सूत उवाच । (१।१)

देवकूटे गिरौ मध्ये महाकूटे सुशोभने । (१।२)

हेमवैडूर्यमाणिक्यनीलगोमेदकान्तिभिः ॥ (१।३)

तथान्यैर्मणिमुख्यैश् च निर्मिते निर्मले शुभे । (२।१)

शाखाशतसहस्राढ्ये सर्वद्रुमविभूषिते ॥ (२।२)

चम्पकाशोकपुंनागवकुलासनमण्डिते । (३।१)

पारिजातकसम्पूर्णे नानापक्षिगणान्विते ॥ (३।२)

नैकधातुशतैश्चित्रे विचित्रकुसुमाकुले । (४।१)

नितम्बपुष्पसालम्बे नैकसत्त्वगणान्विते ॥ (४।२)

विमलस्वादुपानीये नैकप्रस्रवणैर्युते । (५।१)

निर्झरैः कुसुमाकीर्णैरनेकैश् च विभूषिते ॥ (५।२)

पुष्पोडुपवहाभिश् च स्रवन्तीभिर् अलंकृते । (६।१)

स्निग्धवर्णं महामूलमनेकस्कन्धपादपम् ॥ (६।२)

रम्यं ह्यविरलच्छायं दशयोजनमण्डलम् । (७।१)

तत्र भूतवनं नाम नानाभूतगणालयम् ॥ (७।२)

महादेवस्य देवस्य शङ्करस्य महात्मनः । (८।१)

दीप्तमायतनं तत्र महामणिविभूषितम् ॥ (८।२)

हेमप्राकारसंयुक्तं मणितोरणमण्डितम् । (९।१)

स्फाटिकैश् च विचित्रैश् च गोपुरैश् च समन्वितम् ॥ (९।२)

सिंहासनैर्मणिमयैः शुभास्तरणसंयुतैः । (१०।१)

क्षितावितस्ततः सम्यक् शर्वेणाधिष्ठितैः शुभैः ॥ (१०।२)

अम्लानमालानिचितैर् नानावर्णैर् गृहोत्तमैः । (११।१)

मण्डपैः सुविचित्रैस्तु स्फाटिकस्तम्भसंयुतैः ॥ (११।२)

संयुतं सर्वभूतेन्द्रैर् ब्रह्मेन्द्रोपेन्द्रपूजितैः । (१२।१)

वराहगजसिंहर्क्षशार्दूलकरभाननैः ॥ (१२।२)

गृध्रोलूकमुखैश्चान्यैर् मृगोष्ट्राजमुखैरपि । (१३।१)

प्रमथैर्विविधैः स्थूलैर्गिरिकूटोपमैः शुभैः ॥ (१३।२)

करालैर्हरिकेशैश् च रोमशैश् च महाभुजैः । (१४।१)

नानावर्णाकृतिधरैर् नानासंस्थानसंस्थितैः ॥ (१४।२)

दीप्तास्यैर् दीप्तचरितैर् नन्दीश्वरमुखैः शुभैः । (१५।१)

ब्रह्मेन्द्रविष्णुसंकाशैर् अणिमादिगुणान्वितैः ॥ (१५।२)

अशून्यममरैर्नित्यं महापरिषदैस् तथा । (१६।१)

तत्र भूतपतेर्देवाः पूजां नित्यं प्रयुञ्जते ॥ (१६।२)

झर्झरैः शङ्खपटहैर्भेरीडिण्डिमगोमुखैः । (१७।१)

ललितावसितोद्गीतैर् वृत्तवल्गितगर्जितैः ॥ (१७।२)

पूजितो वै महादेवः प्रमथैः प्रमथेश्वरः । (१८।१)

सिद्धर्षिदेवगन्धर्वैर् ब्रह्मणा च महात्मना ॥ (१८।२)

उपेन्द्रप्रमुखैश्चान्यैः पूजितस्तत्र शंकरः । (१९।१)

विभक्तचारुशिखरं यत्र तच्छङ्खवर्चसम् ॥ (१९।२)

कैलासकैलासो यक्षराजस्य कुबेरस्य महात्मनः । (२०।१)

निवासः कोटियक्षाणां तथान्येषां महात्मनाम् ॥ (२०।२)

तत्रापि देवदेवस्य भवस्यायतनं महत् । (२१।१)

तस्मिन्नायतने सोमः सदास्ते सगणो हरः ॥ (२१।२)

यत्र मन्दाकिनी नाम नलिनी विपुलोदका । (२२।१)

सुवर्णमणिसोपाना कुबेरशिखरे शुभे ॥ (२२।२)

जांबूनदमयैः पद्मैर्गन्धस्पर्शगुणान्वितैः । (२३।१)

नीलवैडूर्यपत्रैश् च गन्धोपेतैर्महोत्पलैः ॥ (२३।२)

तथा कुमुदषण्डैश् च महापद्मैर् अलंकृता । (२४।१)

यक्षगन्धर्वनारीभिर् अप्सरोभिश् च सेविता ॥ (२४।२)

देवदानवगन्धर्वैर्यक्षराक्षसकिन्नरैः । (२५।१)

उपस्पृष्टजला पुण्या नदी मन्दाकिनी शुभा ॥ (२५।२)

तस्याश्चोत्तरपार्श्वे तु भवस्यायतनं शुभम् । (२६।१)

वैडूर्यमणिसम्पन्नं तत्रास्ते शङ्करो ऽव्ययः ॥ (२६।२)

द्विजाः कनकनन्दायास्तीरे वै प्राचि दक्षिणे । (२७।१)

वनं द्विजसहस्राढ्यं मृगपक्षिसमाकुलम् ॥ (२७।२)

तत्रापि सगणः साम्बः क्रीडतेऽद्रिसमे गृहे । (२८।१)

नन्दायाः पश्चिमे तीरे किंचिद् वै दक्षिणाश्रिते ॥ (२८।२)

पुरं रुद्रपुरी नाम नानाप्रासादसंकुलम् । (२९।१)

तत्रापि शतधा कृत्वा ह्यात्मानं चाम्बया सह ॥ (२९।२)

क्रीडते सगणः साम्बस् तच्छिवालयम् उच्यते । (३०।१)

एवं शतसहस्राणि शर्वस्यायतनानि तु ॥ (३०।२)

प्रतिद्वीपे मुनिश्रेष्ठाः पर्वतेषु वनेषु च । (३१।१)

नदीनदतटाकानां तीरेष्वर्णवसंधिषु ॥ (३१।२)

इति श्रीलिङ्गमहापुराणे पूर्वभागे एकपञ्चाशत्तमो ऽध्यायः ॥ (३२।१)