ्गमेकतमं शैलं ब्रह्मविष्णुशिवात्मकम् ॥ (६।२)

हेमरत्नमयं वापि राजतं ताम्रजं तु वा । (७।१)

सवेदिकं ससूत्रं च सम्यग्विस्तृतमस्तकम् ॥ (७।२)

विशोध्य स्थापयेद्भक्त्या सवेदिकमनुत्तमम् । (८।१)

लिङ्गवेदी उमा देवी लिङ्गं साक्षान्महेश्वरः ॥ (८।२)

तयोः सम्पूजनाद् एव देवी देवश्च पूजितौ । (९।१)

प्रतिष्ठया च देवेशो देव्या सार्धं प्रतिष्ठितः ॥ (९।२)

तस्मात्सवेदिकं लिङ्गं स्थापयेत्स्थापकोत्तमः ॥ (१०।१)

मूले ब्रह्मा वसति भगवान्मध्यभागे च विष्णुः सर्वेशानः पशुपतिरजो रुद्रमूर्तिर्वरेण्यः । (११।१)

तस्माल्लिङ्गं गुरुतरतरं पूजयेत्स्थापयेद्वा यस्मात्पूज्यो गणपतिरसौ देवमुख्यैः समस्तैः ॥ (११।२)

गन्धैः स्रग्धूपदीपैः स्नपनहुतबलिस्तोत्रमन्त्रोपहारैर्नित्यं ये ऽभ्यर्चयन्ति त्रिदशवरतनुं लिङ्गमूर्तिं महेशम् । (१२।१)

गर्भाधानादिनाशक्षयभयरहिता देवगन्धर्वमुख्यैः सिद्धैर्वन्द्याश्च पूज्या गणवरनमितास्ते भवन्त्यप्रमेयाः ॥ (१२।२)

तस्माद्भक्त्योपचारेण स्थापयेत्परमेश्वरम् । (१३।१)

पूजयेच्च विशेषेण लिङ्गं सर्वार्थसिद्धये ॥ (१३।२)

समर्च्य स्थापयेल्लिङ्गं तीर्थमध्ये शिवासने । (१४।१)

कूर्चवस्त्रादिभिर्लिङ्गमाच्छाद्य कलशैः पुनः ॥ (१४।२)

लोकपालादिदैवत्यैः सकूर्चैः साक्षतैः शुभैः । (१५।१)

उत्कूर्चैः स्वस्तिकाद्यैश्च चित्रतन्तुकवेष्टितैः ॥ (१५।२)

वज्रादिकायुधोपेतैः सवस्त्रैः सपिधानकैः । (१६।१)

लक्षयेत्परितो लिङ्गमीशानेन प्रतिष्ठितम् ॥ (१६।२)

धूपदीपसमोपेतं वितानविततांबरम् । (१७।१)

लोकपालध्वजैश्चैव गजादिमहिषादिभिः ॥ (१७।२)

चित्रितैः पूजितैश्चैव दर्भमाला च शोभना । (१८।१)

सर्वलक्षणसम्पूर्णा तया बाह्ये च वेष्टयेत् ॥ (१८।२)

ततो ऽधिवासयेत् तोये धूपदीपसमन्विते । (१९।१)

पञ्चाहं वा त्र्यहं वाथ एकरात्रम् अथापि वा ॥ (१९।२)

वेदाध्ययनसम्पन्नो नृत्यगीतादिमङ्गलैः । (२०।१)

किङ्किणीरवकोपेतं तालवीणारवैरपि ॥ (२०।२)

ईक्षयेत्कालमव्यग्रो यजमानः समाहितः । (२१।१)

उत्थाप्य स्वस्तिकं ध्यायेन्मण्डपे लक्षणान्विते ॥ (२१।२)

संस्कृते वेदिसंयुक्ते नवकुण्डेन संवृते । (२२।१)

पूर्वोक्तविधिना युक्ते सर्वलक्षणसंयुते ॥ (२२।२)

अष्टमण्डलसंयुक्ते दिग्ध्वजाष्टकसंयुते । (२३।१)

पूर्वोक्तलक्षणोपेतैः कुण्डैः प्रागादितः क्रमात् ॥ (२३।२)

प्रधानं कुण्डमीशान्यां चतुरस्रं विधीयते । (२४।१)

अथवा पञ्चकुण्डैकं स्थण्डिलं चैकमेव च ॥ (२४।२)

यज्ञोपकरणैः सर्वैः शिवार्चायां हि भूषणैः । (२५।१)

वेदिमध्ये महाशय्यां पञ्चतूलीप्रकल्पिताम् ॥ (२५।२)

कल्पयेत्काञ्चनोपेतां सितवस्त्रावगुण्ठिताम् । (२६।१)

प्रकल्प्यैवं शिवं चैव स्थापयेत्परमेश्वरम् ॥ (२६।२)

प्राक्शिरस्कं न्यसेल्लिङ्गमीशानेन यथाविधि । (२७।१)

रत्नन्यासे कृते पूर्वं केवलं कलशं न्यसेत् ॥ (२७।२)

लिङ्गमाच्छाद्य वस्त्राभ्यां कूर्चेन च समन्ततः । (२८।१)

रत्नन्यासे प्रसक्ते ऽथ वामाद्या नव शक्तयः ॥ (२८।२)

नवरत्नं हिरण्याद्यैः पञ्चगव्येन संयुतैः । (२९।१)

सर्वधान्यसमोपेतं शिलायामपि विन्यसेत् ॥ (२९।२)

स्थापयेद्ब्रह्मलिङ्गं हि शिवगायत्रिसंयुतम् । (३०।१)

केवलं प्रणवेनापि स्थापयेच्छिवमव्ययम् ॥ (३०।२)

ब्रह्मजज्ञानमन्त्रेण ब्रह्मभागं प्रभोस्तथा । (३१।१)

विष्णुगायत्रिया भागं वैष्णवं त्वथ विन्यसेत् ॥ (३१।२)

सूत्रे तत्त्वत्रयोपेते प्रणवेन प्रविन्यसेत् । (३२।१)

सर्वं नमः शिवायेति नमो हंसः शिवाय च ॥ (३२।२)

रुद्राध्यायेन वा सर्वं परिमृज्य च विन्यसेत् । (३३।१)

स्थापयेद्ब्रह्मभिश्चैव कलशान्वै समन्ततः ॥ (३३।२)

वेदिमध्ये न्यसेत्सर्वान् पूर्वोक्तविधिसंयुतान् । (३४।१)

मध्यकुंभे शिवं देवीं दक्षिणे परमेश्वरीम् ॥ (३४।२)

स्कन्दं तयोश्च मध्ये तु स्कन्दकुंभे सुचित्रिते । (३५।१)

ब्रह्माणं स्कन्दकुंभे वा ईशकुम्भे हरिं तथा ॥ (३५।२)

अथवा शिवकुंभे च ब्रह्माङ्गानि च विन्यसेत् । (३६।१)

शिवो महेश्वरश्चैव रुद्रो विष्णुः पितामहः ॥ (३६।२)

ब्रह्माण्येवं समासेन हृदयादीनि चांबिका । (३७।१)

वेदिमध्ये न्यसेत् सर्वान् पूर्वोक्तविधिसंयुतान् ॥ (३७।२)

वर्धन्यां स्थापयेद्देवीं गन्धतोयेन पूर्य च । (३८।१)

हिरण्यं रजतं रत्नं शिवकुंभे प्रविन्यसेत् ॥ (३८।२)

वर्धन्याम् अपि यत्नेन गायत्र्यङ्गैश्च सुव्रताः । (३९।१)

विद्येश्वरां दिशां कुंभे ब्रह्मकूर्चेन पूरिते ॥ (३९।२)

अनन्तेशादिदेवांश्च प्रणवादिनमोऽन्तकम् । (४०।१)

नववस्त्रं प्रतिघटमष्टकुंभेषु दापयेत् ॥ (४०।२)

विद्येश्वराणां कुंभेषु हेमरत्नादि विन्यसेत् । (४१।१)

वक्त्रक्रमेण होतव्यं गायत्र्यङ्गक्रमेण च ॥ (४१।२)

जयादिस्विष्टपर्यन्तं सर्वं पूर्ववदाचरेत् । (४२।१)

सेचयेच्छिवकुंभेन वर्धन्या वैष्णवेन च ॥ (४२।२)

पैतामहेन कुंभेन ब्रह्मभागं विशेषतः । (४३।१)

विद्येश्वराणां कुंभैश्च सेचयेत्परमेश्वरम् ॥ (४३।२)

विन्यसेत्सर्वमन्त्राणि पूर्ववत्सुसमाहितः । (४४।१)

पूजयेत्स्नपनं कृत्वा सहस्रादिषु संभवैः ॥ (४४।२)

दक्षिणा च प्रदातव्या सहस्रपणमुत्तमम् । (४५।१)

इतरेषां तदर्धं स्यात्तदर्धं वा विधीयते ॥ (४५।२)

वस्त्राणि च प्रधानस्य क्षेत्रभूषणगोधनम् । (४६।१)

उत्सवश्च प्रकर्तव्यो होमयागबलिः क्रमात् ॥ (४६।२)

नवाहं वापि सप्ताहम् एकाहं च त्र्यहं तथा । (४७।१)

होमश्च पूर्ववत्प्रोक्तो नित्यमभ्यर्च्य शङ्करम् ॥ (४७।२)

देवानां भास्करादीनां होमं पूर्ववदेव तु । (४८।१)

अभ्यन्तरे तथा बाह्ये वह्नौ नित्यं समर्चयेत् ॥ (४८।२)

य एवं स्थापयेल्लिङ्गं स एव परमेश्वरः । (४९।१)

तेन देवगणा रुद्रा ऋषयो ऽप्सरसस्तथा ॥ (४९।२)

स्थापिताः पूजिताश्चैव त्रैलोक्यं सचराचरम् ॥ (५०।१)

इति श्रीलिङ्गमहापुराणे उत्तरभागे लिङ्गस्थापनं नाम सप्तचत्वारिंशो ऽध्यायः ॥ (५१।१)